María Jesús Egido (PSE) eta Eider Mendoza (PNV) batzarkideei gutun irekia

Donostia, 2014-11-20

María Jesús, Eider,

Azaroaren 5ean Batzar Nagusitako bilkuran gu egon izanarekin deseroso zeundetela eta saioa grabatu ahal izanak gogaitu egin zintuztela ikusi genuen. Egun hartan PNV eta PSE-k, PP-rekin batera, IRPHaren biktima guztiei justizia egitearen aurka bozkatu zenuten. Zuen bozkak lotsarazten zaituztela dirudi, eta zoriondu egin nahi zaituztegu. Badakizue modu desegoki eta gaitzesgarrian ari zaretela, eta ona da hori onartzea, modu inplizituan bada ere. Aurrerapausoa da.

Bestalde, zuen hitzalditan esandako batzuk ezin ditugu komentatu gabe utzi.

Zuk, María Jesús, Batzar Nagusiek onarturiko 90/2013 ebazpena aipatu zenuen, 2013ko azaroaren 1etik aurrera IRPH Cajas indizea Euribor+1-ekin ordezkatzeko eskatzen zuena, «legeak ezarririko epean». Zein lotsa gutxi duzun!

Kaltedunok ez dugu ahazten ebazpen hori, 2013ko azaroaren 6an onartua izan zela, PSE eta PNV-k elkarrekin idatzi zenutela, eta zuk azaldu zenuela, azpimarratuaz helburua «presioa egitea» zela, ordezkatzea berehala izan zedin, errebisioari itxaron gabe.

Egun batzuk geroago, Kutxaren Administrazio Kontseiluan ohikoa errepikatu zen: EH Bilduk IRPH Cajas Euribor+1 indizearekin berehala ordezkatzea proposatu zuen, eta PNV, PSE, PP, CCOO eta Pixkanakak aurka egin zuten.

Hori dela eta, 2014ko urtarrilaren 15eko Batzar Nagusien osoko bilkurak gaia berriz ere aztertu zuen, eta Eider Mendozak (PNV) argitu zuen 90/2013 ebazpenak zuk azaldu zenuenaren aurkakoa esan nahi zuela. Eiderren arabera, IRPHa hurrengo errebisioan ordezkatzea eskatzen zen, eta ez lehenago.

Modu honetan PNV-k zuk esandakoak erabat ezeztatu zituen, eta zuk ez duzu ezertxo ere esateko duintasunik izan. Kutxak ebazpen hori bete ez izanaren berririk ez zenuela esatera iritsi zinen.

Baina atzerago joan eta 2013ko ekainaren 14ean aurkeztu zenuen ebazpen proposamena gogora dezakegu, non Kutxabanki eskatzen zenion «IRPHa berehala ordezkatzeko». Beraz 2013ko ekainean berehala ordezkatzea eskatzen duzu, azaroan ere bai, baina 2014ko urtarrilean jadanik ez. Gidoiak hala eskatuta, PNVren memelo baliagarria zara.

Izan duintasun apur bat. Eman dimisioa eta zoaz etxera.

Zuk, Eider, esan zenuen Kutxabanki IRPH Entidades indizea aplikatzeari uzteko eskatzeak ez zuela zentzurik, legezkoa delako (eztabaidagarria da), eta indarrean jarraitzen duelako (egia da).

Kutxabankek baliogabetua dagoen edota legez kanpokoa den indize bat aplikatuko balu ez genuke zuregana joko, epaitegietara baizik (eta hori ere egin dugu). Zuri itxura batean legezkoak diruditen bidegabekeriak konpontzen saiatzeko ordaintzen dizugu. Gogoratu adibidez nola 2013ko uztailaren 4ean zure batzarkide taldeak testu bat erregistratu zuen IRPH Cajas berehala ordezkatzeko eskatuaz, orduan oraindik legezkoa izan eta indarrean egon arren… Baina jakina, beste garai batzuk ziren. Hipokrisia eta paripearen garaiak. IRPHaren aurkako borroka babestearen itxura egiten zenuten Kutxabanken barruan IRPHa aplikatzen jarraitzearen errudun zineten (eta zareten) bitartean. Orain, azkenean, mozorroa kendu duzue.

Esan zenuen baita ere IRPHa aplikatzeak ez dakarrela derrigorrean hipoteka ordaintzeko arazoak izatea. Eta zer? Kreditu-txartela lapurtuko balizute, eta hilean 300 euro atera, suposatzen dugu ez zinela goseak akabatuko, baina ez zenuke onartuko, ala? Ba horixe.

Azkenik, esan zenuen IRPHak hilero ematen diren hipoteken bataz besteko interesa irudikatzen duela, eta barregarri geratu zinela esan behar dizugu.

2014ko uztailaren 4ean gure elkarteko abokatu batek Batzar Nagusitan agerraldia egin zuen eta oso argi azaldu zuen IRPHaren gabezia hau, beste askoren artean. Baina zu ez zinen saioan izan, nahiz eta lehendakari lanak egitea zegokizun, eta egun hartan piper egin izanagatik orain barregarri geratu zara. Baina lasai, azalduko dizugu zergatik IRPHak ez duen ordezkatu beharko lukeen bataz bestekoa ordezkatzen. Hori bai, saio harri dagokion zure soldataren zatia itzuli iezaguzu mesedez.

Hasteko, begira Espainiako Bankuaren datuekin eginiko grafiko honetan nola IRPHa beti hipoteken interesen bataz bestekoaren gainetik dagoen.

Zergatik uste duzu izan daitekeela? IRPHa ez da bataz besteko haztatu edo ponderatua, eta ez du merkatuaren errealitatea jasotzen. Tori adibide bat: demagun hilabete bat non hipoteken %70a %2an ematen den, %20a %2,5ean eta gainontzekoa interes handiagotan. Bataz bestekoa %2,29koa litzateke.

Adibide horretan, 7 entitate baldin baditugu, bakoitza kolore batetan, bataz besteko haztatuak %2,29 izaten jarraitzen du.

Baina IRPHak ez du entitate bakoitzaren pisua neurtzen, eta guztiei pisu berdina ematen die. Gure adibidean, ondorengo hau da argazkia, eta bataz bestekoaren emaitza %3,93 litzateke.

Bistan denez, %3,93 batek ez du merkatuaren errealitatea adierazten, hipoteken %97a interes tipo baxuagoetan baitago.

IRPHa haztatu gabeko bataz bestekoa baino altuagoa dela azaltzen jarrai genezake, kaltetuok birritan ordaintzen ditugun komisioak barne dituelako. Eta bere kalkuluak beste irregulartasun batzuk ere badituela edota entitateek emaitzan oso erraz eragin dezaketela ere azaldu genezake. Baina ez dizuegu denbora gehiago kendu nahi, azken finean guk ordaintzen dizuegu eta.

Adeitasunez,

IRPH Stop Gipuzkoa

IRPH aplikatzeagatik Kutxabanken aurkako sei zigor berri

macroj_recuento

30 SALAKETA EPAIAREN ZAIN GERATU ETA ASTE BETE BAKARRIK PASA DENEAN IRITSI DIRA LEHEN EPAIAK

HEMENDIK AURRERA KUTXABANKen AURKAKO ZIGORRAK ETENGABE ETORRIKO DIRA

GIPUZKOAN 15.000 FAMILIATIK GORA DAGO EGOERA BERDINEAN

IRPH STOP GIPUZKOA ELKARTEAK XABIER ITURBERENDIMISIOA EXIJITZEN DU

Donostia, 2014-11-18

Gaur ezagutu dira pasa den azaroaren 10ean epaiaren zain geratu ziren 30 salaketatik seiri dagozkien epaiak. Salaketa guztiak Kutxabanken aurkakoak dira, IRPH aplikatzeagatik.

Sei kasuetan justiziak ebatzi du IRPH aplikatzea legediaren aurkakoa dela, eta Kutxabank zigortu du atzerako eraginez IRPHren arabera ordainduriko kuota guztiak berriz kalkulatu eta salaketa jarri dutenei «bidegabe kobraturikoak itzultzera».

Gaurko sei hauekin jadanik bederatzi dira IRPH Stop Gipuzkoa elkartearen talde juridikoak, Maite Ortiz eta José María Erauskinek zuzenduta, lortu dituen epaiak. Eta argi dago datozen egunetan epai gehiago etorriko direla, 33 izan arte.

Baina Gipuzkoan 15.000tik gora izan daitezke egoera berdinean dauden familiak, eta beraz Kutxabankek guztiei bidegabe kobratu dizkien interesak itzultzea onartzen ez badu epaitegiek salaketekin gainezka egingo dute.

IRPH Stop Gipuzkoa elkartetik PNV, PSE eta PPri erantzukizunez joka dezaten dei egiten diegu, Kutxabanken duten botereaz abusu honi amaiera eman diezaioten, kaltetuoi euren dirua itzuliaz.

Gainera, Xabier Iturbek dimisioa eman dezan exijitzen dugu, IRPHarekin egin duen kudeaketagatik, nahiz eta bere esanetan kudeaketa hau «bikaina» izan. Xabier Iturbe gipuzkoar guztiok helburu sozialekin sortu genuen aurrezki kutxa hiritarrok epaitegietara eramatera behartzen gaituen entitate bihurtzearen errudun da. Eta epaitegietan jasotzen ari den zigor sortak ez dio dimisioa beste irtenbiderik uzten.

IRPH Stop Gipuzkoa elkarteak finantza-entitate guztiek IRPH guztiekin kalteturiko familia guztientzat justizia exijitzen dugu.

Posible da.

IRPH aplikatzeagatik Kutxabanken aurkako 30 salaketak, epaiaren zain

141110macrojuicio

IRPH aplikatzeagatik Kutxabanken aurkako 30 salaketak epaiaren zain geratu dira gaur. Hauxe da agerraldian irakurri dugun komunikatua:

IRPHari ETA KUTXABANKEN KUDEAKETARI MAKROEPAIKETA

30 SALAKETA KUTXABANKEN AURKA IRPH APLIKATZEAGATIK

KALTETURIKO FAMILIEK XABIER ITURBEREN DIMISIOA EXIJITZEN DUTE, ETA PNV, PSE ETA PPri GALDETZEN DIETE ZENBAT EPAI BEHARKO DIREN

Donostia, 2014-11-10

IRPHa abusuzko erreferentzia indize bat da, milaka familiaren ekonomian eragin oso kaltegarriak dituena eta kasu askotan etxegabetzea ere ekarri izan duena.

Kutxabankek IRPH Entidades aplikatzen jarraitzen du, batez ere babes ofizialeko etxebizitzen maileguetan. Gainera, IRPH Cajas aplikatzea ahal duen guztia luzatu du. Aldaera hau orain dela urte bete baino gehiago desagertu zen baina Kutxabankek duela egun gutxi arte aplikatu du. Horretarako, Kutxabankek erakundeetatik jaso dituen deialdiei entzungor egin die.

Gasteizko Legebiltzarrak, Gipuzkoako Batzar Nagusiek eta hogeita hamar udaletxe baino gehiagok duela urte bete baino gehiago eskatu zioten Kutxabanki IRPHa aplikatzeari uzteko, baina Xabier Iturbe nahiago izan du muzin egitea. Eskaera hau Gipuzkoako Foru Aldunditik eta Donostiako Udaletik ere iritsi zaio, biak ere Kutxaren erakunde sortzaile direlarik, eta beraz Xabier Iturberen kudeaketaren axolagabekeria nabaria da.

Kutxabankek IRPH aplikatzea immorala da beraz, eta orain legez kanpokoa ere badela frogatu ahal izan dugu. Hiru dira dagoeneko gure talde juridikoak, Maite Ortiz eta José María Erauskinek zuzenduta, lortu dituen epaiak. Hiru kasuetan justiziak ebatzi du IRPH aplikatzea legediaren aurkakoa dela, eta Kutxabank zigortu du atzerako eraginez IRPHren arabera ordainduriko kuota guztiak berriz kalkulatu eta salaketa jarri dutenei «bidegabe kobraturikoak itzultzera».

Gaur epaitegi hauetan IRPH Stop Gipuzkoa elkarteko kideok Kutxabanken aurka jarri ditugun 30 salaketei dagozkien aurretiko bistak ospatuko dira. Beraz laster ez dira 3 izango Kutxabank zigortzen duten epaiak, 33 baizik.

30 familia hauetariko 29ri dagoeneko Euribor+1 aplikatzen digute IRPH Cajas indizearen ordezko bezala, baina gure maileguan zehar IRPHaren aplikazioarekin lapurtu diguten guztia itzultzea exijitzen dugu. Horixe da epaitegiek dagoeneko hiru aldiz ebatzi dutena.

Bestalde, gure adiskide Marianek IRPH Entidades aldaeraren aplikazioa bertan behera uztea exijitzen du, hau ere abusuzkoa baita. Gainera, indize honi esker Kutxabankek Marian eta bere hiru seme-alabei Donostian duten babes ofizialeko etxebizitza lapurtzeko bere asmoa lortzeko arriskua dago.

Gaurkoa, beraz, IRPHaren aurkako makroepaiketa bat izango da, baina baita Xabier Iturberen eta IRPHarekin egin duen kudeaketaren aurkakoa ere. Xabier Iturberen ustez kudeaketa hau «bikaina» da. Xabier Iturbe gipuzkoar guztiok helburu sozialekin sortu genuen aurrezki kutxa hiritarrok epaitegietara eramatera behartzen gaituen entitate bihurtzearen errudun da. Eta epaitegietan jasotzen ari den zigor sortak ez dio dimisioa beste irtenbiderik uzten.

PNV, PSE eta PP, Kutxabanken kudeaketaren erantzule politiko direnak, lapurreta honen errudun dira baita ere, eta sinesgaitza badirudi ere IRPH defendatzen jarraitzen dute. Pasa den astean hiru alderdi hauek berriz ere botoak elkartu zituzten Gipuzkoako Batzar Nagusitan, IRPHaren kaltetuontzako justizia eskatzen zuen ebazpen bat onartua izan ez zedin. PNV, PSE eta PPk argitu beharko lukete zenbat epai behar dituzten amore eman eta kaltetuok zigortzeari utzi diezaioten. Gipuzkoan hamar milatik gora eta estatuan milioitik gora garen familia kaltetuoi hain zuzen ere.

Gaur hemen gauden 30 familiok finantza-entitate guztiek IRPH guztiekin kalteturiko familia guztientzat justizia exijitzen dugu. Eta justizia hori lortzeko epaitegietara jo beharra izaten azkenak izan nahi dugu.

Posible da.

Macroepaiketa IRPHari. Denok Donostiara!

Astelehenan Donostiako epaitegietan IRPH aplikatzeagatik Kutxabanken aurka jarritako 30 salaketen inguruko bistak ospatuko dira.

Familia horietatik 29-k IRPH Cajas zuten eta dagoeneko Euribor+1 aplikatzen zaie, baina lapurtutako guztia itzultzeko eskatzen dute, Kutxabank zigortu duten hiru epaiek dagoeneko ezarri duten bezalaxe.

Familia hauek exijituko dute euren dirua itzultzeko epaitegietara jo behar izaten azkenak izatea, eta Xabier Iturbe Kutxako presidentearen dimisioa eskatuko dute, bere kudeaketa tamalgarria baita.

Gainera, Marianen kasua ere aztertuko da: Kutxabankek IRPH Entidades aplikatzen dio oraindik ere, eta babes ofizialeko etxebizitza gal dezake. Berak ere indizia baliogabetzea eskatzen du.

Zatoz borroka hau babestera. Epaitegien aurrean elkarretaratzea eta prensaturrekoa ospatuko ditugu.

Eguna: astelehena, azaroak 10
Ordua: 9:30
Lekua: Donostiako Epaitegiak (Teresa de Calcuta plaza)

PNV=PSE=PP troikak IRPHa babestu du Batzar Nagusitan

PNV=PSE=PP troikak gaurko Gipuzkoako Batzar Nagusitako Osoko Bilkuran IRPH Entidades indizea bertan behera utzi eta IRPH guztiekin entitate guztiek kaltetu guztioi lapurtu diguten guztia itzultzearen aurka bozkatu du.

Aretoan ginen kaltetuenganako euren sentsibilitatearen neurri garbia da erakutsi duten kezka bakarra: gu saioa grabatzen ari ote ginen.

Hau da argitara eman dugun prentsa-oharra:

EPAI-ZAPARRADAREN ERDIAN BATZAR NAGUSIEK IRPHaren KALTEA JASAN DUTEN FAMILIEKIN JUSTIZIA EGITEA BAZTERTU EGIN DUTE

DAGOENEKO HIRU DIRA IRPHa BALIOGABETU ETA KUTXABANK ZIGORTU DUTEN EPAIAK

LAISTER 33 IZANGO DIRA

Donostia, 2014-11-5

Gipuzkoako Batzar Nagusiek EH Bilduren ebazpen proposamen bat eztabaidatu dute gaur, non entitate finantzario guztiei eta bereziki Kutxabanki eskatzen zitzaien IRPHa aplikatzeari utzi eta Euribor+1 indizearekin ordezkatzeko, atzerako eraginez. Proposamena PNV, PSE eta PPren botoekin baztertua izan da.

Eztabaida IRPHa baliogabetu duen hirugarren epaia ezagutu eta hurrengo egunean iritsi da. Hirugarren epai honek ere IRPHa baliogabetzeaz gain Kutxabank zigortu du indize honen arabera bidegabe kobraturiko interes guztiak itzultzera.

Gainera, datorren astelehenean, hilak 10, IRPH Stop Gipuzkoa elkarteko kideek jarritako 30 salaketei dagozkien aurretiko bistak ospatuko dira, eta beraz laster 33 izango dira IRPHa baliogabetzen duten epaiak.

Elkarte honek PNV, PSE eta PPren jarrera baztertzen du. Jakin nahiko genuke zenbat epai beharko diren IRPHak kaltetutako familia guztiekin justizia egin dadin. Ez da bidezkoa egoera berdinean dauden dozenaka milaka familiek epaitegietara jo beharra izatea lapurtu zaiena itzultzea lortzeko, eta horixe da PNV, PSE eta PP-k babesten dutena Batzar Nagusitan eta Kutxabanken aginte organoetan duten jarrerarekin.

Gaur egun IRPH Cajas indizeari loturiko Kutxabanken hipoteka guztietan kontratuak egintzen duen Euribor+1 ordezko indizea aplikatzen da. Kutxak ordezkatze hau legediak utzi dion guztia atzeratu du, horretarako erakunde publikoetatik jaso dituen deiei muzin egin behar izan badie ere. Gasteizko Legebiltzarrak, Gipuzkoako Batzar Nagusiek eta Kutxaren sortzaile diren Gipuzkoako Foru Aldundiak eta Donostiako Udaletik jaso zituen dei hauek, besteak beste. Edozein modutan, kaltetuek, eta baita justiziak ere, uste dute IRPHa aplikatzea abusuzkoa izan dela maileguaren hasiera unetik beretik, eta ondorioz interesak itzultzea dela bidezkoa.

IRPH Entidades delako indizeari dagokionez, indarrean jarraitzen du nahiz eta hau ere abusuzkoa izan, eta Kutxabankek aplikatu egiten du, batez ere babes ofizialeko etxebizitzen maileguetan.

PNV, PSE eta PPren botoekin baztertua izan den EH Bilduren ebazpen proposamena oso egokia zen, IRPH guztiak (IRPH Entidades delakoa barne) bertan behera utzi eta entitate finantzari guztiek IRPH aldaera guztiekin kaltetu guztiei kobraturiko interes guztiak itzultzeko eskatzen baitzuen.

IRPHa baliogabetzen duen hirugarren epaia

hirugarrena

Gaur, 2014ko azaroaren 4ean, IRPHa baliogabetzen duen eta banketxea bidegabe kobraturikoak atzerako eraginez itzultzera zigortzen duen hirugarren epaia ezagutu dugu.

Berriz ere Kutxabank-en hipoteka bat da, eta epaia Abogados Res despatxoak lortu eta argitaratu du. Bufete honetan egiten dute lan Maite Ortiz eta José María Erauskin abokatuek, gure elkarteari musu-truk laguntzen diotenak.

Hiru dira epaiak, eta datorren astelehenean, azaroak 10, Kutxabanken aurka arrazoi berdinekin elkarte honetako kideok jarri genituen 30 salaketen aurretiko bistak ospatuko dira. Beraz laster 33 izango dira epaiak.

Galdera da: zenbat epai beharko dira IRPHaren edozein aldaeraren kaltedun guztioi lapurturikoa itzultzeko epaitegietara jo beharrik izan gabe?

Bihar, azaroak 5, Gipuzkoako Batzar Nagusitan EH Bilduren ekimen bat eztabaidatuko da. Bertan IRPHaren aldaera guztiak bertan behera utzi eta banketxe guztien IRPH guztien kaltetu guztiei lapurturikoa itzultzeko eskatzen da, epaitegietara jo beharrik gabe. PNV, PSE eta PPri dei egiten diegu ekimenaren alde bozka dezaten.