Egilea: admin

Kutxaren aurkako salaketa, kontratua ez betetzeagatik

Telenorte: ikusi 5:30 minutua

Beste batzu: El Diario Vasco, Noticias de Gipuzkoa, Gara, Irutxuloko Hitza, El Mundo

Gaur goizean, Donostiako epaitegietan, gure adiskide Jose eta Susanak salaketa jarri dute Kutxabanken aurka beraien maileguaren kontratuko Hirugarren Bis klausula ez betetzeagatik. Plataforma honek eta Kaleratzeak Stop-ek babestuta egin dute, eta poliziek inguratuta, TVE-ren bideoan dakusagunez (ez, ETB ez da joan)

Beraien mailegua, eta Kutxaren biktimon gehiengoarena, IRPH Cajas indizeari lotua dago (orain %4 inguruan dagoen indizea), eta aipaturiko klausulak ezartzen du IRPH Cajas desagertuko balitz ordezkoa Euribor+%1 izango dela (euriborra %0,50-n dago), operazioaren bizitza osoan.

Bi dira Kutxabanken ez betetzeak…

1.- Klausulak ezartzen badu IRPH Cajas desagertu ezkero euribor gehi batekin ordezkatuko dela, eta IRPH Cajas azaroaren 1ean desagertu baldin bada behin betiko, ez dago zalantzarik ordezkatzea azaroaren batean bertan egin behar dela, eta ez azaroaren bataren ondorengo hurrengo rebisioan, ez baita hori maileguaren klausulak dioena. Eta ez da aitzakia gobernuko alderdiak indize kriminal hau hurrengo rebisiora arte lutzatzea uztea, zeren eta aldeen arteko akordiek lege indarra dute, eta alderdi, gobernu eta ganbera ororen borondate politikoaren gainetik daude.

2.- Klausulak dio, gainera, ordezkatzea operazioaren bizitza osorako izango dela. Ez dakigu ze intentzio edo aurreikuspen zituen Kutxak klausula hori inposatu zuenean, baina ordezkatzearen eragina operazioaren bizitza osorako izango zela jarri baldin bazuen, horrek esan nahi du operazioaren bizitzaren haseratik ordainduriko guztia aztertu beharko dela, eta IRPH Cajas indizeari lotuta eginiko ordainketa bakoitza berriz kalkulatu beharko dela, euribor gehi baten balioari lotuta.

Operazioaren bizitza osoan ez du esan nahi operazioaren hemendik aurrerako bizitzan, edo hurrengo kuotatan, edo bukaera arteko denbora epean. Ez, ez, operazioaren bizitza osoan sinatu zenetik bukatu arte da, eta ez dugu onartuko Kutxako magoek ezer aldatzerik.

Hilabete luzetan, ordezkatzea eskatzera joan garenean Kutxan esan digute ondo irakurtzeko, oso garbi zegoela, letra txikia irakurtzen ikasi behar genuela. Ba horixe egin dugu, guztia oso ondo irakurtzen ikasi dugu, eta ikaste horretan konturatu gara inposatu ziguten klausula horrek dioela ordezkatzea operazioaren bizitza guztiari aplikatu behar zaiola, beraz orain zuek zarete, Kutxabankeko jaunandreok, klausulak dionea ongi irakurtzen ikasi behar duzuenak. Are gehiago zuek inposatutako zerbait denean, %5-eko euribor batekin diru mordoa egiteko aurrikupsenarekin, eta orain euriborra 0,25era jeitsi daitekeela dakusazeue, eta kaltetuoi dirua itzuli beharko diguzuela.

Kutxaren txantxak

mailegua
360

Goian, zenbait kaltetuk etxean jaso duguna: mailegu bat eskeintzeko gutuna igorri digute. “Informazio guztia izateak ematen duen segurtasuna” eskeintzen dute. Nork eta Kutxak. Gure arazoarekin joan garen bakoitzean “ez dago nobedaderik, ez dakigu ezer, itxarotea besterik ez dago” bezelakoak jaso ditugunean, eta IRPHaren inguruan inongo informaziorik sekula igorri ez digunean. Sekula ez! Jakina, nahiago dituzte biktima informatu gabeak…

Behean, kaltetu bati egin dioten eskeintza: kontratuak ezartzen duen Euribor+%1 aplikatu beharrean, %3,6 fijo bat eskeintzen ari dira, maileguaren hemendik aurrerako bizitza osorako. Orain, euriborra are gehiago jeitsiko dela dirudienean, ez da oso eskeintza erakargarria. Kaltetu honek eskeintza idatziz ematea eskatu du, ondo aztertzeko, eta hara hor zer eman dioten!!

Atentzioa eman digu bestalde eskeintzen duten mailegu horretan abusibotzat hartzen diren bi baldintza ezartzen jarraitzen dutela:

Batetik, %19ko berandutza interes-tasa. Badaude epaiak horrelako interes-tipo altuak abusibotzat eman dituztenak (adibidez, BBVA-aren aurkako bat Arrecifen, %19ko interes tasa abusibotzat hartuta hipoteka bat anulatu zuena)

Bestetik, 30 eurotako komisioa posizio zordunak erreklamatzeagatik. Espainiako Bankuaren 8/1990 zirkularraren Hirugarren arauaren 3.atalaren aurka doa, eta baita ministeritza-agindu baten aurka ere.

Begiratu hemen zure hipotekan egon daitezken klausula abusiboak nola detektatu. Kutxarekin baldin baduzu hipoteka, aurreratzen dizugu bat baino gehiago dituzula. Eta bide beretik jarraitzen dute. Kontuz ibili jende honekin! Ez dute lotsarik eta arriskutsuak dira.

“Toda la vida” bizitza osoa delako

Halaxe da. “Toda la vida” bizitza osoa da, ez gehiago, ezta gutxiago ere, eta beraz berri txarrak ditugu Kutxarentzat:

PRENTSA-OHARRA JOSE ESTA SUSANAK KUTXABANKEN AURKA KONTRATUA EZ BETETZEAGATIK AURKEZTURIKO DEMANDAREN INGURUAN

Datorren asteazkenean eguerdiko 13:30tan, Donostiako epaitegietan, gure adiskide Jose eta Susanak Kutxabanken aurka demanda aurkeztuko dute kontratua ez betetzeagatik, hain zuzen ere beraien hipoteka-maileguaren Hirugarren Bis klausula ez betetzeagatik.

Salaketa Gipuzkoako Kaleratzeak Stop plataformaren talde juridikoak prestadu du, Maite Ortiz eta José María Erauskin abokatuen zuendaritzapean, eta bertan eskatzen da dagoeneko desagertua den IRPH Cajas indizea euribor gehi batekin ordezkatua izatea pasa den azaroaren batean hasita, aipaturiko klausulan jasoa dagoen bezala. Era beream eskatzen da ordezkatze honek bere ondorio guztiak eman ditzala mailegua sortu zen une beretik, aipaturiko klausularen azken zatian ezartzen den bezala.

Jose eta Susanaren hipoteka-maileguaren Hirugarren Bis klausulak, eta beste kaltetu guztionak ere bai, honelaxe dio…

“Para el caso de que desaparezca en un futuro el precitado tipo de referencia, las partes acuerdan que el nuevo tipo de interés sustitutivo será, en todos los casos, el resultante de incrementar al EURIBOR un MARGEN de 1,000 puntos porcentuales de interés, durante toda la vida de la operación”

…eta ondorioz ulertzen dugu IRPH Cajas delakoa euribor gehi batekin ordezkatzeko momentua derrigorrez azaroaren lehenak izan behar duela, hauxe baita bere guztizko desagertzerako ezarririko data, eta ez maileguaren hurrengo rebisioa, Kutxabankek nahi duen bezala.

Behin ordezkatzea eginda, honek ez ditu bere ondorioak maileguaren hemendik aurrerako bizitzan bakarrik izango bazik eta, atzera eragineko efektuz, ordezkatze honek bere ondorioak operazioaren bizitza guztiaren gainean izango ditu, Hirugarren Bis klausulan argi eta garbi jasotzen den bezala.

Prentsa-ohar hau deskargatu dezakezu, hemen.

Kutxa epaitegietara, gure kontratua ez betetzeagatik

justicia

Kutxak ez zigun IRPH sekula aplikatu behar. Klausula abusiboa dela defendatzen dugu, eta beraz baliogabea ondorio guztiekin. Hori dela eta Kutxaren aurkako salaketa bat jarria dago (eta tramitera onartua izan da) eta gure helburua familiei lapurtutako diru guztia itzultzea da.

Behin IRPH-a sartu zigutela, Kutxak egin zezakeen minimoa 2009an kentzea zen (orain dela lau urte), Europak esan zuenean IRPHa desagaertarazi beharra zegoela, gardentasun faltagatik. Edo 2011n, estatu espainolak ezabatzea onartu zuenean. Edo 2012an, gardentasun agindua indarrean sartu zenean, edo 2013ko apirilean, luzapena agortu zenean… Baina ez du egin.

Eta horrela iritsi gara azaroaren 1era, eta IRPH Cajas ofizialki desagertu da. Hortaz, gure kontratuek aurreikusten duten baldintza eman da, eta bertan adosturiko ordezkoa (Euribor+%1) aplikatu behar zigun Kutxak azaroaren 1ean hasita. Ez dio axola PPren legeak hurrengo rebisioan aplikatzea esatea. Gure kontratua horren gainetik dago.

Horregatik, eta IPRHa klausula abusibotzat eta baliogabetzat hartzeari uko egin gabe, berehala ordezkatzea exigitu behar dugu, familia askok ezin baitute denbora gehiagoz jasan. Azaroaren 1z geroztik garbi dago Kutxa kontratua ez betetzen ari dela, eta horregatik salaketa jarriko diogu. Hau eta beste hainbeste injustizia geratzeko lanean musutruk dabiltzan Kaleratzeak Stop-eko abokatuek eramango dute kasua.

Zatoz salaketa hau babestera: asteazkena, azaroak 13, eguerdiko 13:30tan Donostiako Epaitegietan (Atotxan, Teresa de Calcuta Plaza, 1). Hauxe da gure aukera. Zatoz!

Batzar Nagusietan azaroaren 6an gertaturikoen inguruan

Bideoan ikus daitekeenez, gure agerraldia kalean egin izan behar genuen. Aurreko berrietan azaldu dugun bezala, PNV, PSE eta PP alderdiek lortu zuten kaltetuok egoitzara sartzeari betoa jartzea. Gertakizun benetan larria da. Bideoan azalpenak ematen dituztenak: Bildu eta Aralar batzarkide taldeen izenean hitz egin duen batzarkidea, gure elkarteko kidea eta Kaleratzeak Stop-eko abokatua.

Eta barruan zer gertatu zen? PNV, PSE eta PP-k atzera bota zuten Bildu eta Aralarren proposamena, eta PNV eta PSE-k aurrez adosturikoa onartu zuten.

– PNV eta PSEren testuarekin ados al gaude?

Bai, guztiz. Hauxe da, eta bere bigarren puntuan garbi eskatzen zaio Kutxabanki Euribor+1 aplikatzeko berehala, eta azaroaren 1a igaro denez ez aplikatzea bidegabea dela esaten da. Guk ezingo genuke hobeto adierazi.

– Zein da orduan arazoa?

Arazoak bat baino gehiago dira:

PNV eta PSE-ek ez zuten Bildu eta Aralarren proposamena onartu nahi izan. Hauxe da, eta funtsean berdina eskatzen du. Zer da orduan PNV eta PSE-k gustoko ez dutena? Ez dute gustoko Kutxabanken izena agertzea; beraiek nahiago dute “entitate finantziaroak” erabili. Ados. Era berean, ez dute gustoko Kutxaren Administrazio Kontseiluari dei zuena egitea.

Eta azken hau zergatik ote da?… ba hauxe da hurrengo arazoa, eta jendillaje honen benetako izaera agerian uzten duena: PNV eta PSE-k Kutxaren Administrazio Kontseiluan dituzten ordezkariek guztiz aurkakoa defendatzen dute. Bai, ondo diogu: Batzar Nagusitan, eta Gasteizko legebiltzarrean, eta udaletxetan, eta Facebooken ere bai, eta Twitter-en… eta txalapartaz ere bai akaso… horietan guztietan Kutxari eskatzen diote, aizu, aplikatu Euribor+1 eta utzi IRPH! Baina iristen da Kutxaren Administrazio Kontseiluaren bilera eta alderdi politiko berberek, PNV eta PSE-k, esaten dute: ea bada, segi dezagun IRPH aplikatzen gizarajo hauei. Egin dezagun barre kaleratzeko arriskuan dauden familien lepotik. Hori da hipokrita hauek antzezten duten papela.

Bildu eta Aralarren testuan zetorren beste puntu guztiz logikoa, eta PNV eta PSEk gustoko ez dutena, hau ere mundiala: proposatzen zen Batzar Nagusiek Kutxaren Administrazio Kontseiluan duten ordezkariari eskatzea Batzar Nagusien iritzia eta nahia defendatzeko, eta hortaz IRPHaren aurka egiteko Kutxan. Bada ez, hori ere ez dute gustoko PNV eta PSEk, eta kendu egin dute. Ze logika du honek? Ordezkari horren izena Jon Jauregi Bereziartua da, PNVkoa da, Beasaingo alkate ohia, * * * [edukia ezabatua izan da] * * *. Markel Olanok ordezkatu zuen hautagaitzan. Ba lasai utzi nahi dute antza, bere eserlekuan jarrita, IRPHa defendatuz. Gure aldetik, Kutxaren hurrengo bileran Batzar Nagusiek eskatutakoa defendatzen ez badu, dimisioa eman dezala eskatuko dugu.

Hauexek dira bada, PNV eta PSE-ren mixeriak. Eta hortik aurrera, komunikabideetan irakurri dugunez (ezin baikenuen sartu izan, ez zuten lekukorik nahi….) ba zeharo haserre agertu ziren, gizarajoak, iraindu egin omen ditugu, mehatxatu, hertsatu… eta “kondena” eske jardun omen ziren. Nazkagarriak. Milaka familia hipotekari aurre egin ezin eta etxebizitza galtzeko arriskuan, eta beraiek ergelkeriatan. Eta aldrebeskeria honek guztiak animatuta edo, PPkoek honakoa esan omen zuten: tamalgarria zela guztien adostasuna lortu ez izana, guztiok arduratzen gaituen gaia delako eta pose politiko bat baino gehiago merezi duelako. Pailazokeria bat dela esango genuke, baina pailazoek barre eragiten dute eta hauek berriz, negarra.