Kategoria: IRPH

PNV, PSE eta PPk ez dute nahi IRPHak kaltetutakooi lapurtutakoa itzultzerik

love

Gure aurreko berrian ezagutzera eman genuen bezala, ostegun honetan, abenduak 18, Donostiako udalbatzak IRPHa eztabaidatuko du. IRPHaren kaltedunoi gure dirua epaitegietara jo beharrik izan gabe itzultzeko eskatzen duen mozioa aurkeztu du EH Bilduk. Kutxabank indize honen arabera kobraturikoak itzultzera zigortzen duten epaiak 30etik gora diren honetan, bidezkoa familia guztiak epaitegietara jotzera ez behartzeko eskaera hau egitea.

Baina proposamen hau ez da PNV, PSE eta PPren gustukoa, eta emendakinak aurkeztu dituzte lapurturikoa itzultzeko eskaera ezabatuaz. Beraz, PNV, PSE eta PPk ez dute nahi IRPHak kaltetutakooi gurea dena itzultzerik. Beraiek jakingo dute arrazoia. Eta azaldu egin beharko dute, batez ere hauteskundeak hain gertu izanda.

Euren emendakinetan, PNV, PSE eta PPk arreta desbideratu nahi dute.

PNV eta PPren emendakin bateratuan, Eneko Goia eta Ramón Gómezek diote badaudela ordezkoa aplikatzen ez duten entitateak. Guk ez dugu kasu bat bera ere ezagutzen, eta beraz ez dugu uste udalbatzak hori aztertu behar duenik. Bigarren puntuan, ordezkoa aplikatzearen datarekin bazterrak nahastu nahian darraite, jakinik dagoeneko ez duela garrantzirik ordezkoa 2013ko azaroan edo 2014koan aplikatu, ze orain dagokiona IRPHaren arabera hipotekaren bizitza osoan ordainduriko kuota GUZTIEI atzerako eraginez aplikatzea baita.

PSEk berriz Ernesto Gascok sinaturiko emendakina aurkeztu du, bazterrak nahasteko bere nahian alderdi hau berriz ere barregarri uzten duena. Hasteko, diputatuen kongresuari eskatzen dio 14/2013 legea argitzeko. Orain legearen gaineko zalantzekin? Ba kongresuari argibideak Odón Elorzaren bidez eska ditzatela (bertan egon dadin ordaintzen baitiogu), eta ez udaletxean.

Baina onena bigarren puntuan dator, lehenbiziko puntuaren arabera ulertzen ez duten lege hori berehala aplikatzeko eskatzen baitute. Sinestezina.

Edozein modutan, PNV eta PPren estrategia berdina darrai PSEk ere: ordezkatzearen dataz hitz egin, garrantzitsuena ahaztuaz, lapurturikoaren itzultzea alegia. Eta hori jatorrizko mozioan oso garbi eskatzen den zerbait da.

Horregatik, PNV, PSE eta PPren zinegotziei dei egiten diegu euren emendakinak baztertu eta jatorrizko mozioa babes dezaten, dagoeneko 30 baino gehiago diren epaiek ezarri bezala bidegabe kobratu dizkigutenak itzultzea eskatuaz.

Donostiako udalbatzak IRPH-a eztabaidatuko du

irph-donos

Donostiako udalbatzak abenduaren 18an, ostegunez, EH Bilduk proposaturiko mozio bat eztabaidatuko du. Mozioak proposatzen duena hauxe da:

Donostiako Udalak eskatzen die Kutxabanki eta haren antzera jokatzen ari diren gainontzeko finantza erakundeei lehenbailehen itzultzeko, IRPH indizea legez kontra aplikatzeagatik, Donostiako eta lurralde osoko bezero guztiei gehiegi ordainarazitako zenbatekoak, hauek epaitegira jotzeko zain egon gabe.

Hogeita hamarretik gora dira Kutxabank IRPHaren arabera «bidegabe kobraturikoak itzultzera» zigortu duten epaiak, eta bistakoa da salaketa jartzea erabaki (eta ahal) duen orok emaitza berdina izango lukeela. Nabaria da IRPHa aplikatzea abusua izan dela, eta Kutxabankek kalteturiko familia guztiei euren dirua itzultzea da logikoena, epaitegietara jotzera behartu gabe. Horixe da IRPH Stop Gipuzkoa plataformatik eskatzen ari garena, Xabier Iturberen dimisioarekin batera, bera baita zentzugabekeria honen erantzule.

Donostiako udaletxearen jarrera garrantzitsua da, Kutxaren erakunde sortzaileetako bat baita. 2013ko ekainean udalbatzak IRPHaren gaia eztabaidatu zuen, Kutxari indize hau aplikatzeari uzteko eskatzen zion PSEren mozio baten harira. Udalbatzak aho batez onartu zuen testua, EH Bildu, PSE, PNV eta PPren bozekin, baina jakina denez banketxeak IRPHa aplikatzen jarraitu du.

Ordutik igaro den urte eta erdian, EH Bilduk IRPHaren aurkako jarrera hau ordezkaritza duen foro guzti-guztietan mantendu du, Kutxaren administrazio kontseilua barne.

PSEk mozio berdina beste hainbat udaletxetan bultzatu zuen, baina fartsa bat antzezten eta kaltetuoi burla egiten ari zen, Kutxaren administrazio kontseiluko PSEren ordezkariek beti bozkatu baitzuten IRPHa aplikatzen jarraitzearen alde. Itxurakeria honi buruz galdegindakoan, bere burua sozialistatzat aurkezten dutenek beti beste alde batera begiratu izan dute, Ernesto Gasco eta Enrique Ramos-en txio hauetan ikus daitekeenez.

twitter_pse

Baina ez izan zalantzarik: José Miguel Martín Herrera PSEk Kutxaren administrazio kontseiluan zuen ordezkariak IRPHaren alde behin eta berriz eman zuen bozkak bere alderdiaren babes osoa zuen. Horren froga argia da orain dela gutxi, Kutxaren administrazio kontseilua deuseztatu dutenean, PSEk berriz ere kolokatu duela Kutxa banku-fundazioaren patronatuan. IRPHaren aldeko bozka kriminalak PSEren babes osoa du.

PNVri dagokionean, antzeko zerbait gertatzen da. IRPHaren aurkako mozioa babestu zuen Donostian eta beste hamaika udalerritan (kasuren batean PNV bera izan zen mozioa sartu zuena), baina bera da Kutxa eta Kutxabankek eskaera hauei entzungor egin izanaren erantzule zuena, bankua kontrolatzen baitu. Eta IRPHaren aleko euren politikan ondoan izan dituzte beti PSE eta PP, eta baita CCOO eta Pixkanaka sindikatuak ere.

Donostiako PP-k ere babestu zuen 2013ko ekainean IRPHaren aurkako mozio hura, agian PSE eta PNV antzezten ari ziren antzerkiak animatuta. Hala ere, PP-ren alde esan behar da zenbait udalerritan IRPHaren aldeko euren jarrerarekin koherentziaz mozioa babestea baztertu zutela.

Ikus dezagun zer egiten duten laster boto eske etorriko diren lau alderdiek abenduaren 18an.

Abenduaren 20an, pobreziaren aurkako manifestazioa

convoc_mani_dic

Gipuzkoako Kaleratzeak Stop eta IRPH Stop plataformek, Donostiako Zero Pobrezia, Duintasuna, GEPE eta Donostiako koordinadora feministarekin batera, agerraldia egin dugu gaur, urtero legez pobreziaren aurka abenduan egingo dugun manifestazioa aurkezteko. Aurten abenduaren 20an izango da, 12tan Donostiako bulebarretik abiatuta.

Manifestazioaren leloa honako hau da: “Pobrezia eta berdintasun ezaren eta bere errudunen aurka: banketxe eta multinazionalen elite bat eta euren zerbitzura dauden gobernu ustelak”

Plataformok manifestazioaren kartela eta komunikatua aurkeztu ditugu, eta herritarrei dei egin diegu mobiliza daitezen. Gainera, gainontzeko eragile sozialei, sindikatuei eta alderdi politikoei dei egin diegu manifestaziorako deialdiarekin bat egin dezaten.

Gipuzkoatik kanpo IRPHa baliogabetu duen lehen epaia

justicia-irph

GIPUZKOATIK KANPO IRPHa BALIOGABETU DUEN LEHEN EPAIA

GUADALAJARAKO MERKATARITZA ARLOKO EPAITEGIAK KUTXABANK ZIGORTU DU

ARGUDIO JURIDIKOAK SENDOAK DIRELA FROGATZEN DA, ETA BERAZ ENTZUTEGI PROBINTZIALAK GIPUZKOAKO EPAIAK BAIEZTATZEA ESPERO DA

IRPH STOP GIPUZKOAREN TALDE JURIDIKOAK ERAMAN DU KASUA, BEREZIKI KALTETUTAKO FAMILIA BATEKIKO ELKARTASUNEZ

Donostia, 2014-12-3

Guadalajarako Merkataritza Arloko Epaitegiak Gipuzkoatik kanpo IRPHa baliogabetzen duen lehen epaia eman du. Zigorturiko entitatea Kutxabank da kasu honetan ere.

Gipuzkoan hogeita hamar epaitik gora eman ondoren, epai berri honek erakusten du kaltetuek erabiltzen dituzten argudio juridikoak sendoak direla, jadanik bi epaitegik onetsi baitituzte. Horregatik, IRPH Stop Gipuzkoa elkarteak uste du entzutegi Probintzialak Gipuzkoan Kutxabanken aurka eman diren zigorrak berretsi egingo dituela.

Guadalajarako kasuan, Gipuzkoako guztietan bezalaxe, justiziak IRPHaren aplikazioa baliogabetu du eta Kutxabank zigortu du atzerako eraginez IRPHren arabera ordainduriko kuota guztiak berriz kalkulatu eta salaketa jarri dutenei «bidegabe kobraturikoak itzultzera».

Guadalajarako kasua IRPH Stop Gipuzkoa elkartearen talde juridikoak eraman du, bereziki kalteturiko familia batekiko elkartasunez, Kutxabankekin negoziatzea ezinezkoa zela ikusi ondoren.

Ángel Torrecillak lan istripu bat jasan zuen 2011an eta langabezian dago orduz gero. Bere bikotekideak %55eko elbarritasuna du eta bi seme dituzte, bata adingabea eta bestea %86ko elbarritasuna duena. Hipotekari aurre egin ezinda zebiltzala eta, Kutxabankekin negoziatzen saiatu ziren, eta etxea ordainetan emateko prest zeuden, baina Kutxabankek sekula ez du fede oneko zordunekin negoziatzen eta kasu honetan ere berdin jokatu zuen. Epaitegietan Kutxabank garaitzea lortu ondoren, familia honen egoera zertxobait hobetuko da.

Gipuzkoatik kanpo eman den lehen epai honekin, Donostian hogeita hamar epaitik gora eman ondoren eta Gipuzkoako Entzutegi Probintzialak epaiak berretsiko dituela dirudien honetan, IRPH Stop Gipuzkoa elkarteak uste du epaitegietako borroka irabazi duela jadanik, eta egoera berdinean dauden familiei euren dirua itzultzeko exijitzen dio Kutxabanki, epaitegietara jotzera behartu gabe.

Gainera, elkarteak Xabier Iturberen dimisioa eskatzen jarraituko du. Kutxabankek IRPHaren aplikazioa luzatu zuen hainbat erakunderen deiari entzungor eginez, hala nola Gasteizko Legebiltzarra, Gipuzkoako Foru Aldundia eta hogeita hamar udaletxe baino gehiago. Orain epaitegiek diote ez zuela sekula aplikatu behar abusuzko indize hau. Xabier Iturbek, IRPHaren kudeaketa «bikaina» egin zuela esatera ausartu zenak, dimisioa eman eta Kutxaren presidente izateari utzi behar dio berehala.

Kutxabanken irabaziak eta IRPHaren kaltedunei itzuli beharrekoa dirutza berdina dira

kutxabank100-100

KUTXABANKEK IRAGARRI DITUEN 100 MILIOITAKO IRABAZIAK IRPHaren KALTEDUNEI ITZULI BEHARREKO DIRUTZAREN PAREKOAK DIRA

SINESTEZINA DA KUTXABANKEN PRENTSA-OHARRAK ITZULKETA NOLA EGIN BEHAR DUEN EZ AZALTZEA

KUTXABANKEN PRENTSA OHARRAK KONTRAKOA ADIERAZI ARREN, IRPH ENTIDADES APLIKATZEN JARRAITZEN DU

Donostia, 2014-12-1

Gaur Kutxabankek argitara eman duen prentsa-oharraren arabera, iraila bitarteko irabaziak 100 milioitakoak izan dira. IRPH Stop Gipuzkoa elkarteak adierazi nahi du kopuru horixe bera dela Kutxabankek IRPHa aplikatu zien familiei itzuli behar diena.

Elkarteak gogorarazi nahi du Gipuzkoan Kutxabanken aurka hogeita hamar salaketatik gora jarri zituela eta kasu guztietan justiziak arrazoia eman diola. Ondorioz, IRPH aplikatzea legediaren aurkakoa dela ebatzi da, eta Kutxabank zigortu da salaketa jarri dutenei «bidegabe kobraturikoak itzultzera».

Epai hauek ebazten izan den azkartasuna, argudio juridikoen sendotasuna eta epailearen eskarmentu handia ikusita (Edmundo Rodríguez Achútegui magistratua da Araban), IRPH Stop Gipuzkoa elkarteak uste du Entzutegi Probintzialak epaia baieztatu egingo duela. Ondorioz, egoera berdinean dauden 15.000 familiei euren dirua itzultzeko exijitzen diogu Kutxabanki, epaitegietara jotzera behartu gabe.

Elkartearen kalkuluen arabera, Kutxabankek guztira itzuli beharko duen dirutza 100 milioi eurokoa izan daiteke hain zuzen ere.

IRPH Stop Gipuzkoak gogorarazi nahi du dirutza hau bidegabe kobratu duela Kutxabankek, abusuzko indize bat aplikatuaz. Kopuru hauek itzultzeak ekarriko duena da kaltedunek euren maileguen hasieratik Euribor+1 ordaintzea, eta beraz Kutxabankek familia hauekin irabaziak izaten jarraituko du.

Hala ere, dirutza hori itzultzeak Kutxabanken kontuetan eragin nabarmena izango du, 2014 urteko lehen bederatzi hilabetetako irabazien kopuru berbera baita. Horregatik, elkarteak uste du axolagabekeria ikaragarria dela Kutxabanken gaurko prentsa-oharrak ez azaltzea 100 milioi horiek itzultzeari nola egin behar dion aurre.

IRPH Stop Gipuzkoak berriz ere adierazi nahi du itzultzearen kondizioak negoziatzeko prest dagoela. Kaltetuak itzuli behar zaien diruaren zati bat edo guztia euren maileguak amortizatzera bideratzeko prest egon daitezke, modu honetan Kutxabanken diru-kutxatik atera beharreko dirutza txikiagoa izan dadin. Negoziazioak hasteko baldintza bakarrak hauek dira:

1- Xabier Iturbek dimisioa ematea.
2- Etxebizitza galdu duten IRPHaren kaltedunei etxea itzultzea.
3- Etxegabetuak izan diren guztiei zorra kitatu eta alokairu sozial batez euren etxeetara itzultzen uztea, nahiz eta IRPHaren kaltedun ez izan.

Bestalde, Kutxabanken prentsa-oharrak gizartea engainatu nahi duela salatzen dugu. Bezeroei jadanik IRPHrik ez diela aplikatzen sinetsarazi nahi du, esaten duenean «IRPH indizeen ordezkapena» «azaroaren 1ean erabat amaitutako eragiketa» dela.

Izan ere, IRPH Entidades delako aldaera aplikatzen jarraitzen duela salatu nahi dugu, eta hau ere abusuzkoa dela. IRPH Cajas aldaera da aplikatzeari utzi dion bakarra. IRPH Entidades aldaerari lotuta dauden Kutxabanken mailegu kopurua txikiagoa den arren, gehienak babes ofizialeko etxebizitzei dagozkienak dira, eta ondorioz egoera ekonomikorik kaxkarrenean dauden familiak dira Kutxabanken eskutik IRPHaren abusua pairatzen darraitenak.