Espainiako Auzitegi Gorenak jadanik jarri du data eta ordua tramitera onartu duen lehen IRPHaren baliogabetze kasua bozkatzeko: azaroaren 22an izango da, asteazkenez, goizeko 10:30tan.

Arabako kaltedun batek jarri zuen auzibideari dagokion kasua da. Kaltedun horrek, Maite Ortiz eta José María Erauskin abokatuen laguntzaz, Kutxabank IRPHarekin kobratu zizkion diru guztiak itzultzea zigortzea lortu zuen, IRPHa abusuzkoa izateagatik baliogabetu zuen epai batekin. Gasteizko Merkataritza-Arloko epaitegiaren epaia berretsia izan zen Arabako Probintzia Auzitegian (hemen eskuragarri duzun 85/16 epaiarekin),baina Kutxabankek Gorenera jotzea erabaki zuen (modu honetan Gasteizko Legebiltzarretik jaso zuen aginduari muzin eginez)

Res Abokatuek ezagutzera eman dute Gorenak data ezartzeko argitaratu zuen probidentzia. Dokumentu berdinean auzitegiak bista edo epaia ospatzea baztertu du, Ortiz eta Erauskinek hala eskatu zuten arren. Beraz zuzenean bozkatu egingo dute, Pedro José Vela Torres txostengileak eta gainontzeko magistratuek.

Gure kalkuluen arabera 1.3 milio hipotekatik gora kaltetzen dituen abusuzko indize honen aurkako borrokan mugarri oso garrantzitsua izango da. 2014ko maiatzean Donostian IRPHa baliogabetuz indizearen aurkako lehen epaia lortu zenetik (gure elkarteko familia baten eskutik, Maite Ortiz eta José María Erauskin abokatuen lan boluntarioarekin), bidea luzeegia ari da izaten, eta bada garaia justizia egiteko. Espero dezagun Espainiako Auzitegi Gorena bidezkoa izatea. Ez dugu zorte onik behar, arrazoia baitugu.

Espainiako Auzitegi Gorenak tramitera onartu duen IRPHaren inguruko lehen kasua abiadura hartzen doa. Kasua Gasteizko kaltedun batek hasi zuen, Maite Ortiz eta José María Erauskinen laguntzaz Kutxabanken aurkako garaipen bat lortuaz. Arabako Pobintzia Auzitegiak Kutxabanken aurkako zigorra berretsi zuen, baina banketxeak Gorenera jo zuen.

Abokatuek aditzera eman dutenez, irailaren 14ean helegitearen aurkako beraien idatzia aurkeztu zuten, eta 24 orduko epean jakinarazi zieten idatzia onartzen zela eta beraz hurrengo pausua epaiketa (beraiek eskatu bezala) edota zuzenean bozketa eta epaiaren ebaztea izango dela.

Justizia espainiarraren geldotasuna ezagututa, oso deigarria da kasu honek daraman abiadura. Espero dezagun honen guztiaren atzean bankuari arrazoia emateko presa ez egotea, IRPHaren kaltedunok bai baitakigu abusuzko indize bat dela, eta borrokatzen jarraitzeko prest geundeke.

Espero genuen bezala, IRPHaren inguruan Espainiako Auzitegi Gorenak aztertu beharko duen lehen kasua Probintzia Auzitegi batek IRPHa baliogabetzen zuen lehen epaiaren aurka Kutxabankek jarritako helegitea izango da. Arabako Probintzia Auzitegian kaltedun batek lorturiko epaia da, Maite Ortiz eta Jose Mari Erauskin abokatu aitzindariekin.

Abokatuek ezagutzera eman dutenez, Espainiako Auzitegi Gorenak kasuaren azterketa azkartzea erabaki du, IRPHa sortzen ari den eztabaida eta auzibide kopurua dela eta. Modu honetan, gaiari lehentasunezko tratua ematea erabaki du Gorenak. Helegiteen hurrenkera kronologikoa aldatzea dakarren neurri bat da, eta ondorioz aurretik ziren beste kasu batzuk baino lehenago aztertuko dute IRPHaren gaia. Modu honetan Auzitegi Gorenari dagokion eginkizun bateratzaileari erantzun azkarra bilatzen omen dute. Probintzia Auzitegi ezberdinek IRPHaren inguruan dituzten irizpide ezberdinak batzearen inguruan ari dira.

IRPHa estatu osoan 1.3 milioi mailegutik gora kaltetzen dituen abusuzko indizea da gure kalkuluen arabera, eta ondorioz asko eta asko dira Espainiako Auzitegi Gorenak IRPHa baliogabetzearen zain dauden familiak. Espainiako sistema judizialak dagoeneko behin baino gehiagotan erakutsi du banketxeen alde egiteko duen joera, baina hala eta guztiz ere baikor izan behar dugu, Maite eta Jose Marik ordezkatuko baikaituzte. Adituak izateaz gain, ilusio eta gogo handiz ekingo diotela badakigu. Horrelaxe egin dute azken hiru urte luze hauetan, 2014ko apirilean Donostian IRPHaren aurkako estatu osoko lehen epaia lortu zuten unetik, Kutxabanken aurka gure plataformako familia bate izenean aurkezturiko demandaren eskutik. Bidea luzea ari da izaten beraz, baina irabaziko dugu, IRPHaren kaltedunok arrazoia dugulako, eta gainera abokaturik onenak ditugulako: Maite eta Jose Mari, beharrezkoa balitz Europako Auzitegiraino jotzeko zalantzarik egingo ez dutenak.

Duela egun batzuk jakin genuen Maite Ortiz eta Jose Mari Erauskin abokatuek Arabako Probintzia Auzitegian IRPHa baliogabetuz lortu duten epaietako bat irmo egin dela. Epai honek UCI zigortzen du IRPHa aplikatuz kobraturiko guztiak itzultzera, eta mailegua interesik gabe uzten du.

UCIk helegiterik aurkeztu ez duenez, epaia irmoa da jada, eta kalteturiko familiari kobraturiko dirua itzuliko zaio eta aurrerantzean ez du inolako interesik ordainduko.

Guk dakigunez, IRPHa baliogabetzen duen bigarren instantziako bigarren epai irmoa da. Lehenbizikoa Kutxabank zigortzen zuen epai bat izan zen, hura ere Arabako Probintzia Auzitegian. Abusuzko indize honen aurkako epaitegietako borrokan aurrerapauso oso garrantzitsuak dira zalantzarik gabe.

Epaia eskuragarri dago gure webguneko Epaitegiak atalean, eta hemen klik eginda zuzenean ikusi dezakezu.

IRPHaren AURKAKO EPAITEGIETAKO BORROKAN AURRERAPAUSO GARRANTZITSUAK

PROBINTZIA AUZITEGI BERRIEK ABUSUZKO INDIZE HAU BALIOGABETU DUTE: MADRIL, ALIKANTE ETA SALAMANKAK ARABA ETA BIZKAIAREKIN BAT EGIN DUTE

GAINERA, ARABAKO PROBINTZIA AUZITEGIKO EPAI BAT IRMO BILAKATU DA

Donostia, 2017-6-5

IRPHaren aurkako borrokan berri oso garrantzitsuak izan dira azken egunotan.

Maileguentzako indize hau abusuzkotzat joa izan zen lehen aldiz orain dela hiru urte Donostian (2014ko apirilean), eta ordutik hona lehen instantziako epaitegietan IRPHa baliogabetuz ebatzi diren epaiak zenbatezinak dira jadanik. Hala ere, orain dela gutxi arte bi probintzia auzitegik bakarrik baieztatu zituzten IRPHaren aurkako epaiak. Araba eta Bizkaiko auzitegiak dira.

Orain, bi Probintzia Auzitegi horiei Madril, Alikante eta Salamankakoak batu zaizkie. Berriki ezagutu diren epaien bitartez, hauek ere IRPHa baliogabetu dute, abusuzkoa delako.

Oso berri onak dira IRPHaren kaltedunentzat. Indize honek 1.3 milioi hipotekatik gora kaltetzen ditu espainiar estatuan gure kalkuluen arabera. Epai hauekin kaltedunon posizioa indartzen da, Probintzia Auzitegi ezberdinen artean adostasunik ez dagoenez, Espainiako Auzitegi Gorenak erabaki bat hartu beharko du laster gaiaren inguruan, eta epai hauek oso garrantzitsuak dira kaltedunon posizioa indartzen baitute.

Araba eta Bizkaiko Probintzia Auzitegiek IRPHa baliogabetzen duten epaiak ebazten darraite bitartean, eta jakin dugunez Araban ebatzi den epaietako bat irmoa da jadanik. Antza denez Kutxabankek Gorenera helegitea aurkezteko prozesuan eperen bat ez du bete, eta horregatik egin da epaia irmo. Modu honetan, kasu hori itxita geratzen da, eta Kutxabankek kaltetuari IRPHa aplikatuz kobratu dion diru guztia itzuli beharko dio. Maileguak aurrera jarraituko du, baino inolako interes tiporik gabe.

Epaitegietatik kanpo, egoera askoz argiago dago, eta esan daiteke IRPHaren aurkako borroka morala jadanik irabazia dugula kaltedunok. Izan ere, IRPHa abusuzko klausulatzat hartua da, eta etxebizitza-mailegu berrietan ia ez da erabiltzen. Bere garairik onenetan, mailegu berrien %15ean erabiltzen zen.

Gainera, hainbat erakunde publikok jadanik agertu dute indize honen aurkako euren jarrera, udaletxe, diputazio eta parlamentu autonomikoak barne. Azpimarratzekoa da Gasteizko Legebiltzarraren adierazpena, IRPH Stop Gipuzkoa plataformaren agerraldi baten ondoren ebatzi baitzuen «IRPH interes-tipoa opakoa dela, banketxeek eragin diezaioketena, merkatuaren errealitatea jasotzen ez duena eta argi-argiro kaltegarria kontsumitzaileentzat, eta abusuzkotzat jo beharrekoa».

Adierazpen horrek indizeak dituen zenbait gabeziari egiten dio erreferentzia. Gabezia horiek Estatistika Aplikatuan Katedradun Akreditatua den Juan Etxeberria Murgiondo doktoreak eginiko txosten batetan aztertzen dira. Etxeberria doktoreak IRPH Stop Gipuzkoa plataformaren webgunean argitaratu zuen txosten hau, eta bertan ebazten da indizea ez dela batere sendoa, eta agerikoa dela hobetu daitekeela. Gaineratzen da bistakoa eta oso nabarmena dela entitate bakoitzak, bere tamaina edo bolumena edozein dela ere, IRPHaren hileroko emaitzan eragiteko ahalmena duela, eta ahalmen hori modu zehatzean zenbatu daitekeela.

Espainiako Bankuak berak, Ortiz eta Erauskin abokatuen galdeketa bati erantzunez, onartu zuen banketxeek IRPHaren emaitzan eragina izan dezaketela.

IRPH Stop Gipuzkoa elkartea baikorra da beraz, eta kaltedun guztiei dei egiten die eutsi dezaten eta borrokan jarraitu dezaten.

Aipaturiko epai guztiak eskuragarri daude jadanik gure webguneko Epaitegiak atalean (Madril, Alikante eta Salamankako epaiak eta baita Arabako epai irmoa ere)