Kategoria: Tribunales

IRPHa baliogabetzen duen lehen epai irmoak Gipuzkoako Probintzia Auzitegia gero eta isolatuago uzten du

justicia_irph_multi

IRPHA BALIOGABETZEN DUEN LEHEN EPAI IRMOA

DONOSTIAN HASI ETA GIPUZKOAKO PROBINTZIA AUZITEGIAK BAKARRIK BAZTERTZEN DUEN DOKTRINAREKIN BAT EGIN DU VALENTZIAKO EPAITEGIAK

GIPUZKOAKO PROBINTZIA AUZITEGIA IRPHaren BABESEAN GERO ETA ISOLATUAGO, MODU SUSMAGARRIAN

Donostia, 2016-1-19

Duela gutxi jakin da Valentziako Merkataritza-Arloko hirugarren Epaitegiak 2015eko azaroaren 18an IRPHa baliogabetuz ebatzi zuen epai bat, aldeek helegiterik ez jartzean, IRPHa abusuzkoa izateagatik baliogabetzen duen lehen epai irmo bilakatu dela.

IRPH Stop Gipuzkoak epaia ikusi ahal izan du (dagoeneko Epaitegiak atalean duzu eskuragarri) eta ikusi duenez Valentziako epaitegiaren ebazpenak estatuan IRPHa baliogabetu zuen lehen epaiko argudioak erabiltzen dituela. Lehen epai hura plataforma honen abokatuek lortu zuten Donostian, 2014ko maiatzare 7an. Valentziako epaiak Donostiakoaren zatiak hitzez hitz erabiltzen ditu, zalantzarik gabe ezartzen du IRPHa influentziagarria dela eta abusuzkoa delako baliogabetzen du.

Epai honekin 40tik gora dira jadanik Donostia, Guadalajara, Bartzelona eta Gasteizen ebatzi diren IRPHaren aurkako epaiak, eta gutxienez sei dira IRPHa abusuzkotzat hartu duten epaileak. Guztiek babesten dute modu honetan Edmundo Rodríguez Achútegi magistratuaren doktrina, zeinek hogeita hamar epaitik gora ebatzi zituen IRPHa baliogabetuz.

Azpimarratzekoa da epai hauetariko asko eta asko Gipuzkoako Probintzia Auzitegiak herrialde honetan ebatzi ziren epai guztiak bertan behera utzi ondoren ematen ari direla. Argi ikusten da beraz Merkataritza-Arloko Epaitegiek ez dutela Gipuzkoako Probintzia Auzitegiaren ikuspegiarekin bat egiten eta bere aurka agertzen direla. Izan ere, IRPHa baliogabetzen jarraitzen dute, Probintzia Auzitegiak bertan behera utzitako epaiak oinarritzat hartuta.

Probintzia Auzitegia nabarmenki isolatuta geratzen ari da bere jarrerarekin, eta susmagarria dela uste dugu IRPH Stop Gipuzkoa elkartetik. Espainiako Bankuak berak entitateek IRPHarengan eragina izan dezaketela onartu duen honetan, eta estatu guztiko Merkataritza-Arloko Epaitegiek IRPHa baliogabetzen darraiten bitartean, Gipuzkoako Probintzia-Auzitegiak IRPHa babesten du, ondorengo bi argudio hauek bezalako arrazoi barregarri eta eskandalagarriak erabiliaz gainera:
1, ez omen dela manipulazioa frogatu, nahiz eta epaitzen dena ez den hori, baizik eta entitateek eragina izateko aukera hori izan baduten ala ez.
eta 2, ez omen da Euriborra baino manipulagarriagoa. Hau gezurra izateaz gain barregarria ere izan daiteke: lapur bat libre uzteko nahikoa arrazoi ote da hura baino okerragoak egotea?

Jarrera horren atzean nolabaiteko presioak egongo ote diren susmoa daukagu, bestela ezin baita ulertu. Izan ere, gure kalkuluen arabera estatuan 1,3 milioi familia baino gehiago kaltetzen dituen milioi askoko iruzurra da hau. Kaltedun guztiek dute kalte hori konpontzeko eskubidea, eta horregatik exijitzen dugu premiazko konponbide bat kobratu diren interes guztiak eta desjabetu diren etxeak kalteturiko familiei itzuliak izan daitezen.

Maite Ortiz eta Jose Mari Erauskinekin elkartasuna

utzi_bakean_abokatuak

Maite Ortiz eta José María Erauskin, IRPHaren eta etxegabetzeen aurkako borrokak babesten dituzten abokatuen aurkako espediente baten irekiera eskatu du Oviedoko Probintzia Auzitegiak. Maite Eta Jose Marik gure taldea hasieratik babestu dute, IRPHaren aurako epaitegietako borrokan aitzindariak dira, IRPHa baliogabetzen duten estatuko lehen epaiak lortu dituzte eta Europako Parlamentuan ere ordezkatu izan gaituzte. Gainera, PAH/Kaleratzeak Stop eta animalien eskubideen aldeko plataformekin ere lan egiten dute, modu boluntarioan.

Orain jakin dugunez Oviedoko Probintzia Auzitegiak espedientea ireki nahi die, ulertzen baitu euren jarrerarekin Maite eta Jose Mari Avilés-en bi agureren etxegabetzea oztopatzen ari direla.

Maite eta Jose Mariren bezeroa adineko emakume bat da, etxe baten jabe dena, eta etxe horrekin bere senarraren sozietate merkantilaren mailegu bati bermea eman ziona. Emakumeak ez du inolako loturarik sozietate honekin, ezta bere ezkontzaren bitartez ere, ondasunen banantzearekin ezkondu baitziren. Enpresak, beste hainbatek bezalaxe, porrot egin zuen, eta banketxeak emakumearen etxea eskatzen du orain. Abokatuek ulertzen dute emakume hau kontsumitzaile bat dela, kontsumitzaileek sinaturiko kontratuen abusuzko klausulen inguruko araudi europarra eta Espainiako legediak ezartzen baitute kontsumitzaile dela bere zeregin profesionaletik at dabilen oro. Kontsumitzailetzat hartua izatea garrantzitsua da, kontratuan abusuzko klausulak salatzeko aukera ematen baitu, eta abokatuek, prozedimentu honetan lanean jarri ziren une beretik emakumea kontsumitzailea dela defendatu dute. Horrela, legediak aurreikusten dituen aukera guztiak erabili dituzte, baina beraien azken helegitea baztertua izan da eta epaileak espediente bat irekitzea erabaki du gainera, ulertzen baitu modu ausartegi edo temerarioan ari direla eta zuzenbidea abusuz erabili dutela.

Baina bitarte horretan Europako Justizia Epaitegiak epai bat ebatzi berri du, non abokatuek defendatzen dutena konfirmatzen den: pertsona fisiko batek banketxe batekin sozietate merkantil baten zorra bermatzeko kontratu bat sinatzean pertsona hori kontsumitzailetzat hartua izango da bere jarduera profesionaletik at ari baldin badabil eta sozietatearekin loturarik ez badu. Ondorioz, Maite eta Jose Mari epailearen aurkako neurriak hartzea aztertzen ari dira orain, Europako araudiaren interpretazio oker baten bitartez abokatuak beldurtu nahi izan dituelako eta etxegabetze bat burutu nahi izan duelako, abokatuei etxebizitza eskubidea bermatzen saiatzea leporatuaz gainera.

IRPH Stop Gipuzkoa elkartetik gure elkartasun eta babes osoa adierazi nahi dizkiegu Maite eta Jose Mari gure lagunei. Beraietaz harro gaude eta badakigu etorkizunean ere, zigortzen badituzte, bidegabe izango dela, ahulenak babesten dabiltzalako.

Algeciras-eko epaitegi batek abusuzkoa delako IRPHa bertan behera utzi eta etxebagetze bat indargabetu du

justicia-irph

Algeciras-eko Lehen Instantziako 4. Epaitegiak exekuzio hipotekario bat artxibatu du eta maileguak oinarri zuen IRPH interes tipoa baliogabetu egin du abusuzkoa delako. IRPHa baliogabetzeko arrazoia entitateak bere kalkuluan eragina duela izan da, eta arrazoi hori indartzeko Espainikao Bankuak Maite Ortiz eta José María Erauskin gure abokatuen galdeketa bati eman zizkion erantzunak izan dira.

Albistea oso pozgarria da, IRPHaren aurkako makilakada berri bat delako eta etxegabetze bat geldiarazi duelako.

Epaia eskuragarri duzu Epaitegiak atalean.

EAEko hiru hiriburuetako epaitegiek IRPHa abusuzkoa dela ebatzi dute

justicia_irph_multi

EAEko HIRU HIRIBURUETAKO EPAITEGIEK IRPHa ABUSUZKOA DELA EBATZI DUTE

GIPUZKOAKO PROBINTZIA AUZITEGIAK IRPHa BALIOGABETZEN DUTEN EPAIAK BERTAN BEHERA UZTEN JARRAITZEN DU, ARRAZOI IRRIGARRIAK ERABILIZ

IRPH STOP GIPUZKOA PLATAFORMAK AGERRALDIA EGINGO DU GASTEIZKO PARLAMENTUAN ASTELEHENERAN, AZAROAK 16

Donostia, 2015-11-12

Bilboko Merkataritza Arloko epaitegiak Donostia eta Gasteizkoekin bate gin du eta IRPHa baliogabetu du mailegu batetan, abusuzkoa delako. IRPH Stop Gipuzkoa elkarteak gaur ezagutu duen eta urriaren 6ko datan duen epai honekin, EAEko hiru hiriburuetako epaitegiek IRPHa abusuzkoa dela ebatzi dute jadanik.

Gainera, Gasteizko Merkataritza Arloko epaitegiak pareko beste epai bat ebatzi du duela egun batzuk, 2015eko urriaren 29an. Aurretik, epaitegi honek 2015eko ekainaren 15ean ebatzi zuen IRPHa baliogabetzen zuen bere lehen epaia. Donostiari dagokionez, azpimarratzekoa da dagoeneko 40tik gora direla IRPHaren aurkako epaiak, gehienak IRPH Stop Gipuzkoa plataformako kideen salaketen ondorioz.

Plataforma honek oso begi onez ikusten ditu epai hauek, argi erakusten baitute merkataritza arloan adituak diren epaitegiek IRPHa indize manipulagarri eta abusuzkotzat dutela.

Hala ere, Gipuzkoako Probintzia Auzitegiak erabat aurkakoa den bidea hartu du, eta lehen instantzian IRPHa baliogabetu duten epai guztiak bertan behera uzten ari da. Gipuzkoako Probintzia Auzitegiaren iritzia jakin ondoren ere EAEko hiru hiriburuetako epaitegiek IRPHa baliogabetzen jarraitzeak erakusten du aurrez aurreko bat dagoela merkataritza arloan adituak diren epaitegien eta Gipuzkoako Probintzia Auzitegiaren artean, azken honek ez duelarik merkataritza arloan espezialitaterik.

IRPH Stop Gipuzkoa elkartearen iritziz, Gipuzkoako Probintzia Auzitegiaren argumentuan guztiz irrigarriak dira. IRPHa baliogabetzen zuen lehen epaia bertan behera utzi zuenean dagoeneko esan zuen ez zela frogatu banketxeek IRPHaren kalkuluan eraginik dutenik, baina era berean kaltedunei arrazoia eman zien, «nolabaiteko eragina izan zezaketela» onartuaz.

Duela gutxi, Probintzia Auzitegiak berriz ere harritu gaitu, esan baitu ezin dela esan IRPHari loturiko maileguetan oreka ezik dagoenik, eta honako arrazoia eman du: «el desequilibrio se daría si la entidad financiera pudiera influir en la configuración del índice, no por el hecho de que su actuación, por la forma de cálculo del mismo, incida en él».

Bistan da Probintzia Auzitegia, bere akatsa zuzendu eta IRPHa abusuzkoa dela onartu ordez, korapilo lotsagarri batetan sartzen ari dea, gero eta irrigarriagoak diren argumentuak erabiliaz.

Testuinguru honetan, astelehenean, azaroak 16, IRPH Stop Gipuzkoa elkartearen abokatu den José María Erauskinek agerraldia egingo du Gasteizko Parlamentuan, Enplegu, Gizarte Politika eta etxebizitza Batzordean.

IRPHaren aurkako epai berria Donostian

justicia-irph

Maite Ortiz eta José María Erauskin abokatuek euren webgunean ezagutzera eman dutenez IRPHaren aurkako garaipen berri bat lortu dute Donostian. Donostiako Merkataritza Arloko epaitegiak, beraz, IRPHa abusuzkoa delako baliogabetzen tinko jarraitzen du, nahiz eta gipuzkoako Probintzia Auzitegiak Kutxabankek aurkezten dituen helegite guztiak onartu. Gipuzkoako Auzitegiaren bakardadea nabaria da, IRPHa babestuz Donostia, Bartzelona, Guadalajara edota Gasteizko merkataritza-arloko epaitegien irizpidearen aurka.