Azaroaren 10ean Donostian 30 familiak IRPHa baliogabetzea eskatuko dugu. IRPHaren aurkako makroepaiketa bat izango da, eta Kutxa eta Kutxabanken kudeaketa ere epaituko ditugu.
Kategoria: Tribunales
IRPHa baliogabetzen duen bigarren epaia
Mailegu batetan IRPHa baliogabetzen duen bigarren epaia lortu berri dugu. Berriz ere Kutxabanken mailegu bat da, eta entitatea zigortua izan da ordezko indizea (Euribor+1, kontratuak hori zioelako) atzerako eraginez aplikatzera, maileguaren haseratik IRPH Cajas indizearen arabera ordainduriko kuota guztiei, diferentzia kaltetuari itzuliaz. Gure borrokan aurrerapausu itzela da, eta bereziki pozik gaude Lorenak eta bere alabak Kutxabankek kendu zien babes ofizialeko etxebizitza berreskuratu baitezakete.
Hementxe duzu epaia, eta ondorengo hau da argitara eman dugun komunikatua:
KUTXABANKen MAILEGU BATETAN IRPHa BALIOGABETZEN DUEN BIGARREN EPAIA
LORENA ETA ALABAK KUTXABANKek 2.900€ko ZORRAGATIK KENDU ZIEN BABES OFIZIALEKO ETXEBIZITZA BERRESKURATZEA ESPERO DUTE
KALERATZEAK STOP ETA IRPH STOPek ITURBEren DIMISIOA EXIJITZEN DUTE
Donostia, 2014-10-22
Aste honetan ezagutu den Donostiako Merkataritza Arloko 1. Epaitegiaren epai batek Kutxabank zigortu du IRPH Stop Gipuzkoa elkarteko kide bati IRPH Cajas indizea aplikatzeagatik. Estatu mailan IRPHaren aurkako borrokan garrantzi honetako garaipen bat lortzen den bigarren aldia da.
Aurreko epaia ere IRPH Stop Gipuzkoa elkartearen talde juridikoak lortu duzen, eta kasu hartan ere maileguaren bizitza osoan zehar IRPHaren arabera bidegabe kobraturiko guztiak atzerako eraginez itzultzera zigortua izan zen Kutxabank. Justiziak kaltedunen aldarrikapena babesten du horrela, IRPHa entitateek moldatu dezaketen indizea eta beraz indarrean dagoen legediaren aurkoa dela onartuaz. Ondorioz, bertan behera geratzen da eta hipotekaren bizitza osoan zehar kobraturiko interesak itzultzea exijitzen da.
Aste honetan ezaguturiko kasuan, salaketa jarri zuena Errenteriako lagun bat da, hipoteka ordaintzean atzeratu eta babes ofizialeko etxebizitza galdu zuena, Kutxabankek kontratua bertan behera utzi baitzuen 2.900€koa besterik ez zen atzerapen baten ondorioz.
Lorenak eta alabak, Kaleratzeak Stop elkartearen laguntzaz, exekuzioaren aurka egin zuten epaitegitan, eta justiziak onartu zuen Kutxabankek gutxienez bi abusuzko klausula aplikatu zituela euren kontratuan: posizio zordunen erreklamazio komisioa eta %17ko berandutze interesak. Kutxabankek, Lorena eta alaba etxegabetzeko grinak itsututa, helegitea jarri zuen, baina Entzutegi Probintzialak epaia berretsi zuen: Kutxabankek aplikaturiko abusuzko klausulak baliogabetuak izan ziren, baina exekuzioa ez zen gelditu.
Lorenak Kutxabanken aurka salaketa jarri zuen IRPHa aplikatzea ere abusuzkoa dela ulertuta, eta justiziak arrazoia eman dio orain. Talde juridikoak 2.900€-ko atzerapena birkalkulatuko du orain. IRPHaren, komisioen eta berandutze interesen eragina kontuan izanik, eta guztiak abusuzkoak direlako baliogabetuak izan direlarik, oso litekeena da Kutxabankek kontratua eten zuenean Lorenak bere maileguaren ordainketan inolako berandutzerik ez izatea.
Horregatik Lorena eta alabak euren etxea berreskuratzea espero dute, Kutxabankek abusuzko klausula hauek guztiak erabiliaz bereganatzeko zalantzarik izan ez zuen babes ofizialeko etxebizitza bat.
Kaleratzeak Stop eta IRPH Stop elkarteok berri hau ospatzen dugu, eta uste dugu Lorena eta bere alabaren kasua Kutxabankek IRPHaren inguruan egin duen kudeaketa zitalaren adibide garbia dela. Kutxabanki, PNV, PSE eta PPri exijitzen diegu zekenak ez izateko eta helegiterik ez jartzeko, epaia lehenbailehen aplikatuaz eta Lorena eta bere alabari euren etxebizitzaren jabetza itzuliaz.
Gainera, epaiaren aplikazioa IRPHaren aldaera guztien kaltetu guztiei zabaltzea exijitzen dugu, euren maileguen bizitza osoan IRPHaren arabera kobratu zaizkien diru guztiak itzuliaz. Gogoratu behar da IRPH aplikatzeagatik Kutxabanken aurka jarritako 30 salaketatik gora dagoela epaiketaren zain, eta dagoeneko irabazi duten bi salaketa hauen parekoak direla. Kutxabankek amore ematen ez badu, justizia administrazioa bere aurkako milaka salaketarekin kolapsatuko du.
Bestalde, Xabier Iturbek ostiralean ospatuko den Kutxaren Batzar Orokorrean dimisioa eman dezala exijitzen dugu. Bere agindupean bidegabekeria gehiegi egin dira, eta Lorena eta bere alabarekin erabili duten bihozgabekeriak muga guztiak gainditu ditu. Tipo honek ezin du Kutxaren garai berrian buru izaten jarraitu.
Garai berri honetan, Kutxabanken kontrol publiko eta soziala ezinbestekoa da honelako bidegabekeriak berriro gerta ez daitezen. Horretarako, PNV, PSE, PP eta CCOO-k ostiralean Kutxa banku-fundazio bilakatzea ekiditea da lehen urratsa, hobeagoak eta legezkoak diren alternatibak baitaude. Horregatik, ostiralean Kutxaren batzar nagusiaren parean deitu diren mobilizazioetan esku hartzeko dei egiten diogu gizarteari.
Andia kalean egigo den kanpaldian Lorena eta kaltetu gehiago egiongo dira, euren kasuak azaltzen.
Kutxabanken IRPHaren aurkako salaketa Guadalajaran
Kutxabank, iruzur egiteko asmo gaiztoz IRPH Entidades aplikatzeagatik zigortua
KUTXABANK, ZAILTASUNAK ZITUEN FAMILIA BATI «IRUZUR EGITEKO ASMO GAIZTOZ» IRPH ENTIDADES APLIKATZEAGATIK ZIGORTUA
DONOSTIAKO MERKATARITZA ARLOKO EPAI BATEK KUTXABANKEN JOKAERAN ENGAINUA IKUSI DU
GERTAERA HONEN MUTURREKO LARRITASUNAREN AURREAN, XABIER ITURBEren DIMISIOA EXIJITZEN DUGU
Donostiako Merkataritza-Arloko Epaitegiaren 2014ko irailaren 30eko epai batek mailegu hipotekario baten nobazio-kontratua baliogabetu du Kutxabanken jokaeran engainua ikusi baitu familia bati IRPH Entidades aplikatzean. Kutxabank Euribor+1 atzerako eraginez aplikatzera zigortua izan da, eta prozesuaren kostak ordaintzera ere bai.
Familia honek 2007. urtean mailegu hipotekario bat sinatu zuen Kutxarekin, hogei urteko epearekin. Hipoteka hori, Gipuzkoan Kutxaren beste milaka hipoteka bezalaxe, IRPH Cajas indizeari lotua izan zen, indize hori desagertuko balitz ordezko bezala Euribor+1 ezarriaz.
2012ko ekainean, IRPH Cajas dagoeneko %4eko balioetara gerturatzen ari zelarik, familiak zailtasunak zituen hipoteka ordaintzeko, eta banketxera jo zuen. Ordurako indarrean zegoen 2011ko urriaren 28ko EHA/2899/2011 Ministerio-Agindua (gardentasun eta banku-zerbitzuen bezeroen babeserakoa), zeinek IRPH Cajas indizearen desagerpena ezartzen duen. Ondorioz, Kutxabankek bazekien laister Euribor+1 ordezkoa aplikatu beharko zuela, familia honen egoera nabarmen arinduaz, Euribor+1 indizea IRPH Cajas indizearen oso azpitik baitzegoen.
Gogoratu behar da IRPH Cajas indizea Euribor+1 ordezkoarekin ordezkatzea oso polemikoa izan dela Kutxabanken, entiate honek ordezkatzea ahal duen guztia atzeratu baitu, legeak utzi dizkion zirrikitu guztiak erabiliz eta horretarako kaltetuoi, erakunde sortzaileei eta Gasteizko Legebiltzarrari berari entzungor eginez.
2012ko ekainean familia honek banketxera jo zuenenan, Kutxabankek ez zion esan laister Euribor+1 ordezkoa izango zutenik eta ez zion ordezko hori aplikatu, eta mailegua beste zortzi urtez luzatzea eskeini zion, modu horretan hileroko kuota zerbait jeiste aldera, nahiz eta horrek zorrarengatik interesak ordaintzeko epea luzatzea ekarriko zuen.
Ondoren sinatu zuten nobazio-kontratuan, eta familiari ezer esan gabe, Kultxabankek desagertzear zegoen IRPH Cajas indizea indarrean jarraituko zuen eta darraien IRPH Entidades indizearengatik aldatu zuen. Modu honetan, Kutxabankek adosturiko Euribor+1 ordezkoa ez aplikatzea bermatu zuen, honek kontratuari dagbokion interes tipoaren beherapen nabarmena ekarriko bailuke.
2014ean familia honek IRPH Stop Gipuzkoa elkartera jo zuen, eta Maite Ortiz eta José María Erauskin abokatuek epaitegietara eraman zuten kasua.
Kutxabank zigortzen duen epaia
Salaketa guztiz onetsia izan da, eta epaiak dioenez «entitateak familiari esan behar izan zion, alde batetik, IRPH Cajas desagertzear zegoela, eta bestalde, IRPH Entidades indizearekin ordezkatzeko erabakia ez zela neutroa, azken hau beti Euribor indizearen oso gainetik egon baita, puntu bateko diferentziala errez gaindituaz. Datu hauek ez ematea omisio larria izan zen».
Ondorioz, nobazio-eskritura baliogabetzen da eta Kutxabank zigortzen da «salaketa jarri dutenei bidegabe kobraturiko kantitateak itzultzera», kuotak Euribor+1 ordezko indizearekin berriz kalkulatuaz. Gainera, Kutxabank prozesuaren kostak ordaintzera ere zigortu du epaileak.
Epaia bereiki gogorra da Kutxabanken jokaerak engainua suposatzen duela esatean (gaztelerazko dolo), hau da, norbaiti iruzur egiteko asmo gaiztoa. Hau frogatzeko, entitateak «azpikeria engainagarriak» erabili zituela dio, ez baitzuen familia informatu, eta mailegu-emaileari nabarmen komeni zaion erreferentzia tipoa sartu zuen kontratuan, ordezko bezala adosturikoa indarrean sartzea ekiditen baitu. Kutxabanken jokabidea larria dela dio, entitateak ez baitzuen IRPH Cajas indizea desagertzera zioala azaldu, eta ondorioz bezeroarentzat askoz abantailagarriagoa zen interes tipo bat, hau da, oinarrizko kontratuan aurreikusiriko Euribor+1 indizea erabiltzeko aukera zegoela.
IRPH Stop Gipuzkoa elkartearen balorazioa
IRPH Stop Gipuzkoa elkarteak uste du Kutxabanken jokabidea oso larria dela, eta epaiarekin ados dado, beti aldarrikatu dugun bezala Kutxabank fede oneko zordunekin kupidagabeena den entitatea dela konfirmatzen baitu.
Ez da onargarria helburu sozialekin eta gipuzkoarrak laguntzeko intentzioz sorturiko aurrezki kutxa batek bere mailegua ordaintzeko zailtasunak dituen familia bat fede gaiztoz engainatu izana.
Tamalez, engainu hau ez da arazo isolatua, eta horren froga da entitateak ez duela arazoa konpondu nahi izan eta kalteturiko familia epaitegietara jotzera behartu duela.
Gure aurrezki kutxen kudeaketa tamalgarri honen erantzuleka ezin dute zigor gabe gelditu. Xabier Iturbe Kutxako presidenteak dimisioa eman behar du, familia hau enaginatu izanaren erantzule delako eta baita gure aurrezki kutxaren degenerazioaren errudun ere.
Kutxabanken kontrol publiko eta soziala inoiz baino beharrezkoagoa dela frogatzen du honek. PNV, PSE eta PPri exijitzen diegu Kutxa banku-fundazio bihurtzeko dituzten planak bertan behera uzteko, eta Kutxabank pribatizatzeko prozesua eteteko. Xabier Iturbe (PNV) eta José Miguel Martín Herrera (PSE) Kutxaren erantzunkizunezko postuetatik kentzeko exijitzen dugu halaber. Gure aurrezki kutxen printzipioak traizionatu izanaren erantzuleek ezin dute euren postuetan egun bat gehiagoz jarraitu.
Hemendik jeitsi ditzakezu: epaia eta gure prentsa-oharra.
IRPH Entidades-en inguruko salaketa, epaiaren zain
IRPH Entidades aplikatzeagatik Kutxabanken aurkako salaketa epaiaren zain geratu da gaur Donostian. IRPH Stop-en talde juridikoak defentsaren argumentu guztiak gezurtatu ditu, eta Kutxabanken ordezkariak finean IRPH Entidades indize ofizial bat dela besterik ez du esan.
Kanpoan, beherago ikusi ahal duzun prentsa-oharra eman dugu aditzera. Agerraldian hainbat lagun eta eragilek babestu gaitu, hala nola Kaleratzeak Stop Gipuzkoa, Rafa Mayoral (PAH-ren koordinadore legala), Ander Rodríguez Gipuzkoako Foru Aldundiko Gizarte Politikako Diputatua (Bildu), eta hainbat hautetsik, tartean hauek: Marian Beitialarrangoitia (EH Bildu-ko legebiltzarkidea Gasteizen), Tania González (Podemos-eko eurodiputatua), Paloma López (IU-ko eurodiputatua), Inko Iriarte, Judit García eta Enrique Martínez (Bildu-ko batzarkideak Gipuzkoako Batzar Nagusitan)
Ikusi honen berri hemen: Hitza, Berria, ABC, Gara-Naiz, El Diario Vasco, eldiario.es, Hirian.
Gaur aditzera eman dugun komunikatua:
AGERRALDI PUBLIKOA: KUTXABANKen AURKAKO EPAIKETA IRPH ENTIDADES APLIKATZEAGATIK
Donostia, 2014-9-22
IRPH Stop Gipuzkoa elkarteak agerraldia du gaur, Kaleratzeak Stop Gipuzkoak eta PAH-ren estatu mailako ordezkaritza batek babestuta. IRPHaren kaltetuok Kaleratzeak Stop / PAH elkartearen parte gara, eta euren babesa eskertzen dugu. Beraiek gabe gure borroka ez litzateke posible.
Gainera, Kaleratzeak Stop elkartearen talde juridikoaren laguntza bereziki eskertu nahi dugu. Dagoeneko gure elkartearen zati ezinbestekoa dira, eta Maite Ortiz era José María Erauskin buru dituztela, IRPHa epaitegietan deuseztuko dute.
Gaur gurekin diren hautetsi eta eragile sozialei ere gure esker ona erakutsi nahi diegu.
IRPHa indize kriminala da, eta bere bultzatzaileak errudunak dira. PNV, PSOE eta PP, euren gobernu erantzunkizunetatik eta Kutxa eta Kutxabanken administrazio kontseiluetan dituzten ordezkarien bidez, herritarron aurka eta IRPHaren lapurreta luzatzearen alde ari dira. Gaur gurekin diren talde politikoen babesa bakarrik izan dugu, eta horregatik jo behar izan dugu epaitegietara, tasak geure diruarekin ordainduaz.
Gaurko epaiketatik espero dezakegun epai bakarra IRPH Entidades bertan behera utzi eta Kutxabank bidegabe kobraturiko interesak itzulzera zigortzea da. Pareko epaia lortu zen dagoeneko IRPH Cajas indizearen kasuan, eta beraz IRPH Entidades bertan behera uzteko bidean lortuko den lehen garaipen judizial handiaren aurrean gaude. IRPH Entidades oraindik ere indarrean dago eta milioitik gora familia kaltetzen ditu estatu espainiarrean.
Garaipen judizial batengan kofidantza dugu, trabak traba, Espainiako Bankuak gaurko epaitekarentzat eskatu zaion informazioa ukatzea adibidez. IRPHa estatu mailako kontua da, eta Espainiako Bankuak epaileari informazioa emateari uko egin dio. Atsekabetu beharrean, Espainiako Bankuak justiziarekin elkarlanean egiteari muzin egin izana ospatzen dugu, IRPHaren gardentasun eza frogatzen baitu. Bere kalkuluaren irregularitateak ezkutatu nahi dituzte horrela.
Elkarte honek bere helburuak lortu artean lanean jarraituko du. Helburu hauek hiru puntutan laburbildu daitezke:
1. IRPHaren aldaera guztiak bertan behera utzi eta Euribor-arekin ordezkatzea, gehienez puntu bateko diferentzialarekin.
2. IRPHa edo beste edozein abusuzko klausulak zituzten maileguen ondorioz kaleratuak izan diren familiei etxebizitza itzultzea.
3. Banketxe guztien eta IRPHaren aldaera guztien kaltetu guztiei kobraturiko interesen itzulketa, atzerako eraginez eta epaitegietara jo beharrik gabe.
Gainera, eta puntu horiek lortu bitartean hipoteken exekuzio guztiak berehala bertan behera uztea exijitzen dugu. Kasu larriak dira, gure adiskide Lorena eta bere alabarena bezala. Izan ere, Kutxabank-ek Errenterian duten babes ofizialeko etxebizitzatik bota nahi ditu. Kutxa-k eta Kutxabank osatzen duten gainontzeko kutxek, izaera publiko eta helburu sozialekin sortuak izan zirenak, euren sorrerako helburuetara itzuli behar dute, eta gaur egun egiten dituzten abusuak alde batera utzi. Aukera aprobetxatu nahi dugu pribatizazioa baztertu eta gure kutxen kontrol publiko eta soziala bermatuko duten neurriak hartzea exijitzeko.
BAI, POSIBLE DA.
Irailaren 22an denok Donostiara
Irailaren 22an Donostiako epaitegian IRPH Entidades aplikatzeagatik Kutxabanken aurka jarririko salaketari dagokion epaiketa ospatuko da. Klausula hori bertan behera utzi eta maileguaren hasieratik bidegabe kobraturiko guztiak itzultzea eskatzen da. Epaitegi berdinak zigor hori jarri zion Kutxabanki IRPH Cajas aplikatzeagatik, eta beraz antzeko zerbait espero dezakegu. IRPH Entidades indizearen aurkako borrokan lehen garaipen judizial garrantzitsua litzateke. Indize kriminal hau oraindik ere indarrean dago eta milioitik gora familia kaltetzen ditu espainiar estatuan.
Herritarrei dei egiten diegu irailaren 22an goizeko 10:30tan Donostiako epaitegietara joateko (Teresa de Calcuta Plaza 1, Donostia – San Sebastián). Eragile sozial eta alderdi politikoei ere zabaltzen diegu deia, kalteturiko familien babesean etor daitezen.