Begoña, Rosa, Marian eta Eva: lau emakume kentsu Radio Euskadiko Boulevard saioan Kutxabanken gehiegikeriak salatzen, 2014ko urriaren 7an. Beraietako bat IRPHaren kalteduna da.
Kategoria: IRPH
Eneko Anduezari (PSE) gutun irekia
IRPH Stop Gipuzkoa plataformak gutun irekia igorri dio gaur Eneko Andueza PSEko batzarkideari, beste batzarkide guztiei eta komunikabideei kopia bidaliaz. Beherago duzu gutuna bere osotasuean.
Gutunean, plataformak kritikatzen du uztailaren 3an Batzar Nagusitan egon ginenean eskeini zizkigun hitz goxoen ondoren, batzarkideak saldu egin gaituela bere botarekin Kutxa banku-fundazio bihurtzea babestean. Modu honetan langileen diruarekin eraikitako entitate baten kapitalaren lapurreta babestu eta bultzatzea egozten diogu. Gizarteari maula argi bat. Eta gehitzen dugu bere bozka ezjakintasunak edota ezkutuko interesek bakarrik azaldu dezaketela.
Gainera, kritikatu egin dugu Andueza jaunak bere botoarekin balizko Kutxa banku-fundaziorako patronotarako Kutxa eta Kutxabanken Administrazio Kontseiluetan eserleku bana dituen José Miguel Martín Herrera berbera proposatu izana, honek beti eta salbuespenik gabe IRPHaren lapurretarekin jarraitzearen alde bozkatzen baitu.
Bestalde, batzarkide sozialistari gogorarazi diogu kaltedunek Diputazioari diru publikoz IRPHaren kaltetuak babesteko eskatzearen proposamen sozialista baztertzen dugula. Bankuen abusuak bankuek ordaindu behar dituztela azpimarratu dugu, eta ez herritarrek.
Ondorioz, eta ekimen hori laister eztabaidatuko denez, Eneko Anduezari Aralar-en enmendakinaren alde bozkatzeko gomendatu diogu, Kutxari IRPHa aplikatzeari berehala utzi eta interes tipo honekin kobraturiko guztia itzultzeko eskatuaz. Kaltetuok gogorarazi dugud agoeneko badagoela epai bat Kutxabank itzultze retroaktibo hori egitera zigortu duena, eta azpimarratu dute ez litzatekeela bidezkoa milaka kaltedunek epaitegietara jo behar izatea euren dirua berreskuratzeko.
Asteko ateraldia, María Eugenia Arrizabalagaren eskutik (PNV)
Kutxak eta PNV-k (PP eta PSOE-rekin batera) IRPHarekin sortu duten sufrimendu guztiarengatik ez balitz, ateraldia oso barregarria litzateke. 2014ko irailaren 23an PNV-ko legebiltzarkide den María Eugenia Arrizabalagak twitter bidez esan zuen Kutxak ez duela IRPHrik aplikatzen. Eta zuzentzeko eskatu genionean, temati eutsi zion gezurrari, barregarri geratu arte. Azkenean burumakur agurtu zen, hobeto enteratuko zela esanaz. Barkamen eske edota argumentu berriekin etorri zain gaude.
Elkarriketa guztia gure Twitter-eko kontuan duzu, eta hemen gaztelerara itzulpena:
IRPH Entidades-en inguruko salaketa, epaiaren zain
IRPH Entidades aplikatzeagatik Kutxabanken aurkako salaketa epaiaren zain geratu da gaur Donostian. IRPH Stop-en talde juridikoak defentsaren argumentu guztiak gezurtatu ditu, eta Kutxabanken ordezkariak finean IRPH Entidades indize ofizial bat dela besterik ez du esan.
Kanpoan, beherago ikusi ahal duzun prentsa-oharra eman dugu aditzera. Agerraldian hainbat lagun eta eragilek babestu gaitu, hala nola Kaleratzeak Stop Gipuzkoa, Rafa Mayoral (PAH-ren koordinadore legala), Ander Rodríguez Gipuzkoako Foru Aldundiko Gizarte Politikako Diputatua (Bildu), eta hainbat hautetsik, tartean hauek: Marian Beitialarrangoitia (EH Bildu-ko legebiltzarkidea Gasteizen), Tania González (Podemos-eko eurodiputatua), Paloma López (IU-ko eurodiputatua), Inko Iriarte, Judit García eta Enrique Martínez (Bildu-ko batzarkideak Gipuzkoako Batzar Nagusitan)
Ikusi honen berri hemen: Hitza, Berria, ABC, Gara-Naiz, El Diario Vasco, eldiario.es, Hirian.
Gaur aditzera eman dugun komunikatua:
AGERRALDI PUBLIKOA: KUTXABANKen AURKAKO EPAIKETA IRPH ENTIDADES APLIKATZEAGATIK
Donostia, 2014-9-22
IRPH Stop Gipuzkoa elkarteak agerraldia du gaur, Kaleratzeak Stop Gipuzkoak eta PAH-ren estatu mailako ordezkaritza batek babestuta. IRPHaren kaltetuok Kaleratzeak Stop / PAH elkartearen parte gara, eta euren babesa eskertzen dugu. Beraiek gabe gure borroka ez litzateke posible.
Gainera, Kaleratzeak Stop elkartearen talde juridikoaren laguntza bereziki eskertu nahi dugu. Dagoeneko gure elkartearen zati ezinbestekoa dira, eta Maite Ortiz era José María Erauskin buru dituztela, IRPHa epaitegietan deuseztuko dute.
Gaur gurekin diren hautetsi eta eragile sozialei ere gure esker ona erakutsi nahi diegu.
IRPHa indize kriminala da, eta bere bultzatzaileak errudunak dira. PNV, PSOE eta PP, euren gobernu erantzunkizunetatik eta Kutxa eta Kutxabanken administrazio kontseiluetan dituzten ordezkarien bidez, herritarron aurka eta IRPHaren lapurreta luzatzearen alde ari dira. Gaur gurekin diren talde politikoen babesa bakarrik izan dugu, eta horregatik jo behar izan dugu epaitegietara, tasak geure diruarekin ordainduaz.
Gaurko epaiketatik espero dezakegun epai bakarra IRPH Entidades bertan behera utzi eta Kutxabank bidegabe kobraturiko interesak itzulzera zigortzea da. Pareko epaia lortu zen dagoeneko IRPH Cajas indizearen kasuan, eta beraz IRPH Entidades bertan behera uzteko bidean lortuko den lehen garaipen judizial handiaren aurrean gaude. IRPH Entidades oraindik ere indarrean dago eta milioitik gora familia kaltetzen ditu estatu espainiarrean.
Garaipen judizial batengan kofidantza dugu, trabak traba, Espainiako Bankuak gaurko epaitekarentzat eskatu zaion informazioa ukatzea adibidez. IRPHa estatu mailako kontua da, eta Espainiako Bankuak epaileari informazioa emateari uko egin dio. Atsekabetu beharrean, Espainiako Bankuak justiziarekin elkarlanean egiteari muzin egin izana ospatzen dugu, IRPHaren gardentasun eza frogatzen baitu. Bere kalkuluaren irregularitateak ezkutatu nahi dituzte horrela.
Elkarte honek bere helburuak lortu artean lanean jarraituko du. Helburu hauek hiru puntutan laburbildu daitezke:
1. IRPHaren aldaera guztiak bertan behera utzi eta Euribor-arekin ordezkatzea, gehienez puntu bateko diferentzialarekin.
2. IRPHa edo beste edozein abusuzko klausulak zituzten maileguen ondorioz kaleratuak izan diren familiei etxebizitza itzultzea.
3. Banketxe guztien eta IRPHaren aldaera guztien kaltetu guztiei kobraturiko interesen itzulketa, atzerako eraginez eta epaitegietara jo beharrik gabe.
Gainera, eta puntu horiek lortu bitartean hipoteken exekuzio guztiak berehala bertan behera uztea exijitzen dugu. Kasu larriak dira, gure adiskide Lorena eta bere alabarena bezala. Izan ere, Kutxabank-ek Errenterian duten babes ofizialeko etxebizitzatik bota nahi ditu. Kutxa-k eta Kutxabank osatzen duten gainontzeko kutxek, izaera publiko eta helburu sozialekin sortuak izan zirenak, euren sorrerako helburuetara itzuli behar dute, eta gaur egun egiten dituzten abusuak alde batera utzi. Aukera aprobetxatu nahi dugu pribatizazioa baztertu eta gure kutxen kontrol publiko eta soziala bermatuko duten neurriak hartzea exijitzeko.
BAI, POSIBLE DA.
Irailaren 22an denok Donostiara
Irailaren 22an Donostiako epaitegian IRPH Entidades aplikatzeagatik Kutxabanken aurka jarririko salaketari dagokion epaiketa ospatuko da. Klausula hori bertan behera utzi eta maileguaren hasieratik bidegabe kobraturiko guztiak itzultzea eskatzen da. Epaitegi berdinak zigor hori jarri zion Kutxabanki IRPH Cajas aplikatzeagatik, eta beraz antzeko zerbait espero dezakegu. IRPH Entidades indizearen aurkako borrokan lehen garaipen judizial garrantzitsua litzateke. Indize kriminal hau oraindik ere indarrean dago eta milioitik gora familia kaltetzen ditu espainiar estatuan.
Herritarrei dei egiten diegu irailaren 22an goizeko 10:30tan Donostiako epaitegietara joateko (Teresa de Calcuta Plaza 1, Donostia – San Sebastián). Eragile sozial eta alderdi politikoei ere zabaltzen diegu deia, kalteturiko familien babesean etor daitezen.
IRPH: Espainiako Bankuak justiziarekin elkarlanean aritzeari uko egin dio
IRPHaren inguruko sekretismo eta gardentasun eza neurri zentzugabeetara iritsi da. Espainiako Bankuak ezezko borobila eman dio Donostiako epaitegi baten informazio eskaerari, IRPH Entidades aplikatzeagatik Kutxabanken aurkako salaketa baten harira.
Kutxabank izan zen proba bezala Espainiako Bankuaren txosten bat eskatu zuena, IRPHaren manipulazioagatik inolako zigor-espedienterik egon den zehaztuz. Suposatzen dugu Kutxabankek espero zuela inolako zigorrik egon ez dela esango zuen txosten bat jasotzea. Azpimarratzekoa da horrelako txosten batek ere ez liokeela inolako arrazoirik emango, bi arrazoi nagusi hauek medio:
- Espainiako Bankuak esango balu inongo manipulaziorik ez duela ezagutzen (gertatu ez den hipotesia), honek ez luke frogatuko inoiz gertatu ez denik.
- Inolako manipulazioaren frogarik ez balego ere (eta ez dakigu horrela den), honek ez luke arrazoi ukaezin bat baliogabetuko: banketxeek indizean eragina izan dezakete, eta eragiteko aukera izate hutsak (berdin dio bidegabe eragitera iritsi diren ala ez), indizea indarrean dagoen araudiaren kontrakoa izatea dakar. Hauxe da epaitegi berberak Kutxabanken beste hipoteka batetan IRPHa baliogabetzeko erabili zuen argudio nagusia.
Baina ezustekoa Espainiako Bankuaren erantzunarekin iritsi da, sekretu profesionalaren argudioarekin uko egin baitio epaitegiari entitateek Espainiako Bankuari hilero ematen dioten informazioa eta gai honen inguruan inolako zigor-espedienterik egon denaren inguruko informazioa emateari. IRPH Stop Gipuzkoa elkarteak dokumentu hau eskuratu du, eta hemen ikus dezakezu.
Nabarmena da Espainiako Bankuaren erantzuna ez dela Kutxabankek espero zuena, indizearen gardentasun ezaren inguruko gure salaketak indartu egiten baititu. Badaude gainera irregulartasun gehiago, eta gure IRPH txostenean azaltzen ditugu guztiak.
IRPH Entidades aplikatzeagatiko salaketa honi dagokion bista irailaren 22an ospatuko da Donostian, eta elkarte honek espero du IRPH Cajas indizearekin lortutako emaitza berbera lortzea: IRPH bertan behera uztea eta Kutxabank zigortzea bidegabe kobraturiko interesak itzultzera.