Kategoria: Tribunales

IRPHa baliogabetzen duen bigarren epai irmoa

firme_huelva

Huelvako Lehen Instantziako 3. Epaitegiak ebatzitako epai bat IRPHa baliogabetzen duen bigarren epai irmo bilakatu da. Epaiak, 2016ko apirilaren 12ko data duenak eta gure webguneko “Epaitegiak” atalean eskuragarri dagoenak, Caja Rural del Sur entitatearen aurkako auzibide bat hobesten du eta IRPH Entidades indizea abusuzkoa delako baliogabetu egiten du.

Epaiak IRPH bataz besteko sinple bezala kalkulatzea kritikatzen du, eta azpimarratzen du Espainiako Bankuak inolako ponderaziorik egin gabe kalkulatzen duela, joera orokorretik neurriz kanpo aldentzen diren datuek eragindako distortsioak zuzentzeko inolako koefizienterik gabe, eta beraz errealitate ukaezina dela kreditu-entitateen esku-hartze eta jokaeraren arabera kalkulatzen den interes tipo bat dela. Epaiak esaten du gainera kontratuaren alde batek bere jokabidearekin erreferentzia indize baten gainean eragina duela, gero bere bezeroekin sinatu dituen kontratuetan aplikatzen duelarik indize hori bera. Testuak argi eta garbi dio entitate finantzarioek IRPHaren hilabeteroko balioan eragina izan zezaketela, indize horren arabera mailegua duten bezeroei aplikatzen zitzaielarik hilero balio hori.

Epaia oso zorrotza da beraz IRPHaren abusuzkotasunari dagokionean, eta Gipuzkoan IRPH Stop Gipuzkoak eta bere abokatu Maite Ortiz eta José María Erauskinek Kutxabanki irabazi zizkieten 30 auzibidek baino gehiagok ireki zuten bidetik egiten du. Doktrina hori estatu guztian zabaldu da jada, eta dozenaka dira estatuko epaitegi ezberdinetan ebatzi diren pareko epaiak. Azpimarratzekoa da epai horien artean gehienak Gipuzkoako Probintzia Auzitegiak Donostiako epai aitzindariak bertan behera utzi ondoren ebatziak izan direla, eta beraz oso garbi dago estatu osoko epaitegiak eta Gipuzkoako Probintzia Auzitegia aurrez aurre daudela IRPHari dagokionez, Gipuzkoako Probintzia Auzitegia indize honen babesean gero eta isolatuago dagoelarik.

Arabako Probintzia Auzitegia izan zen IRPHa baliogabetzen duen epai bat baieztatu zuen lehena eta oraingoz bakarra, kasu honetan ere Ortiz eta Erauskin abokatuek daramatelarik kasua. Kutxabankek helegitea jarri zuen eta Espainiako Auzitegi Gorenak ikusi beharko du kasua. Epaitegietako borrokak aurrera jarraitzen du beraz, eta IRPHa baliogabetzen duen bigarren epai irmo hau oso urrats garrantzitsua da bide horretan.

Huelvako epaiak IRPHari dagokion klausula bertan behera utzi eta kontratuak bizirik iraungo duela ezartzen du, baina mailegua interesik gabe utzi beharrean (beste epaitegi batzuek IRPHa baliogabetzean egin duten bezala), Euribor-a ezartzen du interes tipo berri bezala, kontratuak hasieratik zuen %4.25-eko diferentziala mantenduaz. Sekulako astakeria.

IRPHa baliogabetzen duten epai berriak Bartzelona, Valentzia, Castellón eta Huelvan

justicia_irph_multi

IRPH abusuzko indizearen aurkako garaipen judizialak etengabeak dira. Azken asteetan Bartzelona, Valentzia, Castellón eta Huelvan ebatzi diren epaiak jaso ditugu, eta webgune honetako Epaitegiak atalean zintzilikatu ditugu, bertan ikusteko aukera duzularik.

IRPHa baliogabetuz estatu osoko Merkataritza Arloko epaitegiak ebazten ari diren epaiak IRPH Stop Gipuzkoa taldeak bere abokatu Maite Ortiz eta José María Erauskinekin Donostiako Merkataritzako arloko epaitegian lortutako lehen epaietan oinarritzen dira. Epai haiek Gipuzkoako Probintzia Auzitegiak bertan behera utzi zituen, eta beraz epai berri hauek Gipuzkoako Auzitegiaren irizpidearen aurka egitera datoz argi eta garbi, Auzitegi hori erabateko bakardadean dagoelarik IRPHaren babesean.

Azpimarratzekoa da Gipuzkoako Probintzia Auzitegiak ez bezala Arabakoak bai, berretsi egin zuela IRPHaren aurkako epai bat, Ortiz eta Erauskinek lortua hau ere. Epaia Probintzia Auzitegi batek IRPHaren aurka ebatziriko lehena da, eta Kutxabankek helegitea aurkeztu eta Espainiako Auzitegi Gorenera jo du.

IRPH Cajas IRPH Entidades-ekin iruzurrez ordezkatzeagatik zigortu dute Kutxabank bigarren aldiz

justicia

GIPUZKOAKO PROBINTZIA AUZITEGIAK BIGARREN ALDIZ ZIGORTU DU KUTXABANK IRPH CAJAS INDIZEA IRPH ENTIDADESekin IRUZURREZ ORDEZKATZEAGATIK

IRPH STOP GIPUZKOAK XABIER ITURBEREN DIMISIOA EXIJITZEN DU

KUTXABANKek DBHko IKASLEEI EMATEN DIZKIEN IKASTAROAK BERTAN BEHERA UZTEKO ESKATZEN JARRAITZEN DU GAINERA

FISKALTZARI ESKATZEN DIO KUTXABANKek IRUZUR GEHIAGO EGIN OTE DITUEN IKERTZEKO OFIZIOZ ARITZEKO

Donostia, 2016-5-13

Aste honetan jakin dugu Gipuzkoako Probintzia Auzitegiak berretsi egin duela IRPH Cajas IRPH Entidades-ekin iruzurrez ordezkatzeagatik Kutxabanken aurka ebatzitako bigarren zigorra. Bi kasuetan, bezeroek IRPH Cajas indizeari loturiko mailegua zuten, ordezko bezala Euribor+1 zutelarik. Eta bi kasuetan Kutxabankek bezeroak engainatu zituen IRPH Entidades-era aldaketa sinatu zezaten. Bezeroek ez zekiten ordurako IRPH Cajas indizea desagertzekoa zela ezaguna zenik, eta beraz bankuak ordezkoa aplikatzea ekidin nahi zuen, honek euren hileroko ordainketan beherapen nabarmena ekarriko zuelarik. Horregatik Kutxabankek IRPH Entidades indizera aldatzera behartu zituen, desagertu ez den IRPHaren aldaera bakarrera alegia.

Maite Ortiz eta José María Erauskin abokatuek epaitegiek Kutxabank zigortzea lortu dute berriz ere, eta bankuak IRPH Entidades indizearen arabera kobraturikoak itzuli beharko ditu. Maileguak Euribor+1 indizearekin jarraituko du.

Aurreko epaiak, 2015eko apirilean, Kutxabanken aldetik iruzur egiteko asmo nabarmena izan zela frogatu zuen. Bigarren epai honek dio banketxearen irizpide orokorra zela maileguetan egiten zen edozein aldaketa indizea IRPH Entidades-era aldatzearekin baldintzatzea. Beraz, Gasteizko Legebiltzarrak, Gipuzkoako Batzar Nagusiek eta Gipuzkoako 30 udalbatzak baino gehiagok Kutxabank-i Euribor+1 indizera lehenbailehen aldatzeko eskatzen zioten bitartean, honek eskaera honi muzin egin eta IRPH Cajas indizearen aplikazioa ahalik eta gehien luzatzeaz gain IRPH Cajas IRPH Entidades-ekin aldatzen iruzur egin zuen.

Gertakari hauen muturreko larritasunaren aurrean IRPH Stop Gipuzkoa elkarteak Kutxaren presidente den Xabier Iturberen dimisioa exijitzen du. Bera da hiritarron aurrezkiekin sorturiko aurrezki kutxa bat erakunde kriminal honetan bihurtzearen erantzule. Herritarrak epaitegietara jo behar dute orain erakundearen iruzurrei aurre egiteko.

Gainera, Hezkuntza Sailari berriz ere exijitzen diogu berehala eteteko Kutxabankek Araba, Bizkai eta Gipuzkoako DBHko ikasleei ematen ari zaien ustezko prestakuntza saioak. Erakunde kriminal bat, Legebiltzarrari behin eta berriz entzungor egiten diona ezin da gure eskoletan egon, eta berehala kaleratua izan behar da.

Azkenik, frogatuta geratu denez Kutxabanken irizpide orokorra izan zela IRPH Cajas IRPH Entidades-ekin ordezkatuz iruzur egiten saiatzea, fiskaltzari eskatzen diogu ofizioz ekin diezaion ziurtzat jo ditzakegun beste kasu gehiagoren bila. IRPH Stop Gipuzkoan badakigu badirela kasu gehiago, eta ikerketetan laguntzeko prest gaude.

Kutxabankek Gorenera jo du Arabako epaiaren aurka

salvavidas3

KUTXABANKek HELEGITEA JARRI DIO IPRHa BALIOGABETU ETA KOBRATURIKO INTERESAK ITZULTZERA ZIGORTZEN DUEN ARABAKO AUZITEGIAREN EPAIARI

ESPAINIAKO AUZITEGI GORENERA ZUZENDURIKO HELEGITEAN KUTXABANKek GASTEIZKO LEGEBILTZARRAK OPAKO, KALTEGARRI ETA ABUSUZKOTZAT JO ZUEN IRPHa BABESTEN DU

IRPH STOP GIPUZKOAren USTEZ DESOBEDIENTZIA JARRERA HAU KRIMINALA DA, ETA VILLALABEITIAren AGERRALDIA ESKATU DU

KUTXABANKek DBHko IKASLEEI EMATEN DIZKIEN IKASTAROAK BERTAN BEHERA UZTEKO ERE ESKATU DU

Donostia, 2016-4-22

IRPH Stop Gipuzkoak gaur egiaztatu ahal izan duenez, Kutxabankek Espainiako Auzitegi Gorenera zuzenduriko helegitea aurkeztu du IRPH Cajas eta IRPH Entidades indizeak baliogabetu eta salaketa jarri zuenari kobraturiko interesak itzultzera zigortu zuen Arabako Probintzia Auzitegiaren epaiaren aurka. Azken asteetako zurrumurruak baieztatu dira beraz.

Bere helegitean Kutxabankek IRPHaren alde egiten du, orain dela gutxi Legebiltzarrak interes tipo hau «opakoa dela, banketxeek eragin diezaioketena, merkatuaren errealitatea jasotzen ez duena eta argi-argiro kaltegarria kontsumitzaileentzat, eta abusuzkotzat jo beharrekoa dela» adierazi zuen arren.

Modu honetan, Kutxabankek Espainiako Auzitegi Gorenera jo du besteak beste EAEko Merkataritza Arloko Epaitegi guztiek eta orain dela gutxi Arabako Probintzia Auzitegiak jarri dizkioten zigorrei aurre egiten saiatzeko. Eta helegite hori jartzean otsailean Gasteizko Legebiltzarretik jaso zuen agindu zuzenari entzungor egiten dio. Izan ere, Legebiltzarraren testuak banketxeei eskatzen die «utz diezaiotela IRPHa aplikatzeari» eta «itzul diezazkietela pertsona kontsumitzaileei indize horretan erreferentziaturik kobratutako interes guztiak», eta baita «IRPHko edozein motatan erreferentziatutako hipotekak exekutatzeagatik utzarazitako etxebizitzak» ere.

IRPH Stop Gipuzkoa elkartearen ustez, Kutxabankek abusuzko indize honen babesean hartu duen Legebiltzarrarekiko jarrera desobediente hau kriminala da, desegokia eta gaitzesgarria baita. Gaur sekula baino ozenago Kutxabanken gaineko kontrol publiko eta soziala aldarrikatu eta bere pribatizazioa salatzen dugu. Aurrezki kutxak banku-fundazio bihurtzeko eta inolako kontrol publiko eta sozialik ez duten kudeatzaileen esku jartzeko erabakian atzera egin beharra dago.

IRPH Stop Gipuzkoak bi eskari konkretu dituen gutuna bidali die gaur bertan Gasteizko legebiltzarkide taldeei. Batetik, Gregorio Villalabeitiaren premiazko agerraldia galdegiteko eskatzen diegu.

Eta bestetik, Kutxabank Araba, Bizkai eta Gipuzkoako DBHko ikasleei ematen ari zaien ustezko prestakuntza finantzarioko saioak bertan behera utz ditzan Hezkuntza Sailari zuzenduriko ekimen parlamentario bat eskatu diegu. Legebiltzarrari desobedientea den banketxe kriminal bat ezin dugu gure eskoletan eduki, eta berehala kaleratua izan behar da.

Izan ere, hau ez da IRPHaren inguruan Legebiltzarretik jaso duen agindu bat desobeditzen duen lehen aldia: 2013ko ekainean Legebiltzarrak eskatu zion desagertzekotan zen IRPH Cajas aplikatzeari utzi eta bere kontratu batzuetan aurreikusia zegoen Euribor+1 berehala aplikatzeko. Kutxabankek ez zuen aldaketa berehala egin eta IRPH Cajas indizearen aplikazioa ahalik eta gehien luzatu zuen, bere desagerpen ofizialetik urte bete haratago.

Eta epaitegietan berriz, Kutxabankek hainbat zigor jaso ditu, baita IRPHa engainatzeko asmo argiz erabiltzeagatik ere, Gipuzkoako Probintzia Auzitegiak berretsi zuen epai batek ebatzi zuenez.

Legebiltzarrari behin eta berriz desobeditu eta hainbat aldiz kondenatua izan den banketxea da beraz. Hezkuntza Sailak ikastetxeetara sartzen uztea onartezina da. Berehalako kaleratze bat exijitzen dugu, eta ikastetxetan Kaleratzeak Stop elkarteko kideekin hitzaldiak antolatzeko aukera aztertzea gomendatzen dugu.

Legebiltzarra desobedituz Auzitegi Gorenera joko du Kutxabankek

Logo_naranja_tx

KUTXABANKek IPRHa BALIOGABETU ETA KOBRATURIKO INTERESAK ITZULTZERA ZIGORTZEN DUEN ARABAKO AUZITEGIAREN EPAIARI HELEGITEA JAR LIEZAIOKE ESPAINIAKO AUZITEGI GORENEAN

GASTEIZKO LEGEBILTZARRAREN AGINDUA DESOBEDITUKO LUKE HORRELA

KUTXABANKen GAINEKO KONTROL PUBLIKO ETA SOZIAL EZA SALATU ETA VILLALABEITIAren AGERRALDIA EXIJITZEN DU IRPH STOP GIPUZKOAk

Donostia, 2016-3-29

IRPH Cajas eta IRPH Entidades indizeak baliogabetu eta Kutxabank salaketa jarri duenari kobraturiko interesak itzultzera zigortzen duen Arabako Probintzia Auzitegiaren epaiari helegitea jar liezaioke Kutxabankek. Gero eta zabalduago daude horren inguruko zurrumurruak, eta eldiario.es komunikabideak atzo argitaraturiko albiste baten bitartez konfirmatu ditu.

Baieztatuko balitz, Kutxabankek Espainiako Auzitegi Gorenera joko luke EAEko Merkataritza Arloko Epaitegi guztiek eta orain dela gutxi Arabako Probintzia Auzitegiak jarri dizkioten zigorrei aurre egiten saiatzeko. Arabakoa estatuan IRPHa baliogabetuz probintzia auzitegi batek ebatzi duen lehen epaia da.

Azpimarratzekoa da epaitegietako zigor hauetaz gain pasa den otsailean Gasteizko Legebiltzarretik agindu zuzena jaso zuela Kutxabankek. Legebiltzarraren testuak IRPHa erabiltzen duten banketxe guztiei eskatzen die «utz diezaiotela bera aplikatzeari» eta «itzul diezazkietela pertsona kontsumitzaileei indize horretan erreferentziaturik kobratutako interes guztiak» eta baita «IRPHko edozein motatan erreferentziatutako hipotekak exekutatzeagatik utzarazitako etxebizitzak» ere. Legebiltzarraren testua oso gogorra da eta adierazten du «IRPH interes-tipoa opakoa dela, banketxeek eragin diezaioketena, merkatuaren errealitatea jasotzen ez duena eta argi-argiro kaltegarria kontsumitzaileentzat, eta abusuzkotzat jo beharrekoa».

Ondorioz, Kutxabankek Espainiako Auzitegi Gorenera jotzeak Legebiltzarraren aginduari desobeditzea suposatuko luke.

IRPH Stop Gipuzkoa plataformatik uste dugu eskandalagarria dela Kutxabank legebiltzarrari desobeditzen aurrena izatea, kontsumitzaileentzat hain kaltegarria den indizeari eusteko. Herritarren aurrezkiekin sorturiko aurrezki kutxetatik jaiotako banketxea, bere izaera eta helburu sozialak gorde beharko lituzkeena, ezin da izan banketxe guztien artean zitalena. Berriz ere Kutxabanken gaineko kontrol publiko eta soziala exijitzen dugu, eta bere pribatizazio prozesua salatu. Aurrezki kutxak banku-fundazio bihurtzea eta batez ere inolako kontrol publiko edo sozialik ez duten 15 kideren eskuetan uzteko erabakian atzera egin beharra dago berehala. Horrela bakarrik bermatuko dugu legebiltzarraren aginduaren aurkako desobedientzia hau bezalako beste astakeriarik ez egitea.

IRPH Stop Gipuzkoak dei egiten die legebiltzarkide taldeei Gasteizko Legebiltzarrean Gregoria Villalabeitiaren agerraldia premiaz eska dezaten.

Azkenik, Maite Ortiz eta José María Erauskin gure abokatuen lanean dugun konfiantza berresten dugu. Badakigu IRPHa abusuzkoa dela frogatuko dutela Espainiako Auzitegi Gorenean eta baita beste edozein auzitegiren aurrean ere.