Kutxaren administrazio kontseiluko kideei

140519_encab_carta

Idatzi hau bidali diegu:

Gipuzkoako IRPH Stop eta Kaleratzeak Stop plataformak berriz ere zuengana zuzentzen gara, datorren maiatzaren 29an ospatuko den Kutxaren administrazio kontseiluaren bilera dela eta.

Dakizuenez, orain dela gutxi Donostiako Merkataritza Arloko 1. Epaitegiak, bere 156/14 epaiaren bitartez, Kutxaren etxebizitza-mailegu batetan IRPH Cajas indizearen aplikazioa bertan behera utzi du. Epai hori gutun honi atxikita doa, zuen informaziorako.

Epai horrek gure bi plataformek hainbat alditan agerturiko jarrera babesten du. IRPHaren aurkako jarrera hau hainbat erakunde publikok babestu du gainera, eta erakunde horien artean Kutxaren fundatzaile diren erakundeak eta mahai horretan eseritzen zareten batzuk ordezkatzen dituzuen erakundeak daude. Zalantzarik ez dugu zuek guztiok erakunde horiek errespetatzen dituzuela, botere judiziala bezalaxe.

IRPHa erreferentzia indize nabarmenki irregularra eta gardentasunik gabea da, eta horrela frogatzen du IRPH Stop Gipuzkoa plataformak prestatu zuen txostenak. Txosten hori ere atxikita doa, zuen informaziorako.

Bistan denez, IRPHa kontsumitzailearentzat kaltegarria da gainera, eta bere aplikazioa abusuzkoa, goian aipaturiko epaiak ebatzi duen bezala.

Horiek horrela, behean sinatzen dugun bi elkarteok honako eskaerak ditudu Kutxabank eta bere arduradunentzat:

1. Epaiari helegiterik ez jartzea.
2. Epaia berehala aplikatzea, hemendik aurrera Euribor+%1 ordezkoa aplikatuz, eta baita atzerako eraginez orain arte IRPH arabera ordainduriko kuotei ere, bidegabe kobraturiko interesak itzuliaz.
3. Epaiaren aplikazioa IRPHaren edozein aldaeraren kaltedun guzti-guztiei zabaltzea.

Aurkakoa egitea entitate horrek agertu nahi duen erantzunkizun sozialaren aurka jotzea litzateke. Erabat bidegabea litzateke, herritarrak epaitegietara jotzera behartuko bailituzke euren eskubideen defentsan. Eta guztiz antisistema litzateke gainera, Kutxabank-en aurkako salaketek justizia administrazioa kolapsatuko bailukete.

Idatzi honen bidez, eskaera hauek Kutxaren administrazio kontseiluaren bileran eztabaidatuak izan daitezela eta Kutxaren batzar orokorrera eta Kutxabank-en administrazio kontseiluaren bilerara eramatea eskatzen dizuegu. Gainera, Kutxa-ren administrazio kontseiluaren bileran neurri hauek bozkatzeko eskatzen dizuegu:

1. Kutxa-k eskatu diezaiola formalki Kutxabank-i goiko hiru eskaerak onartzea.
2. Kutxa-ren administrazio kontseiluak eman diezaiela Kutxabank-en Kutxa-k dituen ordezkariei, hiru neurri horiek aktiboki babesteko agindua.
3. Kutxa-k abian jartzea helburu hau lortzeko bere esku duen neurri oro.

Adeitasunez,

Gobernuak ez du erantzuten eta IRPHaren gardentasun eza babesten du

1405_respuesta_gob

IRPH Stop plataformak oso larritzat jotzen du Amaiur koalizioak espainiar kongresuan IRPH erreferentzia indizeen kalkuloaren inguruan egin zituen galderei espainiar gobernuak eman dien erantzuna.

Gobernuak, bere ustezko erantzunean, ez dio eginiko hamabost galderetatik bat berari ere erantzuten. Galdera hauek IRPH Stop plataformak prestatu zuen eta IRPHaren kalkuluan dauden irregulartasunak agerian uzten dituen txosten batetan oinarrituta daude. Plataformak ulertzen du modu honetan gobernuak IRPHaren gardentasun gabezia babesten duela.

Gobernuaren idatziak ideia orokor batzuk kopiatzea besterik ez du egiten, eta azpimarragarria da horien artean erreferentzia indizeei eskatzen zaien eta IRPHak betetzen ez duen baldintza bat: “que no sean susceptibles de influencia por la propia entidad en virtud de acuerdos o prácticas conscientemente paralelas con otras entidades”.

Orain dela gutxi ezagutzera eman den Donostiako Merkataritza Arloko 1. Epaitegiaren epaiak, Kutxabanken hipoteka batetan IRPHaren aplikazioa abusuzkoa izateagatik bertan behera utzi zuenak, argi uzten du ez betetze hau, hitzez hitz ondorengoa esaten duenean: “resulta indudable que una de las partes, el prestamista, tiene la posibilidad de influir en el importe del índice tomado como referencia”.

Informazio gehiago: Amaiur koalizioaren galderak eta gobernuaren erantzuna, berria Amaiur koalizioaren webgunean, eta Telecinco eta Europa Press komunikabideetan.

IRPHa Kutxan: eta orain zer?

Azkenean epaitegiek arrazoia eman digute, eta Donostiako Merkataritza Arloko Epaitegiak Kutxaren hipoteka batetan IRPHa baliogabetu du, atzerako erainez, abusuzkoa delako. Gure elkartetik, Kaleratzeak Stop plataformarekin batera, Kutxaren Administrazio Kontsiluko kideei eskatu diegu epaia onartzeko, helegiterik ez jartzeko, eta IRPHaren kaltedun guztiei aplikatzeko. Hemen ikus dezakezu prentsa-oharra. Bertan, fede oneko zordunen aldeko neurriak hartzeko ere eskatzen diegu. Eta zer bozkatuko dute orain kontseiluko kideek? Hurrengo bilera hilabete honetan bertan izango da, maiatzean.

EH Bildu-ren zazpi ordezkariek beti babestu dituzte gure aldarrikapenak, eta orain ere halaxe egitea espero dugu.

PP, Donostiako udaletxean edota Batzar Nagusitan egin zuen antzerkitxoa salbu, beti indizie kriminal honen alde egon da, eta ondorioz bere ordezkariaren bozka ezin dugu espero.

PNV-k instituziotan babestu egin gaitu eta IRPHaren aurka hitzegin du askotan, baina adiministrazio kontseiluan beti IRPH mantentzearen alde egin du. Andoni Ortuzar bere presidenteak bozka bikoitz hau onartu zuen telebistan, eta beraz ez gara oso baikorrak beraien botoari dagokionean, nahiz eta hauteskunde kanpainan dauden.

PSE ere, PNV bezalaxe, hipokrita hutsa da gai honetan: jendaurrean IRPHaren aurka egiten dute baina administrazio kontseiluan bere alde bozkatzen dute. Epaia jakin bezain pronto Donostiako alkate ohia den Odón Elorzak Twitter bidez zoriondu gintuen, eta erantzun egin behar izan genion. Espero dugu beraien bozka behingoz aldatu eta euren diskurtsoarekin koherente izatea.

DYA-ren ordezkariak kargua utzi du, eta Pixkanaka sindikatuak beti egiten du IRPHaren alde.

CCOO sindikatuari dagokionean, orain arte beti defendatu dute IRPHa Kutxaren administrazio kontseiluan. Prentsa-ohar batetan Kutxabank-i eskatu diote epaia onartzeko, baina gezurra esan dute gai hau Kutxaren administrazio kontseiluan ez dela bozkatu esan dutenean. EH Bildu-ren aldetik kontseilari den Ainhoa Beolak eta EH Bildu-k berak erantzun egin zieten Twitter bidez sindikatuari eta bere buruzagi Unai Sordo-ri, eta guk ere bai. Baliteke Kutxak ezin izatea IRPH aplikatzeari uzteko erabakia hartzea, baina Kutxabank-i eska diezaioke, bankuaren %32-aren jabe da-eta. Gainera, Kutxaren administrazio kontseiluak Kutxabank-en administrazio kontseiluan dituen ordezkariei IRPHaren aurka egiteko agindue eman diezaieke. Beraz ez dugu aitzakiarik onartuko. CCOO-k bere prentsa-oharrarekin koherentze izan eta IRPHaren aurka bozkatu behar du Kutxaren administrazio kontseiluan.

IRPHa Gasteizko Legebiltzarrean eztabaidatuko da berriz ere

EH Bildu koalizioak ohar batetan adierazi du, eta Gara egunkariak zabaldu: Kutxaren hipoteka batetan IRPHa abusuzkotzat jo eta bertan behera utzi duen epaia Gasteizko Legebiltzarrean eztabaidatuko da laister. EH Bildu-ren ekimen bat da, eta bertan ondorengo hauek proposatzen dira:

Legebiltzarrak Kutxabank-i eskatzen dio epaia onartzeko eta helegiterik ez jartzeko, nabarmena baita IRPH indizearen abusuzko izaera eta ez baitu zentzurik herritarrak beraien eskubideen defentsan epaitegietara jotzera derrigortzeak.
Legebiltzarrak Kutxabank-i eskatzen dio aipaturiko epaia lehenbailehen aplikatzeko eta IRPHaren edozein aldaera duten bezero guztiei zabaltzeko, guzti-guztiei indize horren ordez Euriborra berehala aplikatuz, gehienez %1-ekoa izango den diferentzial batekin. Ordezkatzea beti ere atzera eraginez edo retroaktibitatez izango da, IRPH indizearen arabera ordainduriko kuota guztiak berriz kalkulatuz eta gehiegikeriaz kobraturiko dirua kaltetuei itzuliaz.
Legebiltzarrak gainerako finantza erakundeei eskatzen die haiek ere IRPHaren edozein aldaera utzi eta Euribor-arekin berehala ordezkatzeko, gehienez %1-ekoa den diferentzial batekin. Ordezkatze hau atzera eraginez edo retroaktibitatez izango da.
Legebiltzarrak Espainiako Gobernuari eskatzen dio oraindik indarrean dagoen IRPH Entidades delako indizea bertan behera uzteko, nabarmenak baitira bere kalkuluan dauden irregulartasunak, berriki abusuzkotzat joa izan den IRPH Cajas indizearen kasuan bezalaxe. IRPHaren aldaera guztien ordezko gisa Euribor-a ezartzeko eskatzen dio, gehienez %1-ekoa izango den diferentzial batekin.
Legebiltzarrak Jaurlaritzari eskatzen dio, IRPH indizea erabiltzen jarraitzen duten finantza erakundeekin harreman ekonomikoak etetea.

Gure plataformak bat egiten du bost puntu hauekin, eta talde politiko guztiak animatzen ditu baiezko botua ematera. Hala ere, gogoratu beharra dago lehen ere PNV eta PSEk babestu zutela Legebiltzarrean IRPHaren aurkako ekimen bat, non Kutxabank-i eskatzen zitzaion IRPH aplikatzeari uzteko… baina bi alderdi hauek Kutxabank barruan IRPHaren alde bozkatzen dute. Beraz Gasteizko eztabaida arreta handiz jarraituko dugu, baina ez gara han entzundakoekin fidatuko, eta Kutxa eta Kutxabank-en administrazio kontseiluen bileren zain egongo gara.

Nola eskatu zure dirua atzerako eraginez

Zure dirua atzerako eraginez nola eskatu azalduko dizugu hemen.

Hauteskunde kanpaina Twitter-en

Politikariak hauteskundeetarako bozka eske dabiltzala eta, IRPHaren inguruan europar parlamentuan egingo luketenaren inguruan galdetu diegu Twitter bidez (gogoratu Twitter-en @irphstop_gpzkoa garela). Oraingoz EH Bildu-ren hautagaiak bakarrik erantzun digu. Hautagai guztiek jakin behar dute 2014/17/UE direktibak hauxe dioela 24. artikuluan etxebizitza-maileguetan erabiltzen diren interes tipoen inguruan: “todo índice o tipo de referencia utilizado para calcular el tipo deudor sea claro, accesible, objetivo y verificable”. Argi dago IRPHak ez dituela baldintza hauek betetzen. Irakurri bestela gure txostena.