IRPHa interviú aldizkariaren azalean dago aste honetan, Toñi Tirado eta Rebeca Basoa borrokalariei esker. Elkarrizketa batetan (hemen duzu zati bat irakurgai), Rebecak eta Toñik modu arrazoituan eta adibide errazekin azaltzen dute zergatik den lapurreta bat IRPH indizea. Zorionak eta eskerrik asko zuen adoreagatik!
Aranzadi argitaletxe juridikoak Maite Ortiz eta José María Erauskin abokatuen IRPHaren inguruko lan bat argitaratu du. Maite eta Jose Mari, gure plataformari modu boluntarioan laguntzen dioten abokatuak, IRPHaren aurkako epaitegietako borrokan aitzindariak dira. Beraienak dira epai aitzindari guztiak, eta beraiek izango dira Espainiako Auzitegi Gorenean kaltetu guztion alde eigngo duten lehenak, euren kasu bat jadanik epaitegi horretara iritsi baita
Orain dela ia lau urte Maitek eta Jose Marik, gure plataformako familia baten izenean, IRPHa baliogabetzen lehena izan zen epaia ekarriko zuen salaketa jarri zutenean, gai hau guztiz ezezaguna zen. Liburu honen argitaratzeak abusuzko indize honen aurkako borrokak hartu duen garrantzia ikusteko balio du.
Liburuaren izenburua hauxe da: “Índice de referencia de préstamos hipotecarios (IRPH) – guía práctica para conseguir su nulidad” (ISBN 9788491771708). Egileek adierazi dute irabaziak izatekotan hauek animalien defentsara bideratuko dituztela, horixe baita beraien beste pasioetako bat.
Ikasturte berriaren hasierarekin batera, webgunea lekuz aldatu dugu: www.irphstop.plazan.net helbidetik www.irphstop.net berri honetara etorri gara.
Printzipioz horixe da aldaketa bakarra. Gainontzean, IRPHaren aurkako borrokan erreferentziako webgunea izaten darraigu, albeste interesgarrienekin, epaien datu-base onenarekin eta bankuari zenbat erreklamatu diezaiokezun jakinaraziko dizun kalkulagailu esklusiboarekin (kalkulagailua berritzekotan gara, bide batez)
Espero genuen bezala, IRPHaren inguruan Espainiako Auzitegi Gorenak aztertu beharko duen lehen kasua Probintzia Auzitegi batek IRPHa baliogabetzen zuen lehen epaiaren aurka Kutxabankek jarritako helegitea izango da. Arabako Probintzia Auzitegian kaltedun batek lorturiko epaia da, Maite Ortiz eta Jose Mari Erauskin abokatu aitzindariekin.
Abokatuek ezagutzera eman dutenez, Espainiako Auzitegi Gorenak kasuaren azterketa azkartzea erabaki du, IRPHa sortzen ari den eztabaida eta auzibide kopurua dela eta. Modu honetan, gaiari lehentasunezko tratua ematea erabaki du Gorenak. Helegiteen hurrenkera kronologikoa aldatzea dakarren neurri bat da, eta ondorioz aurretik ziren beste kasu batzuk baino lehenago aztertuko dute IRPHaren gaia. Modu honetan Auzitegi Gorenari dagokion eginkizun bateratzaileari erantzun azkarra bilatzen omen dute. Probintzia Auzitegi ezberdinek IRPHaren inguruan dituzten irizpide ezberdinak batzearen inguruan ari dira.
IRPHa estatu osoan 1.3 milioi mailegutik gora kaltetzen dituen abusuzko indizea da gure kalkuluen arabera, eta ondorioz asko eta asko dira Espainiako Auzitegi Gorenak IRPHa baliogabetzearen zain dauden familiak. Espainiako sistema judizialak dagoeneko behin baino gehiagotan erakutsi du banketxeen alde egiteko duen joera, baina hala eta guztiz ere baikor izan behar dugu, Maite eta Jose Marik ordezkatuko baikaituzte. Adituak izateaz gain, ilusio eta gogo handiz ekingo diotela badakigu. Horrelaxe egin dute azken hiru urte luze hauetan, 2014ko apirilean Donostian IRPHaren aurkako estatu osoko lehen epaia lortu zuten unetik, Kutxabanken aurka gure plataformako familia bate izenean aurkezturiko demandaren eskutik. Bidea luzea ari da izaten beraz, baina irabaziko dugu, IRPHaren kaltedunok arrazoia dugulako, eta gainera abokaturik onenak ditugulako: Maite eta Jose Mari, beharrezkoa balitz Europako Auzitegiraino jotzeko zalantzarik egingo ez dutenak.
Duela egun batzuk jakin genuen Maite Ortiz eta Jose Mari Erauskin abokatuek Arabako Probintzia Auzitegian IRPHa baliogabetuz lortu duten epaietako bat irmo egin dela. Epai honek UCI zigortzen du IRPHa aplikatuz kobraturiko guztiak itzultzera, eta mailegua interesik gabe uzten du.
UCIk helegiterik aurkeztu ez duenez, epaia irmoa da jada, eta kalteturiko familiari kobraturiko dirua itzuliko zaio eta aurrerantzean ez du inolako interesik ordainduko.
Guk dakigunez, IRPHa baliogabetzen duen bigarren instantziako bigarren epai irmoa da. Lehenbizikoa Kutxabank zigortzen zuen epai bat izan zen, hura ere Arabako Probintzia Auzitegian. Abusuzko indize honen aurkako epaitegietako borrokan aurrerapauso oso garrantzitsuak dira zalantzarik gabe.
Epaia eskuragarri dago gure webguneko Epaitegiak atalean, eta hemen klik eginda zuzenean ikusi dezakezu.
IRPHaren AURKAKO EPAITEGIETAKO BORROKAN AURRERAPAUSO GARRANTZITSUAK
PROBINTZIA AUZITEGI BERRIEK ABUSUZKO INDIZE HAU BALIOGABETU DUTE: MADRIL, ALIKANTE ETA SALAMANKAK ARABA ETA BIZKAIAREKIN BAT EGIN DUTE
GAINERA, ARABAKO PROBINTZIA AUZITEGIKO EPAI BAT IRMO BILAKATU DA
Donostia, 2017-6-5
IRPHaren aurkako borrokan berri oso garrantzitsuak izan dira azken egunotan.
Maileguentzako indize hau abusuzkotzat joa izan zen lehen aldiz orain dela hiru urte Donostian (2014ko apirilean), eta ordutik hona lehen instantziako epaitegietan IRPHa baliogabetuz ebatzi diren epaiak zenbatezinak dira jadanik. Hala ere, orain dela gutxi arte bi probintzia auzitegik bakarrik baieztatu zituzten IRPHaren aurkako epaiak. Araba eta Bizkaiko auzitegiak dira.
Orain, bi Probintzia Auzitegi horiei Madril, Alikante eta Salamankakoak batu zaizkie. Berriki ezagutu diren epaien bitartez, hauek ere IRPHa baliogabetu dute, abusuzkoa delako.
Oso berri onak dira IRPHaren kaltedunentzat. Indize honek 1.3 milioi hipotekatik gora kaltetzen ditu espainiar estatuan gure kalkuluen arabera. Epai hauekin kaltedunon posizioa indartzen da, Probintzia Auzitegi ezberdinen artean adostasunik ez dagoenez, Espainiako Auzitegi Gorenak erabaki bat hartu beharko du laster gaiaren inguruan, eta epai hauek oso garrantzitsuak dira kaltedunon posizioa indartzen baitute.
Araba eta Bizkaiko Probintzia Auzitegiek IRPHa baliogabetzen duten epaiak ebazten darraite bitartean, eta jakin dugunez Araban ebatzi den epaietako bat irmoa da jadanik. Antza denez Kutxabankek Gorenera helegitea aurkezteko prozesuan eperen bat ez du bete, eta horregatik egin da epaia irmo. Modu honetan, kasu hori itxita geratzen da, eta Kutxabankek kaltetuari IRPHa aplikatuz kobratu dion diru guztia itzuli beharko dio. Maileguak aurrera jarraituko du, baino inolako interes tiporik gabe.
Epaitegietatik kanpo, egoera askoz argiago dago, eta esan daiteke IRPHaren aurkako borroka morala jadanik irabazia dugula kaltedunok. Izan ere, IRPHa abusuzko klausulatzat hartua da, eta etxebizitza-mailegu berrietan ia ez da erabiltzen. Bere garairik onenetan, mailegu berrien %15ean erabiltzen zen.
Gainera, hainbat erakunde publikok jadanik agertu dute indize honen aurkako euren jarrera, udaletxe, diputazio eta parlamentu autonomikoak barne. Azpimarratzekoa da Gasteizko Legebiltzarraren adierazpena, IRPH Stop Gipuzkoa plataformaren agerraldi baten ondoren ebatzi baitzuen «IRPH interes-tipoa opakoa dela, banketxeek eragin diezaioketena, merkatuaren errealitatea jasotzen ez duena eta argi-argiro kaltegarria kontsumitzaileentzat, eta abusuzkotzat jo beharrekoa».
Adierazpen horrek indizeak dituen zenbait gabeziari egiten dio erreferentzia. Gabezia horiek Estatistika Aplikatuan Katedradun Akreditatua den Juan Etxeberria Murgiondo doktoreak eginiko txosten batetan aztertzen dira. Etxeberria doktoreak IRPH Stop Gipuzkoa plataformaren webgunean argitaratu zuen txosten hau, eta bertan ebazten da indizea ez dela batere sendoa, eta agerikoa dela hobetu daitekeela. Gaineratzen da bistakoa eta oso nabarmena dela entitate bakoitzak, bere tamaina edo bolumena edozein dela ere, IRPHaren hileroko emaitzan eragiteko ahalmena duela, eta ahalmen hori modu zehatzean zenbatu daitekeela.
Espainiako Bankuak berak, Ortiz eta Erauskin abokatuen galdeketa bati erantzunez, onartu zuen banketxeek IRPHaren emaitzan eragina izan dezaketela.
IRPH Stop Gipuzkoa elkartea baikorra da beraz, eta kaltedun guztiei dei egiten die eutsi dezaten eta borrokan jarraitu dezaten.
Aipaturiko epai guztiak eskuragarri daude jadanik gure webguneko Epaitegiak atalean (Madril, Alikante eta Salamankako epaiak eta baita Arabako epai irmoa ere)
