Gipuzkoatik kanpo IRPHa baliogabetu duen lehen epaia

justicia-irph

GIPUZKOATIK KANPO IRPHa BALIOGABETU DUEN LEHEN EPAIA

GUADALAJARAKO MERKATARITZA ARLOKO EPAITEGIAK KUTXABANK ZIGORTU DU

ARGUDIO JURIDIKOAK SENDOAK DIRELA FROGATZEN DA, ETA BERAZ ENTZUTEGI PROBINTZIALAK GIPUZKOAKO EPAIAK BAIEZTATZEA ESPERO DA

IRPH STOP GIPUZKOAREN TALDE JURIDIKOAK ERAMAN DU KASUA, BEREZIKI KALTETUTAKO FAMILIA BATEKIKO ELKARTASUNEZ

Donostia, 2014-12-3

Guadalajarako Merkataritza Arloko Epaitegiak Gipuzkoatik kanpo IRPHa baliogabetzen duen lehen epaia eman du. Zigorturiko entitatea Kutxabank da kasu honetan ere.

Gipuzkoan hogeita hamar epaitik gora eman ondoren, epai berri honek erakusten du kaltetuek erabiltzen dituzten argudio juridikoak sendoak direla, jadanik bi epaitegik onetsi baitituzte. Horregatik, IRPH Stop Gipuzkoa elkarteak uste du entzutegi Probintzialak Gipuzkoan Kutxabanken aurka eman diren zigorrak berretsi egingo dituela.

Guadalajarako kasuan, Gipuzkoako guztietan bezalaxe, justiziak IRPHaren aplikazioa baliogabetu du eta Kutxabank zigortu du atzerako eraginez IRPHren arabera ordainduriko kuota guztiak berriz kalkulatu eta salaketa jarri dutenei «bidegabe kobraturikoak itzultzera».

Guadalajarako kasua IRPH Stop Gipuzkoa elkartearen talde juridikoak eraman du, bereziki kalteturiko familia batekiko elkartasunez, Kutxabankekin negoziatzea ezinezkoa zela ikusi ondoren.

Ángel Torrecillak lan istripu bat jasan zuen 2011an eta langabezian dago orduz gero. Bere bikotekideak %55eko elbarritasuna du eta bi seme dituzte, bata adingabea eta bestea %86ko elbarritasuna duena. Hipotekari aurre egin ezinda zebiltzala eta, Kutxabankekin negoziatzen saiatu ziren, eta etxea ordainetan emateko prest zeuden, baina Kutxabankek sekula ez du fede oneko zordunekin negoziatzen eta kasu honetan ere berdin jokatu zuen. Epaitegietan Kutxabank garaitzea lortu ondoren, familia honen egoera zertxobait hobetuko da.

Gipuzkoatik kanpo eman den lehen epai honekin, Donostian hogeita hamar epaitik gora eman ondoren eta Gipuzkoako Entzutegi Probintzialak epaiak berretsiko dituela dirudien honetan, IRPH Stop Gipuzkoa elkarteak uste du epaitegietako borroka irabazi duela jadanik, eta egoera berdinean dauden familiei euren dirua itzultzeko exijitzen dio Kutxabanki, epaitegietara jotzera behartu gabe.

Gainera, elkarteak Xabier Iturberen dimisioa eskatzen jarraituko du. Kutxabankek IRPHaren aplikazioa luzatu zuen hainbat erakunderen deiari entzungor eginez, hala nola Gasteizko Legebiltzarra, Gipuzkoako Foru Aldundia eta hogeita hamar udaletxe baino gehiago. Orain epaitegiek diote ez zuela sekula aplikatu behar abusuzko indize hau. Xabier Iturbek, IRPHaren kudeaketa «bikaina» egin zuela esatera ausartu zenak, dimisioa eman eta Kutxaren presidente izateari utzi behar dio berehala.

Kutxabanken irabaziak eta IRPHaren kaltedunei itzuli beharrekoa dirutza berdina dira

kutxabank100-100

KUTXABANKEK IRAGARRI DITUEN 100 MILIOITAKO IRABAZIAK IRPHaren KALTEDUNEI ITZULI BEHARREKO DIRUTZAREN PAREKOAK DIRA

SINESTEZINA DA KUTXABANKEN PRENTSA-OHARRAK ITZULKETA NOLA EGIN BEHAR DUEN EZ AZALTZEA

KUTXABANKEN PRENTSA OHARRAK KONTRAKOA ADIERAZI ARREN, IRPH ENTIDADES APLIKATZEN JARRAITZEN DU

Donostia, 2014-12-1

Gaur Kutxabankek argitara eman duen prentsa-oharraren arabera, iraila bitarteko irabaziak 100 milioitakoak izan dira. IRPH Stop Gipuzkoa elkarteak adierazi nahi du kopuru horixe bera dela Kutxabankek IRPHa aplikatu zien familiei itzuli behar diena.

Elkarteak gogorarazi nahi du Gipuzkoan Kutxabanken aurka hogeita hamar salaketatik gora jarri zituela eta kasu guztietan justiziak arrazoia eman diola. Ondorioz, IRPH aplikatzea legediaren aurkakoa dela ebatzi da, eta Kutxabank zigortu da salaketa jarri dutenei «bidegabe kobraturikoak itzultzera».

Epai hauek ebazten izan den azkartasuna, argudio juridikoen sendotasuna eta epailearen eskarmentu handia ikusita (Edmundo Rodríguez Achútegui magistratua da Araban), IRPH Stop Gipuzkoa elkarteak uste du Entzutegi Probintzialak epaia baieztatu egingo duela. Ondorioz, egoera berdinean dauden 15.000 familiei euren dirua itzultzeko exijitzen diogu Kutxabanki, epaitegietara jotzera behartu gabe.

Elkartearen kalkuluen arabera, Kutxabankek guztira itzuli beharko duen dirutza 100 milioi eurokoa izan daiteke hain zuzen ere.

IRPH Stop Gipuzkoak gogorarazi nahi du dirutza hau bidegabe kobratu duela Kutxabankek, abusuzko indize bat aplikatuaz. Kopuru hauek itzultzeak ekarriko duena da kaltedunek euren maileguen hasieratik Euribor+1 ordaintzea, eta beraz Kutxabankek familia hauekin irabaziak izaten jarraituko du.

Hala ere, dirutza hori itzultzeak Kutxabanken kontuetan eragin nabarmena izango du, 2014 urteko lehen bederatzi hilabetetako irabazien kopuru berbera baita. Horregatik, elkarteak uste du axolagabekeria ikaragarria dela Kutxabanken gaurko prentsa-oharrak ez azaltzea 100 milioi horiek itzultzeari nola egin behar dion aurre.

IRPH Stop Gipuzkoak berriz ere adierazi nahi du itzultzearen kondizioak negoziatzeko prest dagoela. Kaltetuak itzuli behar zaien diruaren zati bat edo guztia euren maileguak amortizatzera bideratzeko prest egon daitezke, modu honetan Kutxabanken diru-kutxatik atera beharreko dirutza txikiagoa izan dadin. Negoziazioak hasteko baldintza bakarrak hauek dira:

1- Xabier Iturbek dimisioa ematea.
2- Etxebizitza galdu duten IRPHaren kaltedunei etxea itzultzea.
3- Etxegabetuak izan diren guztiei zorra kitatu eta alokairu sozial batez euren etxeetara itzultzen uztea, nahiz eta IRPHaren kaltedun ez izan.

Bestalde, Kutxabanken prentsa-oharrak gizartea engainatu nahi duela salatzen dugu. Bezeroei jadanik IRPHrik ez diela aplikatzen sinetsarazi nahi du, esaten duenean «IRPH indizeen ordezkapena» «azaroaren 1ean erabat amaitutako eragiketa» dela.

Izan ere, IRPH Entidades delako aldaera aplikatzen jarraitzen duela salatu nahi dugu, eta hau ere abusuzkoa dela. IRPH Cajas aldaera da aplikatzeari utzi dion bakarra. IRPH Entidades aldaerari lotuta dauden Kutxabanken mailegu kopurua txikiagoa den arren, gehienak babes ofizialeko etxebizitzei dagozkienak dira, eta ondorioz egoera ekonomikorik kaxkarrenean dauden familiak dira Kutxabanken eskutik IRPHaren abusua pairatzen darraitenak.

Kutxabankek 100 milioi euro itzuli beharko dizkigu

100meuro

IRPH STOP GIPUZKOAK USTE DU KUTXABANKEK IRPHaren KALTEDUNEI ITZULI BEHAR DIEN DIRUTZA 100 MILIOIKOA IZAN DAITEKEELA

ZENBATEKO HAU 2013KO IRABAZIEN PAREKOA DA

ELKARTEAK PRESIDENTE BERRIARI ESKUA LUZATU DIO DIRUA NOLA ITZULI NEGOZIATZEKO

XABIER ITURBEREN DIMISIOA ETA DESJABETURIKO ETXEBIZITZAK ITULTZEA EXIJITZEN DUGU

Donostia, 2014-11-28

IRPH Stop Gipuzkoa elkartearen kalkuluen arabera Kutxak Gipuzkoan masiboki aplikatu duen IRPH indizearen atzerako eraginezko baliogabetzeak Kutxabankek kaltedunei 100 milioi euro itzuli beharra izatea ekarriko du.

Elkarteak hogeita hamar garaipen judizialetik gora lortu ditu IRPHaren inguruan. Kasu guztietan justiziak ebatzi du IRPH aplikatzea legediaren aurkakoa dela, eta Kutxabank zigortu du atzerako eraginez IRPHren arabera ordainduriko kuota guztiak berriz kalkulatu eta salaketa jarri dutenei «bidegabe kobraturikoak itzultzera».

Kutxabankek lehenbiziko epaiari helegitea jarri zion arren, IRPH Stop Gipuzkoa elkarteak uste du Entzutegi Probintzialak epaia baieztatu egingo duela. Merkataritza Arloko Epaitegiak epai hauek ebazten erakutsi duen azkartasunak argi utzi du ez dagoela indizearen abusibitatearen gaineko zalantzarik. Kasu guztiak eraman dituen epailea, Edmundo Rodríguez Achútegui, magistratua da Araban eta eskarmentu handia du gai hauetan, eta beraz ez dirudi Entzutegi Probintzialak bere ikuspuntua txarretsi eta hogeita hamar epaitik gora baliogabetuko dituenik.

Ondorioz, epaitegietako borroka erabakita dagoela dirudi, eta IRPH Stop Gipuzkoa elkartetik egoera berdinean dauden 15.000 familiei euren dirua itzultzeko exijitzen diogu Kutxabanki, epaitegietara jotzera behartu gabe.

IRPH Stop Gipuzkoa elkarteak kalkulagailu bat prestatu du bankuak itzuli beharreko zenbatekoa kalkulatzeko, eta kalteturiko familiei dei egiten die kontuak egin ditzaten:

https://irphstop.eus/kalkulagailua-atzerako-eragina/

Elkarteak uste du Kutxabankek guztira itzuli beharko duen dirutza 100 milioi eurokoa izan daitekeela, banketxeak 2013an izan zituen irabazien parekoa. Gipuzkoan bakarrik 9.000 eta 16.000 artean egon daiteke kalteturiko familien kopura. Familia bakoitzarentzat, itzuli beharreko dirutza 10.000 eta 15.000 euro artean egon daiteke, eta beraz itzuli beharreko kopurua 200 milioikoa ere izan daiteke.

IRPH Stop Gipuzkoak gogorarazi nahi du dirutza hau bidegabe kobratu duela Kutxabankek, abusuzko indize bat aplikatuaz. Kopuru hauek itzultzeak ekarriko du familia hauek euren maileguen hasieratik Euribor+1 ordaintzea, eta baldintza hauek IRPHaren araberako maileguak sinatu zirenean ez ziren bereziki onak. Beraz Kutxabankek familia hauekin irabaziak izaten jarraituko du. Hala ere, eta jakinik dirutza hori itzultzeak Kutxabanken kontuetan eragina izango duela, elkarteak entitatearen presidente berriari eskua luzatu nahi dio itzultzea nola egin negoziatzeko.

Kaltetuak itzuli behar zaien diruaren zati bat edo guztia euren maileguak amortizatzera bideratzeko prest egon daitezke, modu honetan Kutxabanken diru-kutxatik atera beharreko dirutza txikiagoa izan dadin. Negoziazioak hasteko baldintza bakarrak hauek dira:

1- Xabier Iturbek dimisioa ematea. Kutxaren presidentea da bere gainbeheraren erantzule, eta IRPHaren kudeaketa «bikaina» egin duela esatera ausartu da.
2- Etxebizitza galdu duten IRPHaren kaltedunei etxea itzultzea.
3- Etxegabetuak izan diren guztiei zorra kitatu eta alokairu sozial batez euren etxeetara itzultzen uztea, nahiz eta IRPHaren kaltedun ez izan.

Erantzukizunez jokatzeko deia egiten diogu Kutxabanken presidente berriari, egoera lehenbailehen bideratu ahal izateko.

Dagoeneko 31 dira IRPHa baliogabetzen duten epaiak

macroj_recuento_31

DAGOENEKO 31 DIRA IRPHa BALIOGABETZEN DUTEN EPAIAK

ENTZUTEGI PROBINTZIALAK LAISTER EMANGO DU BERE IRITZIA, ETA EZIN DU EPAITEGIAREN AURKA EGIN

KUTXABANKEN TEILATUAN DAGO ORAIN PILOTA

GIPUZKOAN 15.000 FAMILIA DAUDE ERANTZUN BATEN ZAIN. XABIER ITURBEK DIMISIOA EMAN BEHAR DU

Donostia, 2014-11-25

IRPH Stop Gipuzkoak dagoeneko 31 garaipen judizial ditu Kutxabanken aurka, IRPHa baliogabetzen duten beste hainbeste epaiekin.

Kasu guztietan justiziak ebatzi du IRPH aplikatzea legediaren aurkakoa dela, eta Kutxabank zigortu du atzerako eraginez IRPHren arabera ordainduriko kuota guztiak berriz kalkulatu eta salaketa jarri dutenei «bidegabe kobraturikoak itzultzera».

Bi salaketa bakarrik daude epaiaren zain, eta agerikoa da Gipuzkoan dauden 15.000 familiek salaketa bana jarriko balute guztiek emaitza berbera izango luketela.

Kutxabankek lehenbiziko epaiari helegitea jarri zion arren, IRPH Stop Gipuzkoa elkarteak uste du Entzutegi Probintzialak epaia baieztatu egingo duela. Merkataritza Arloko Epaitegiak 31 epai hauek ebazten erakutsi duen azkartasunak argi utzi du ez dagoela indizearen abusibitatearen gaineko zalantzarik. Kasu guztiak eraman dituen epailea, Edmundo Rodríguez Achútegui, magistratua da Araban (laguntza lanetan dabil Donostiako Epaitegian) eta eskarmentu handia du gai hauetan, eta beraz ez dirudi Entzutegi Probintzialak bere ikuspuntua txarretsi eta hogeita hamar epaitik gora baliogabetuko dituenik.

Xabier Iturbe Kutxaren degenerazioaren erantzule da, gipuzkoarrok gipuzkoarrentzako sorturiko kutxa bat izatetik herritarrok epaitegietan babesa eskatzera behartzen gaituen entitate bat izatera pasa delarik.

Xabier Iturbek Gipuzkoako gizartearen aurrean agerraldia egin behar du, honako hauek iragarriz:

1.- Kalteturiko familia guztiei IRPHarekin kobraturiko interesak itzultzea.
2.- Bere dimisioa.

Beste edozein jokabide, antisozial izateaz gain, antisistema era izango litzateke, Gipuzkoan bakarrik epaitegiek 15.000 salaketekin gainezka egingo bailukete.

Dagoeneko 20 dira IRPHa baliogabetzen duten epaiak

macroj_recuento_20

HAMAIKA EPAI BERRIK KUTXABANK ZIGORTU ETA IRPHa BALIOGABETU DUTE

DAGOENEKO 20 DIRA NORABIDE HONETAN EMAN DIREN EPAIAK

MERKATARITZA ARLOKO EPAITEGIAREN AZKARTASUNAK ERAKUSTEN DU ABUSUA NABARMENA ZELA

ENTZUTEGI PROBINTZIALAK LAISTER EMANGO DU BERE IRITZIA, ETA EZIN DU EPAITEGIAREN AURKA EGIN

Donostia, 2014-11-24

Gaur IRPHa baliogabetzen duten hamaika epai berri argitaratu dira, eta dagoeneko ezagunak zirenekin batera jadanik 20 dira Donostiako Merkataritza Arloko Epaitegiak Kutxabanken aurka eman dituen zigorrak.

Kutxabankek lehenbiziko epaiari helegitea jarri zioen eta Entzutegi Probintzialaren epaiaren zain dago kasua, baina hala ere Merkataritza Arloko Epaitegia azkartasun handiz ari da epaiak ematen. Honek garbi erakusten du arrazoi juridikoak indartsuak direla. Horregatik, IRPH Stop Gipuzkoa elkarteak uste du Entzutegi Probintzialak, oso epe motzean emango duen epaiarekin, zigor hauek baieztatu egingo dituela, epaitegi espezializatu batek eta izen handiko epaile batek emanak baitira (Edmundo Rodríguez Achútegui magistratua da Araban eta laguntza lanetan dabil Donostiako Epaitegian)

Ondorioz, epaitegietako borroka Gipuzkoan erabakita dagoela dirudi, eta IRPH Stop Gipuzkoa elkartetik Kutxabanki exijitzen diogu egoera berdinean dauden 15.000 familiei euren dirua itzultzeko, epaitegietara joan eta epaitegiak kolapsatzera behartu gabe.

María Jesús Egido (PSE) eta Eider Mendoza (PNV) batzarkideei gutun irekia

Donostia, 2014-11-20

María Jesús, Eider,

Azaroaren 5ean Batzar Nagusitako bilkuran gu egon izanarekin deseroso zeundetela eta saioa grabatu ahal izanak gogaitu egin zintuztela ikusi genuen. Egun hartan PNV eta PSE-k, PP-rekin batera, IRPHaren biktima guztiei justizia egitearen aurka bozkatu zenuten. Zuen bozkak lotsarazten zaituztela dirudi, eta zoriondu egin nahi zaituztegu. Badakizue modu desegoki eta gaitzesgarrian ari zaretela, eta ona da hori onartzea, modu inplizituan bada ere. Aurrerapausoa da.

Bestalde, zuen hitzalditan esandako batzuk ezin ditugu komentatu gabe utzi.

Zuk, María Jesús, Batzar Nagusiek onarturiko 90/2013 ebazpena aipatu zenuen, 2013ko azaroaren 1etik aurrera IRPH Cajas indizea Euribor+1-ekin ordezkatzeko eskatzen zuena, «legeak ezarririko epean». Zein lotsa gutxi duzun!

Kaltedunok ez dugu ahazten ebazpen hori, 2013ko azaroaren 6an onartua izan zela, PSE eta PNV-k elkarrekin idatzi zenutela, eta zuk azaldu zenuela, azpimarratuaz helburua «presioa egitea» zela, ordezkatzea berehala izan zedin, errebisioari itxaron gabe.

Egun batzuk geroago, Kutxaren Administrazio Kontseiluan ohikoa errepikatu zen: EH Bilduk IRPH Cajas Euribor+1 indizearekin berehala ordezkatzea proposatu zuen, eta PNV, PSE, PP, CCOO eta Pixkanakak aurka egin zuten.

Hori dela eta, 2014ko urtarrilaren 15eko Batzar Nagusien osoko bilkurak gaia berriz ere aztertu zuen, eta Eider Mendozak (PNV) argitu zuen 90/2013 ebazpenak zuk azaldu zenuenaren aurkakoa esan nahi zuela. Eiderren arabera, IRPHa hurrengo errebisioan ordezkatzea eskatzen zen, eta ez lehenago.

Modu honetan PNV-k zuk esandakoak erabat ezeztatu zituen, eta zuk ez duzu ezertxo ere esateko duintasunik izan. Kutxak ebazpen hori bete ez izanaren berririk ez zenuela esatera iritsi zinen.

Baina atzerago joan eta 2013ko ekainaren 14ean aurkeztu zenuen ebazpen proposamena gogora dezakegu, non Kutxabanki eskatzen zenion «IRPHa berehala ordezkatzeko». Beraz 2013ko ekainean berehala ordezkatzea eskatzen duzu, azaroan ere bai, baina 2014ko urtarrilean jadanik ez. Gidoiak hala eskatuta, PNVren memelo baliagarria zara.

Izan duintasun apur bat. Eman dimisioa eta zoaz etxera.

Zuk, Eider, esan zenuen Kutxabanki IRPH Entidades indizea aplikatzeari uzteko eskatzeak ez zuela zentzurik, legezkoa delako (eztabaidagarria da), eta indarrean jarraitzen duelako (egia da).

Kutxabankek baliogabetua dagoen edota legez kanpokoa den indize bat aplikatuko balu ez genuke zuregana joko, epaitegietara baizik (eta hori ere egin dugu). Zuri itxura batean legezkoak diruditen bidegabekeriak konpontzen saiatzeko ordaintzen dizugu. Gogoratu adibidez nola 2013ko uztailaren 4ean zure batzarkide taldeak testu bat erregistratu zuen IRPH Cajas berehala ordezkatzeko eskatuaz, orduan oraindik legezkoa izan eta indarrean egon arren… Baina jakina, beste garai batzuk ziren. Hipokrisia eta paripearen garaiak. IRPHaren aurkako borroka babestearen itxura egiten zenuten Kutxabanken barruan IRPHa aplikatzen jarraitzearen errudun zineten (eta zareten) bitartean. Orain, azkenean, mozorroa kendu duzue.

Esan zenuen baita ere IRPHa aplikatzeak ez dakarrela derrigorrean hipoteka ordaintzeko arazoak izatea. Eta zer? Kreditu-txartela lapurtuko balizute, eta hilean 300 euro atera, suposatzen dugu ez zinela goseak akabatuko, baina ez zenuke onartuko, ala? Ba horixe.

Azkenik, esan zenuen IRPHak hilero ematen diren hipoteken bataz besteko interesa irudikatzen duela, eta barregarri geratu zinela esan behar dizugu.

2014ko uztailaren 4ean gure elkarteko abokatu batek Batzar Nagusitan agerraldia egin zuen eta oso argi azaldu zuen IRPHaren gabezia hau, beste askoren artean. Baina zu ez zinen saioan izan, nahiz eta lehendakari lanak egitea zegokizun, eta egun hartan piper egin izanagatik orain barregarri geratu zara. Baina lasai, azalduko dizugu zergatik IRPHak ez duen ordezkatu beharko lukeen bataz bestekoa ordezkatzen. Hori bai, saio harri dagokion zure soldataren zatia itzuli iezaguzu mesedez.

Hasteko, begira Espainiako Bankuaren datuekin eginiko grafiko honetan nola IRPHa beti hipoteken interesen bataz bestekoaren gainetik dagoen.

Zergatik uste duzu izan daitekeela? IRPHa ez da bataz besteko haztatu edo ponderatua, eta ez du merkatuaren errealitatea jasotzen. Tori adibide bat: demagun hilabete bat non hipoteken %70a %2an ematen den, %20a %2,5ean eta gainontzekoa interes handiagotan. Bataz bestekoa %2,29koa litzateke.

Adibide horretan, 7 entitate baldin baditugu, bakoitza kolore batetan, bataz besteko haztatuak %2,29 izaten jarraitzen du.

Baina IRPHak ez du entitate bakoitzaren pisua neurtzen, eta guztiei pisu berdina ematen die. Gure adibidean, ondorengo hau da argazkia, eta bataz bestekoaren emaitza %3,93 litzateke.

Bistan denez, %3,93 batek ez du merkatuaren errealitatea adierazten, hipoteken %97a interes tipo baxuagoetan baitago.

IRPHa haztatu gabeko bataz bestekoa baino altuagoa dela azaltzen jarrai genezake, kaltetuok birritan ordaintzen ditugun komisioak barne dituelako. Eta bere kalkuluak beste irregulartasun batzuk ere badituela edota entitateek emaitzan oso erraz eragin dezaketela ere azaldu genezake. Baina ez dizuegu denbora gehiago kendu nahi, azken finean guk ordaintzen dizuegu eta.

Adeitasunez,

IRPH Stop Gipuzkoa