Kutxabankek Gorenera jo du Arabako epaiaren aurka

salvavidas3

KUTXABANKek HELEGITEA JARRI DIO IPRHa BALIOGABETU ETA KOBRATURIKO INTERESAK ITZULTZERA ZIGORTZEN DUEN ARABAKO AUZITEGIAREN EPAIARI

ESPAINIAKO AUZITEGI GORENERA ZUZENDURIKO HELEGITEAN KUTXABANKek GASTEIZKO LEGEBILTZARRAK OPAKO, KALTEGARRI ETA ABUSUZKOTZAT JO ZUEN IRPHa BABESTEN DU

IRPH STOP GIPUZKOAren USTEZ DESOBEDIENTZIA JARRERA HAU KRIMINALA DA, ETA VILLALABEITIAren AGERRALDIA ESKATU DU

KUTXABANKek DBHko IKASLEEI EMATEN DIZKIEN IKASTAROAK BERTAN BEHERA UZTEKO ERE ESKATU DU

Donostia, 2016-4-22

IRPH Stop Gipuzkoak gaur egiaztatu ahal izan duenez, Kutxabankek Espainiako Auzitegi Gorenera zuzenduriko helegitea aurkeztu du IRPH Cajas eta IRPH Entidades indizeak baliogabetu eta salaketa jarri zuenari kobraturiko interesak itzultzera zigortu zuen Arabako Probintzia Auzitegiaren epaiaren aurka. Azken asteetako zurrumurruak baieztatu dira beraz.

Bere helegitean Kutxabankek IRPHaren alde egiten du, orain dela gutxi Legebiltzarrak interes tipo hau «opakoa dela, banketxeek eragin diezaioketena, merkatuaren errealitatea jasotzen ez duena eta argi-argiro kaltegarria kontsumitzaileentzat, eta abusuzkotzat jo beharrekoa dela» adierazi zuen arren.

Modu honetan, Kutxabankek Espainiako Auzitegi Gorenera jo du besteak beste EAEko Merkataritza Arloko Epaitegi guztiek eta orain dela gutxi Arabako Probintzia Auzitegiak jarri dizkioten zigorrei aurre egiten saiatzeko. Eta helegite hori jartzean otsailean Gasteizko Legebiltzarretik jaso zuen agindu zuzenari entzungor egiten dio. Izan ere, Legebiltzarraren testuak banketxeei eskatzen die «utz diezaiotela IRPHa aplikatzeari» eta «itzul diezazkietela pertsona kontsumitzaileei indize horretan erreferentziaturik kobratutako interes guztiak», eta baita «IRPHko edozein motatan erreferentziatutako hipotekak exekutatzeagatik utzarazitako etxebizitzak» ere.

IRPH Stop Gipuzkoa elkartearen ustez, Kutxabankek abusuzko indize honen babesean hartu duen Legebiltzarrarekiko jarrera desobediente hau kriminala da, desegokia eta gaitzesgarria baita. Gaur sekula baino ozenago Kutxabanken gaineko kontrol publiko eta soziala aldarrikatu eta bere pribatizazioa salatzen dugu. Aurrezki kutxak banku-fundazio bihurtzeko eta inolako kontrol publiko eta sozialik ez duten kudeatzaileen esku jartzeko erabakian atzera egin beharra dago.

IRPH Stop Gipuzkoak bi eskari konkretu dituen gutuna bidali die gaur bertan Gasteizko legebiltzarkide taldeei. Batetik, Gregorio Villalabeitiaren premiazko agerraldia galdegiteko eskatzen diegu.

Eta bestetik, Kutxabank Araba, Bizkai eta Gipuzkoako DBHko ikasleei ematen ari zaien ustezko prestakuntza finantzarioko saioak bertan behera utz ditzan Hezkuntza Sailari zuzenduriko ekimen parlamentario bat eskatu diegu. Legebiltzarrari desobedientea den banketxe kriminal bat ezin dugu gure eskoletan eduki, eta berehala kaleratua izan behar da.

Izan ere, hau ez da IRPHaren inguruan Legebiltzarretik jaso duen agindu bat desobeditzen duen lehen aldia: 2013ko ekainean Legebiltzarrak eskatu zion desagertzekotan zen IRPH Cajas aplikatzeari utzi eta bere kontratu batzuetan aurreikusia zegoen Euribor+1 berehala aplikatzeko. Kutxabankek ez zuen aldaketa berehala egin eta IRPH Cajas indizearen aplikazioa ahalik eta gehien luzatu zuen, bere desagerpen ofizialetik urte bete haratago.

Eta epaitegietan berriz, Kutxabankek hainbat zigor jaso ditu, baita IRPHa engainatzeko asmo argiz erabiltzeagatik ere, Gipuzkoako Probintzia Auzitegiak berretsi zuen epai batek ebatzi zuenez.

Legebiltzarrari behin eta berriz desobeditu eta hainbat aldiz kondenatua izan den banketxea da beraz. Hezkuntza Sailak ikastetxeetara sartzen uztea onartezina da. Berehalako kaleratze bat exijitzen dugu, eta ikastetxetan Kaleratzeak Stop elkarteko kideekin hitzaldiak antolatzeko aukera aztertzea gomendatzen dugu.

Abokatuak Kutxabanken balizko helegiteaz aritu dira komunikabideetan

Arabako Probintzia Auzitegiak IRPHa baliogabetu eta Kutxabank kobraturiko interes guztiak itzultzera zigortzen duen epaiari helegitea jar diezaioke Kutxabankek, eta komunikabideek Maite Ortiz eta José María Erauskin abokatuen iritziak jaso dituzte.

Legebiltzarra desobedituz Auzitegi Gorenera joko du Kutxabankek

Logo_naranja_tx

KUTXABANKek IPRHa BALIOGABETU ETA KOBRATURIKO INTERESAK ITZULTZERA ZIGORTZEN DUEN ARABAKO AUZITEGIAREN EPAIARI HELEGITEA JAR LIEZAIOKE ESPAINIAKO AUZITEGI GORENEAN

GASTEIZKO LEGEBILTZARRAREN AGINDUA DESOBEDITUKO LUKE HORRELA

KUTXABANKen GAINEKO KONTROL PUBLIKO ETA SOZIAL EZA SALATU ETA VILLALABEITIAren AGERRALDIA EXIJITZEN DU IRPH STOP GIPUZKOAk

Donostia, 2016-3-29

IRPH Cajas eta IRPH Entidades indizeak baliogabetu eta Kutxabank salaketa jarri duenari kobraturiko interesak itzultzera zigortzen duen Arabako Probintzia Auzitegiaren epaiari helegitea jar liezaioke Kutxabankek. Gero eta zabalduago daude horren inguruko zurrumurruak, eta eldiario.es komunikabideak atzo argitaraturiko albiste baten bitartez konfirmatu ditu.

Baieztatuko balitz, Kutxabankek Espainiako Auzitegi Gorenera joko luke EAEko Merkataritza Arloko Epaitegi guztiek eta orain dela gutxi Arabako Probintzia Auzitegiak jarri dizkioten zigorrei aurre egiten saiatzeko. Arabakoa estatuan IRPHa baliogabetuz probintzia auzitegi batek ebatzi duen lehen epaia da.

Azpimarratzekoa da epaitegietako zigor hauetaz gain pasa den otsailean Gasteizko Legebiltzarretik agindu zuzena jaso zuela Kutxabankek. Legebiltzarraren testuak IRPHa erabiltzen duten banketxe guztiei eskatzen die «utz diezaiotela bera aplikatzeari» eta «itzul diezazkietela pertsona kontsumitzaileei indize horretan erreferentziaturik kobratutako interes guztiak» eta baita «IRPHko edozein motatan erreferentziatutako hipotekak exekutatzeagatik utzarazitako etxebizitzak» ere. Legebiltzarraren testua oso gogorra da eta adierazten du «IRPH interes-tipoa opakoa dela, banketxeek eragin diezaioketena, merkatuaren errealitatea jasotzen ez duena eta argi-argiro kaltegarria kontsumitzaileentzat, eta abusuzkotzat jo beharrekoa».

Ondorioz, Kutxabankek Espainiako Auzitegi Gorenera jotzeak Legebiltzarraren aginduari desobeditzea suposatuko luke.

IRPH Stop Gipuzkoa plataformatik uste dugu eskandalagarria dela Kutxabank legebiltzarrari desobeditzen aurrena izatea, kontsumitzaileentzat hain kaltegarria den indizeari eusteko. Herritarren aurrezkiekin sorturiko aurrezki kutxetatik jaiotako banketxea, bere izaera eta helburu sozialak gorde beharko lituzkeena, ezin da izan banketxe guztien artean zitalena. Berriz ere Kutxabanken gaineko kontrol publiko eta soziala exijitzen dugu, eta bere pribatizazio prozesua salatu. Aurrezki kutxak banku-fundazio bihurtzea eta batez ere inolako kontrol publiko edo sozialik ez duten 15 kideren eskuetan uzteko erabakian atzera egin beharra dago berehala. Horrela bakarrik bermatuko dugu legebiltzarraren aginduaren aurkako desobedientzia hau bezalako beste astakeriarik ez egitea.

IRPH Stop Gipuzkoak dei egiten die legebiltzarkide taldeei Gasteizko Legebiltzarrean Gregoria Villalabeitiaren agerraldia premiaz eska dezaten.

Azkenik, Maite Ortiz eta José María Erauskin gure abokatuen lanean dugun konfiantza berresten dugu. Badakigu IRPHa abusuzkoa dela frogatuko dutela Espainiako Auzitegi Gorenean eta baita beste edozein auzitegiren aurrean ere.

Probintzia Auzitegi batek IRPHa baliogabetu du lehen aldiz!

justicia-irph

PROBINTZIA AUZITEGI BATEK IRPHa BALIOGABETZEN DUEN EPAIA EBATZI DU LEHEN ALDIZ

ARABAKO AUZITEGIAK IRPH ENTIDADES ETA IRPH CAJAS BALIOGABETU DITU

KUTXABANK KOBRATURIKO INTERES GUZTIAK ATZERAKO ERAGINEZ ITZULTZERA ZIGORTUA IZAN DA

IRPH STOP GIPUZKOAK USTE DU EPAI HISTORIKOA DELA, ETA KALTETURIKO FAMILIA GUZTIEI DIRUA ITZULTZEKO PROZEDURA ABIAN JARTZEKO ESKATU DIO KUTXABANKi

Donostia, 2016-3-15

Maite Ortiz eta José María Erauskin abokatuek gaur ezagutzera eman duten epaia IRPHa baliogabetuz Probintzia Auzitegi batek ebatzi duen lehena da. Orain artean lehen instantzian hainbat epai izan dira IRPHaren aurka, baina gaur ezagutu dena Probintzia Auzitegi batek eman duen lehena da, eta Araban ebatzia izan da Kutxabank zigortuaz.

Aurrez Gipuzkoako Probintzia Auzitegiak 40 kasu baino gehiago aztertu zituen. Tartean ziren IRPHaren aurka estatuan lortu ziren lehen epaiak, Ortiz eta Erauskin abokatuen lan boluntarioarekin IRPH Stop Gipuzkoa elkarteak lortuak. Kasu horietan guztietan Gipuzkoako Probintzia Auzitegiak epaiak bertan behera utzi eta IRPHa onetsi zuen. Honek bakardade egoera gero eta nabarmen eta susmagarriagoan jarria du Gipuzkoako Auzitegia, izan ere estatuko merkataritza arloko hainbat epaitegik IRPHa baliogabetzen jarraitu dute. Arabako epaia historikoa da, eta Gipuzkoako Probintzia Auzitegiaren isolamendua azpimarratzera dator.

Gaur ezagutu den epaiak maileguak erreferentziatzat zuen IRPH Entidades indizea baliogabetzen du abusuzkoa delako, eta baita ordezko bezala aurreikusia zeukan IRPH Cajas ere. Ondorioz, mailegua inolako interesik gabe geratzen da, eta salaketa jarri duenak ez du batere interesik ordainduko. Epaiak, gainera, Kutxabanken kontratuetan ohikoak diren beste abusuzko klausula batzuk ere baliogabetu ditu, adibidez %15etik gorako berandutze interesak.

Zigor honen ondorioz, Kutxabankek kobraturiko interes guztiak itzuli beharko ditu, atzerako eraginez. Kasu honetan 75.000 eurotik gorako dirutza da Kutxabankek itzuli beharrekoa.

IRPH Stop Gipuzkoa plataformatik oso balorazio baikorra egiten dugu epai historiko honen inguruan, eta sekula hasi behar ez zen borroka judizial bati amaiera emango diola espero dugu. Banketxe guztiek, eta batez ere Kutxabankek, bere jatorri eta ustezko gizarte helburuak direla eta, epaitegietan helegiteak jartzeko bidea utzi behar dute. Guztiek hasi behar dute IRPHa aplikatuz kalteturiko familia guztiei kobraturiko interes guztiak itzultzen. Gainera, IRPHari loturiko hipotekak exekutatzearen ondorioz desjabeturiko etxebizitza guztiak euren jabeei itzuliak izan behar dira lehenbailehen.

Azpimarratzekoa da epai hau ezagutu baino lehentxeago, pasaden otsailaren 4ean, Gasteizko Legebiltzarreko osoko bilkurak zera adierazi zuela: «IRPH interes-tipoa opakoa dela, banketxeek eragin diezaioketena, merkatuaren errealitatea jasotzen ez duena eta argi-argiro kaltegarria kontsumitzaileentzat, eta abusuzkotzat jo beharrekoa». Legebiltzarrak, gainera, banketxeei eskatu zien «itzul diezazkietela pertsona kontsumitzaileei indize horretan erreferentziaturik kobratutako interes guztiak» eta baita «IRPHko edozein motatan erreferentziatutako hipotekak exekutatzeagatik utzarazitako etxebizitzak» ere.

Legebiltzarrak onarturiko testuak Lakuari eta Kontsumobideri dei zuzena egiten zien, eta ondorioz kalteturiko familiok espero dugu neurriak hartuko direla iruzur honi behin betiko amaiera emateko.

IRPHa aplikatzeagatik Kutxabanken aurkako lehen epaia Bilbon

IRPHa BALIOGABETU ETA KUTXABANK ZIGORTZEN DUEN LEHEN EPAIA BILBON

KUTXABANKek 40 ZIGORTIK GORA JASO DITU IRPH APLIKATZEAGATIK EAEko HIRU HIRIBURUETAKO EPAITEGIETAN

GIPUZKOAKO PROBINTZIA AUZITEGIAK DONOSTIAKO EPAIAK BERTAN BEHERA UZTEN DITU, BAINA GERO ETA ISOLATUAGO DAGO IRPHaren DEFENTSAN

Donostia, 2016-1-21

Valentziako epaitegi batek IRPHa baliogabetzen duen lehen epai irmoa ebatzi duela jakin eta bi egun bakarrik igaro direnean, IRPHaren aurkako borrokan aitzindari diren Maite Ortiz eta José María Erauskin abokatuek IRPHa aplikatzeagatik Kutxabanken aurkako Bilboko lehen epaia eman dute ezagutzera euren webgunean.

2016ko urtarrilaren 15eko data du epaiak (gure webguneko “Epaitegiak” atalean eskuragarri dago jadanik), eta Kutxabank IRPHa aplikatzeagatik dagoeneko EAEko hiru hiriburuetako epaitegiek zigortu dutela esan nahi du.

Kutxabank zigortu zuen legen epaitegia, estatuan IRPHa baliogabetu zuen lehen epaia ere izan zena, Donostiako Merkataritza Arloko Epaitegiak eman zuen. Izan ere, Kutxa da abusuzko indize hau EAEn gehien erabili duen entitatea. Baina Donostiaren atzetik Gasteizen Vital Kutxaren aurkako zigor bat etorri zen, eta orain BBK izan da zigortua Bilbon. Hiru kutxetako maileguetan IRPHa aplikatzeagatik izan da beraz zigortua Kutxabank.

Gipuzkoako Probintzia Auzitegiak Donostian IRPHa baliogabetzen duten epai guztiak bertan behera uzten ditu, baina ikusteke dago beste probintziatako auzitegiek zer egingo duten. Izan ere, Donostiako Merkataritza Arloko Epaitegiaren doktrina, Probintzia Auzitegiak behin eta berriz baliogabetu duen arren, beste hiri askotako epaitegiek balekotzat jo dute. Horrela, Gasteiz eta Bilboz gain Bartzelona, Guadalajara edota Valentziako Merkataritza Arloko Epaitegiek ere Donostiako bidetik egin dute, eta IRPHa baliogabetu dute. Kasu guztietan IRPHaren aurkako salaketak ontzat hartuak izan dira, eta azpimarratzekoa da epaile hauen artean gutxienez hiru magistratuak direla.

Gipuzkoako Probintzia Auzitegia nabarmenki isolatuta geratzen ari da berazn, eta susmagarria dela uste dugu IRPH Stop Gipuzkoa elkartetik.

Espainiako Bankuak berak entitateek IRPHarengan eragina izan dezaketela onartu duen honetan, eta estatu guztiko Merkataritza-Arloko Epaitegiek IRPHa baliogabetzen darraiten bitartean, Gipuzkoako Probintzia-Auzitegiak IRPHa babesten du, ondorengo bi argudio hauek bezalako arrazoi barregarri eta eskandalagarriak erabiliaz gainera:
1, ez omen dela manipulazioa frogatu, nahiz eta epaitzen dena ez den hori, baizik eta entitateek eragina izateko aukera hori izan baduten ala ez.
eta 2, ez omen da Euriborra baino manipulagarriagoa. Hau gezurra izateaz gain barregarria ere izan daiteke: lapur bat libre uzteko nahikoa arrazoi ote da hura baino okerragoak egotea?

Jarrera horren atzean nolabaiteko presioak egongo ote diren susmoa daukagu, bestela ezin baita ulertu. Izan ere, gure kalkuluen arabera estatuan 1,3 milioi familia baino gehiago kaltetzen dituen milioi askoko iruzurra da hau. Kaltedun guztiek dute kalte hori konpontzeko eskubidea, eta horregatik exijitzen dugu premiazko konponbide bat kobratu diren interes guztiak eta desjabetu diren etxeak kalteturiko familiei itzuliak izan daitezen.

IRPHa baliogabetzen duen lehen epai irmoak Gipuzkoako Probintzia Auzitegia gero eta isolatuago uzten du

IRPHA BALIOGABETZEN DUEN LEHEN EPAI IRMOA

DONOSTIAN HASI ETA GIPUZKOAKO PROBINTZIA AUZITEGIAK BAKARRIK BAZTERTZEN DUEN DOKTRINAREKIN BAT EGIN DU VALENTZIAKO EPAITEGIAK

GIPUZKOAKO PROBINTZIA AUZITEGIA IRPHaren BABESEAN GERO ETA ISOLATUAGO, MODU SUSMAGARRIAN

Donostia, 2016-1-19

Duela gutxi jakin da Valentziako Merkataritza-Arloko hirugarren Epaitegiak 2015eko azaroaren 18an IRPHa baliogabetuz ebatzi zuen epai bat, aldeek helegiterik ez jartzean, IRPHa abusuzkoa izateagatik baliogabetzen duen lehen epai irmo bilakatu dela.

IRPH Stop Gipuzkoak epaia ikusi ahal izan du (dagoeneko Epaitegiak atalean duzu eskuragarri) eta ikusi duenez Valentziako epaitegiaren ebazpenak estatuan IRPHa baliogabetu zuen lehen epaiko argudioak erabiltzen dituela. Lehen epai hura plataforma honen abokatuek lortu zuten Donostian, 2014ko maiatzare 7an. Valentziako epaiak Donostiakoaren zatiak hitzez hitz erabiltzen ditu, zalantzarik gabe ezartzen du IRPHa influentziagarria dela eta abusuzkoa delako baliogabetzen du.

Epai honekin 40tik gora dira jadanik Donostia, Guadalajara, Bartzelona eta Gasteizen ebatzi diren IRPHaren aurkako epaiak, eta gutxienez sei dira IRPHa abusuzkotzat hartu duten epaileak. Guztiek babesten dute modu honetan Edmundo Rodríguez Achútegi magistratuaren doktrina, zeinek hogeita hamar epaitik gora ebatzi zituen IRPHa baliogabetuz.

Azpimarratzekoa da epai hauetariko asko eta asko Gipuzkoako Probintzia Auzitegiak herrialde honetan ebatzi ziren epai guztiak bertan behera utzi ondoren ematen ari direla. Argi ikusten da beraz Merkataritza-Arloko Epaitegiek ez dutela Gipuzkoako Probintzia Auzitegiaren ikuspegiarekin bat egiten eta bere aurka agertzen direla. Izan ere, IRPHa baliogabetzen jarraitzen dute, Probintzia Auzitegiak bertan behera utzitako epaiak oinarritzat hartuta.

Probintzia Auzitegia nabarmenki isolatuta geratzen ari da bere jarrerarekin, eta susmagarria dela uste dugu IRPH Stop Gipuzkoa elkartetik. Espainiako Bankuak berak entitateek IRPHarengan eragina izan dezaketela onartu duen honetan, eta estatu guztiko Merkataritza-Arloko Epaitegiek IRPHa baliogabetzen darraiten bitartean, Gipuzkoako Probintzia-Auzitegiak IRPHa babesten du, ondorengo bi argudio hauek bezalako arrazoi barregarri eta eskandalagarriak erabiliaz gainera:
1, ez omen dela manipulazioa frogatu, nahiz eta epaitzen dena ez den hori, baizik eta entitateek eragina izateko aukera hori izan baduten ala ez.
eta 2, ez omen da Euriborra baino manipulagarriagoa. Hau gezurra izateaz gain barregarria ere izan daiteke: lapur bat libre uzteko nahikoa arrazoi ote da hura baino okerragoak egotea?