Egilea: admin

IRPH: Espainiako Bankuak justiziarekin elkarlanean aritzeari uko egin dio

topsecret

IRPHaren inguruko sekretismo eta gardentasun eza neurri zentzugabeetara iritsi da. Espainiako Bankuak ezezko borobila eman dio Donostiako epaitegi baten informazio eskaerari, IRPH Entidades aplikatzeagatik Kutxabanken aurkako salaketa baten harira.

Kutxabank izan zen proba bezala Espainiako Bankuaren txosten bat eskatu zuena, IRPHaren manipulazioagatik inolako zigor-espedienterik egon den zehaztuz. Suposatzen dugu Kutxabankek espero zuela inolako zigorrik egon ez dela esango zuen txosten bat jasotzea. Azpimarratzekoa da horrelako txosten batek ere ez liokeela inolako arrazoirik emango, bi arrazoi nagusi hauek medio:

  1. Espainiako Bankuak esango balu inongo manipulaziorik ez duela ezagutzen (gertatu ez den hipotesia), honek ez luke frogatuko inoiz gertatu ez denik.
  2. Inolako manipulazioaren frogarik ez balego ere (eta ez dakigu horrela den), honek ez luke arrazoi ukaezin bat baliogabetuko: banketxeek indizean eragina izan dezakete, eta eragiteko aukera izate hutsak (berdin dio bidegabe eragitera iritsi diren ala ez), indizea indarrean dagoen araudiaren kontrakoa izatea dakar. Hauxe da epaitegi berberak Kutxabanken beste hipoteka batetan IRPHa baliogabetzeko erabili zuen argudio nagusia.

Baina ezustekoa Espainiako Bankuaren erantzunarekin iritsi da, sekretu profesionalaren argudioarekin uko egin baitio epaitegiari entitateek Espainiako Bankuari hilero ematen dioten informazioa eta gai honen inguruan inolako zigor-espedienterik egon denaren inguruko informazioa emateari. IRPH Stop Gipuzkoa elkarteak dokumentu hau eskuratu du, eta hemen ikus dezakezu.

Nabarmena da Espainiako Bankuaren erantzuna ez dela Kutxabankek espero zuena, indizearen gardentasun ezaren inguruko gure salaketak indartu egiten baititu. Badaude gainera irregulartasun gehiago, eta gure IRPH txostenean azaltzen ditugu guztiak.

IRPH Entidades aplikatzeagatiko salaketa honi dagokion bista irailaren 22an ospatuko da Donostian, eta elkarte honek espero du IRPH Cajas indizearekin lortutako emaitza berbera lortzea: IRPH bertan behera uztea eta Kutxabank zigortzea bidegabe kobraturiko interesak itzultzera.

Europa IRPHa ezabatzeko lanean dabil

eu

Egia esan ez da beharrezkoa. Izan ere, IRPHaren kalkulua hain da lapurreta nabarmena, idarrean dagoen legedi espainiarra urratzen duela. Hori ebatzi du Donostiako epaiak: bankuek emaitzan eragina izan dezaketela esan du, eta Kutxabank zigortu du IRPH Cajas indizearekin ordainduriko kuota guztiak Euribor+1 erabiliz kalkulatu eta diferentzia kaltetuei itzultzera.

Epaitegietan borrokatuz IRPHaren aldaera guztiak ezabatu eta lapurturikoa itzultzea lortuko dugula uste dugu. Baina ez da bidezkoa milioitik gora familiak epaitegietara jo behar izatea euren eskubideen defentsan. Horregatik, IRPH Stop Gipuzkoa taldetik beste bide batzuk lantzen ditugu. Horrexegatik jarri gara kontaktuan Europar Komisioarekin, eta IRPH indizearen irregulartasunak azaltzen dituen gure txostena helarazi diegu. Komisioak arretaz hartu du txostena, baina esan digu gaur egun ezin duela estatu mailako erreferentzi indizeen inguruan ezer egin. Hala ere, etorkizunean estatu guztiek bete beharko duten Erreferentzia Indizeen inguruko Europar Araudi baten berri eman digu.

Araudi honen zirriborro bat iadanik idatzi dute, proposamen modura, eta Europar Kontseilu eta Parlamentuaren arteko eztabaidagai da oraintxe bertan. IRPH Stop Gipuzkoa taldeak dokumentu hau eskuratu du (hemen ikus dezakezu, espainolez), eta bertan IRPHak betetzen ez dituen baldintzak sartuko dituztela egiaztatu du:

  • Kalkulurako erabiliko diren datuek merkatua zehazki eta fidagarritasunez jaso beharko dute.
  • Kalkulurako erabiliko diren datuek eskaintza eta eskariaren konpetentzia-indarrei loturiko merkatu bat erakutsi beharko dute.
  • Erreferentzia indizearen kalkulurako metodo sendo eta fidagarria erabiliko da.
  • Administratzaileak datuak eta kalkulurako metodoa gardentasunez garatu, erabili eta kudeatuko ditu.

Edozein kasutan, IRPH Stop Gipuzkoa elkartetik hobekuntzak proposatuko ditugu, araudi berriak baldintza konkretuagoak izan ditzan.

Behin betiko testuak 2015 urteko haseran prest egon beharko luke, eta handik urtebetera indarrean sartu. Espainiar legediak araudi berria barne hartu ondoren, derrigorrez bete beharko da, eta momentu horretan IRPH Entidades oraindik indarrean balego gardenagoa den beste indize batekin ordezkatua izan beharko luke.

Kutxabanken irabazien inguruko balorazioa

lupa

Donostia, 2014-8-29

Idatzi bateratu honen bitartez, Gipuzkoako Kaleratzeak Stop eta IRPH Stop elkarteek Kutxabankek bere irabazietan ezagutzera eman duen %57ko igoeraren inguruko gure balorazioa heralazi nahi diogu gizarteari.

Gure elkarteek ez dute inolaz ere Kutxabanken irabazietan murrizketarik desio. Izan ere, irabazi hauek teorian gizarte ekintzara zuzenduko dira. Behin baino gehiagotan adierazi dugu PNV, PSE eta PPko buruzagiak gauzatzen ari diren eta gizartearentzat lapurreta nabaria den Kutxabanken pribatizazioa eta gizarte ekintzaren likidazioaren aurkako herri mugimenduari gure babesa eta atxikimendua.

Baina ez dugu irabaziak edozein modutan bilatzea onartuko, eta horregatik oso gogor salatu behar ditugu Kutxabankek 76 milioi euro horiek lortzeko erabiltzen dituen bideak. Gizarteak jakin behar du Kutxabankek, irabazi horien berri ematen duen bitartean, Errenterian Eva eta bere adingabeko alabaren kaleratzea eskatu duela. Kaleratze hau edozein momentutan gerta liteke, eta gure elkarteek eskura ditugun tresna ez biolento guztiak erabiltzeko asmoa dute hori ekiditeko.

Eva eta alabarena bezalako etxegabetzeak exekutatzeaz gain, epaitegietan etxegabetze eskaerak egiten jarraitzeaz gain eta etxea ordainetan hartu eta alokairu soziala ukatzeaz gain, Kutxabankek abusuzko klausulak aplikatzen darrai, eta bere agirian IRPH indizeen ordezkatzeak edota zoru-klausulak bertan behera uzteak taldearen mozkinen gainean duen eragin negatiboagatik kexu agertzeko ausardia izan du. Adierazpen hori nazkagarria da. Abusuzko klausula hauen bidez kobraturikoak itzultzeko asmoa erakutsi edota barkamena eskatu beharrean, etorkizunean irabazteari utziko dionagatik kexu ageri da.

IRPHaren kasuan, gogoratu behar da Kutxabankek abusuzko indize hau aplikatzen jarraitzen duela, Gasteizko Legebiltzarretik, Gipuzkoako Batzar Nagusi eta Foru Aldundutik eta hogeitik gora udalbatzatik jasotako deialdiei entzungor eta trufa eginez. Gainera, dagoeneko badago epai bat Kutxabank IRPH Cajas indizearekin kobraturiko guztiak atzerako eraginez itzultzera zigortu duena, eta 30 salaketatik gora daude epaiketa zain. Irailaren 22an ospatuko da Donostian horietako bati dagokion epaiketa, kasu honetan IRPH Entidades indizea aplikatzeagatik.

Gainera, hipoteka hilero garaiz ordaintzeko zailtasunak dituzten familia kaltetuenei Kutxabankek oraindik ere posizio zordunak galdegiteagatiko komisioa eta berandutze interesak kobratzen dizkie. Bi klausula hauek abusuzkoak direla-eta epaitegietan baliogabetuak izan dira, eta berriki Audientzia Probintzialak baliogabetze hau berretsi du. Berrespen hau exekuzio hipotekario baten barruan eman da, non Lorena eta bere alabari babes ofizialeko etxebitza kendu dien Kutxabankek, Errenterian baita ere, eta kaleratzeko arriskuan daudelarik hauek ere. Beraz, milaka kaltedunek Kutxabank epaitegietan salatu dezakete abusuzko klausula hauek baliatuz diru gehiago ez kobratzeko, baina bankuak aplikatu egiten ditu hala ere, kalteturiko familia gehienek ez baitakite euren eskubideen berri edo ez baitaukate Kutxabank epaitegietan salatzeko baliabiderik.

Modu honetan, eta bankuaren datuen arabera, Kutxabankek egunero milioi bat euroko diru sarrerak ditu komisiotan. Badakite komisio horietako batzuk legez kanpokoak direla, baina aplikatu egiten dituzte, eta aplikatzeari uztera behartuta dauden horien inguruan kexu agertzen dira.

Eta testuinguru honetan, berriki jakin dugu Kontuen Epaitegiak ikerketa zabaldu duela Kutxabankek alderdi politiko bati barkatu dizkion 10 milioi euroen inguruan. Nazkagarria da alderdi politikoei milioika euro barkatzea larrialdian dauden familien babes ofizialeko etxebizitzak enkantera ateratzen dituen bitartean, Donostian Marian eta bere seme-alabena kasu.

Ez dugu amore emango errudunak epaitu eta zigortuak izan artean.

BAI, POSIBLE DA.

IRPHaren aurkako udazken beroa

udazkena

Udazkena oso bero dator Gipuzkoan IRPHaren aurkako borrokan, batez ere epaitegietan eta batez ere Kutxabanken aurka:

  • Irailaren 22a: IRPH Entidades aplikatzeagatik Kutxabanken aurkako salaketari dagokion epaiketa. Kutxabankek behin baino gehiagotan esan du ez duela IRPH Entidades aplikatzen baina gezurra da eta epaiketa hauxe da froga. Kasu honen garrantzia dela eta, estatu guztiko kaltetuak etorriko dira Donostiara egun honetan.
  • Azaroaren 10 eta 17a: IRPH Stop Gipuzkoa elkarteko kideek IRPH Cajas aplikatzeagatik Kutxabanken aurka aurkezturiko 36 salaketei dagozkien aurretiko bistak.
  • Datarik gabe: PNV, PSE eta PPren erabakiz, Kutxabakek helegitea jarri zion IRPHa Euribor+1 indizearekin atzerako eraginez ordezkatzera zigortu zuen epaia (kaltetuei dirua itzuliaz). Helegite honen aurrean Gipuzkoako Probintzia Auzitegian bista ospatzea eskatu dugu eta data ezarri zain gaude.

Eremu politikoan, Gipuzkoako Batzar Nagusitan laister PSEren proposamena eztabaidatuko da, non Diputazioak IRPHaren kaltedunoi diru publikoa aurreratzeko proposatzen den. Proposamen hau Kutxako administrazio kontseiluan duen bozkaren bitartez IRPHa defendatzen duen alderdi batetik dator eta pailazokeri hutsa da. Beno, pailazokeria ez, kontraesana da: