Dekalogoak izan dituen atxikimenduen aurkezpena

150325adhesiones_decalogo

Gaur Donostian Etxegabetzeen, pobreziaren eta berdintasunik ezaren aurkako dekalogoak izan dituen atxikimenduen berri eman dugu, Araba, Bizkaia eta Gipuzkoako Kaleratzeak Stop plataformekin batera.

Dekalogo honen seigarren puntuak IRPHaren aldaera guztiak bertan behera uztea eta indize hauekin kobraturiko diru guztia itzultzea eskatzen du, eta honako alderdiek babestu dute: EH BILDU, EZKER ANITZA, PODEMOS, EQUO eta zenbait herritako GANEMOS/IRABAZI plataformek. Hemen duzu argitara eman dugun oharra:

PRENTSA-OHARRA

ETXEGABETZEAK, POBREZIA ETA BERDINTASUNIK EZAREN AURKAKO NEURRIEN DEKOLOGOAK JASOTAKO ATXIKIMENDUEN INGURUAN

ETA HURRENGO MOBILIZAZIOEN BERRI EMATEKO

Donostia, 2015eko martxoaren 25ean

Araba, Bizkaia eta Gipuzkoako KALERATZEAK STOP eta IRPH STOP Gipuzkoa elkarteok balorazio baikorra egiten dugu etxe-gabetzeak, pobrezia eta berdintasunik ezaren aurkako neurriak jasotzen dituen eta alderdi politiko eta koalizio guztiei otsailean helarazi zitzaien dekalogoak izan dituen atxikimenduen inguruan.

Atxikimendua eman duten alderdiak hauek dira: EH BILDU, EZKER ANITZA, PODEMOS, EQUO eta zenbait herritako GANEMOS/IRABAZI plataformak. Gainera, PSE-EE alderdiak bere atxikimendu partziala erakutsi dio dekalogoko zenbait punturi. PSE-EEk ez du babesten abusuzko IRPH indizearekin kobraturikoak itzultzea, eta ez da harritzekoa, alderdi honek Kutxabankek indize hori aplikatzeari behin baino gehiagotan eman dion babesa kontuan izanik. Kutxabanken pribatizazioan atzera egin eta bere kontrol publiko eta soziala bermatzea ere ez du babestu.

Dekalogoari babesa adierazi diote baita ere ELA, LAB, ESK eta STEE-EILAS sindikatuek, DUINTASUNA eta GEPE pentsiodunen elkarteek eta Berri-Otxoak, SOS Arrazakeria Araba, Mugarik Gabe, Zero Pobrezia, Lanbidek Kaltetuak, Ongi Etorri, ASVE eta ATAWASOL bezalako elkarte sozialek. Honek erakusten du gizarteak baduela sentsibilitatea, eta erantzule politikoei benetako konponbideak exijitzen dizkiela.

Neurri hauek abian jartzea exijitzeko mobilizazioak abian jartzea erabaki dugu. Horrela, etxegabetzeen aurka eta fede oneko zordunek eta euren berme-emaileek benetako bigarren aukera izan dezaten, MARTXOAREN 27an, OSTIRALEZ, ELKARRETARATZERAKO DEIA EGITEN DUGU, Kutxabankek Bilbon duen egoitza nagusiaren aurrean, goizeko 11tan. Kutxabanken egoitza aukeratu dugu, hau baita etxebizitza-mailegu gehien dituen entitatea, etxe-gabetze gehien egin dituena, IRPHa gehien aplikatzen duena eta bezeroei bigarren aukera bat gehien ukatzen diena, etxea ordainetan hartu eta alokairu soziala ematea bezalako neurriei muzin eginez, nahiz eta helburu sozialekin sortua izan zen eta nahiz eta PNV, PSE, PP eta CCOO-ren kontrolpean dagoen.

Pobreturiko zordunek, euren familiarteko eta berme-emaileek, krisi edo iruzur finantzario honen ondorioak pairatzen dituzte. Langabezia, negozioak ixtea, pobrezia eta etxebizitza galtzeko arriskua ere badakar guzti honek. Horregatik gertatzen dira gure adiskide Mirenena bezalako gertakari lazgarriak, eta horrexegatik exijitzen diegu banketxe eta gobernuei bigarren aukera bat.

Gainera, ETXERIK GABEKO JENDEA ETA JENDERIK GABEKO ETXEEN arazoari aurre egiteko, PREMIAZKOA DA ETXEBIZITZA LEGE BALIAGARRI BAT EAEn, eta ondorioz Legebiltzarraren barruan eta kanpoan mobilizatzen jarraituko dugu, eta laster egingo ditugu deialdi berria Gasteizko Legebiltzarraren aurrean elkarretaratzea egiteko lege hori eztabaidatzen den egunean.

Dei egiten diogu gizarteari, atxikimendua eman duten alderdi eta gizarte-eragileei, mobilizazioetan aktiboki esku hartu dezaten.

BAI, AHAL DA.

#DEPMiren – Miren, gogoan zaitugu

MIRENEN HERIOTZA ETA FEDE ONEKO MILAKA ZORDUNEN EGOERA LATZA SALATZEN DITUGU

BANKETXEAK ERRUDUNAK DIRA, ETA GOBERNUAK EUREN JOKAERA KRIMINALAREN LAGUNTZAILE

NAFARROAKO MOBILIZAZIOEKIN BAT EGIN ETA DONOSTIA, BILBO ETA GASTEIZEN ELKARRETARATZEAK DEITZEN DITUGU

Euskal Herria, 2015-3-23

Araba, Bizkaia eta Gipuzkoako Kaleratzeak Stop eta IRPH Stop Gipuzkoa elkarteok asteburu honetan gertatu den gure adiskide Mirenen heriotza salatzen dugu. Familiarteko eta lagunei gure elkartasuna adierazi nahi diegu, eta baita Nafarroako Kaleratzeak Stop plataformari eta LAB sindikatuari ere.
Jarraitu irakurtzen

Helegitea jarri dugu, IRPHa Auzitegi Gorenak eta Europak epai dezaten

150312_recursoTS

Gaur Gipuzkoako Probintzia-Auzitegiaren aurrean agerraldia egin dugu, jarri dugun helegitearen berri emateko. Helegite honen bidez, IRPHa Espainiako Auzitegi Gorenak eta Europakko Justizia Auzitegiek epaitzea lortuko dugu. Hauxe da agerraldian zagutzera eman dugun komunikatua:

KUTXABANKen IRPHa MAILA GORENEKO EPAITEGIETAN EPAITUA IZANGO DA

AUZITEGI GORENERA JOKO DUGU, EUROPAKO EPAITEGIEI GALDERA EGINEZ

GURE HELBURUAK: IRPHa BALIOGABETU ETA LAPURTURIKOA ITZULTZEA

ABUSU HONEN ERANTZULE POLITIKOAK SALATZEN DITUGU

Donostia, 2015-3-12

Gipuzkoako IRPHaren kaltedunen elkartea, Kaleratzeak Stop plataformaren babesarekin, Probintzia-Auzitegi honetan abusuzko IRPH indizearen aurka jarriko dugun helegitearen berri ematera gatoz.

Epaitegietako borroka luzea izaten ari da. IRPHa baliogabetzen duten hogeita hamar epaitik gora lortu dugu. Justiziak arrazoia eman digu eta Kutxabank zigortu du indize honen arabera bidegabe kobraturikoak atzerako eraginez itzultzera. Baina Gipuzkoako Probintzia-Auzitegiak epai hauen artean lehena bertan behera utzi du, eta ondorioz Espainiako Auzitegi Gorenera joko dugu, Europar Batasuneko Justizia Epaitegiari aurretiko galdera eginez gainera.

Maite Ortiz eta José María Erauskin buru dituen gure talde juridikoak oraintxe azalduko ditu gure argudio juridikoak. Baina abusu honen erantzule politikoak ere salatu nahi ditugu. IRPHak 1,3 milioitik gora familia kaltetzen ditu estatu espainiarrean, eta banketxe ugarik aplikatzen dute. Baina hemen, Euskal Autonomia Erkidegoan eta batez ere Gipuzkoan, Kutxa da, orain Kutxabank, indize hau krudelkeria handiz aplikatu diguna.

Gipuzkoarrok gipuzkoarrontzat sorturiko aurrezki kutxetatik datorren entitatea izan da abusu hau bereziki aplikatu duena, ahalik eta gehien luzatu duena eta gaur egun aplikatzen jarraitzen duena. Guztion artean eta guztiontzat sortu genuen erakundeak epaitegietan geure burua defendatzera eraman gaitu. Eta astakeria honen errudun Kutxabanken erantzule politikoak dira: PNV, PSE eta PP, Kutxaren administrazio kontseiluan emandako botoekin espresuki eta behin baino gehiagotan IRPHaren abusuari babes eman diotenak. Sufrimendu gehiegi eragin duen abusua, zenbait adiskide etxea galtzeraino.

Horregatik epaitegietan borrokan jarraituko dugu, IRPH guztiak baliogabetu artean. Errudunentzat epaiketa eta zigorra exijitzen dugu.

Bai, ahal da.

ARGUDIO JURIDIKOAK

IRPH Cajas izeneko indizea Espainiako Bankuak kalkulatzen zuen hilero, guztira 46 ziren Aurrezki Kutxek hilabete horretan euren hipoteka-bezero berriei ezarririko interesekin bataz besteko sinple bat eginaz.

Espainiako Bankuak egiten zuen bataz besteko horrek ez zuen Aurrezki Kutxa bakoitzaren bezero kopurua kontuan hartzen, eta ondorioz pisu espezifiko berdina ematen zien Caixabankek eta Pollensako Aurrezki Kutxak aplikaturiko interes tipoei. Ondorioz, kalkulaturiko bataz bestekoak ez zuen inola ere espainiar estatuko merkatuaren errealitatea islatzen.

46 Aurrezki Kutxei pisu espezifiko berdina ematean, horietako bakoitzak bazekien bere eragina 1/46 zela, eta ondorioz Kutxabankek bazekien bere bezero berriei interes tipoa puntu bat igotzearekin bere bezero zaharrei IRPH Cajas indizea 0,0217 puntu igotzea lortu zezakeela.

2013ko abenduaren 2an gure adiskide Juanmi eta Karmenek Donostiako Merkataritza Arloko 1. epaitegian jarri zuten auzibidea onartua izan zen. Kutxabankekin zuten etxebizitza-maileguko IRPH Cajas indizearen baliogabetzea eskatzen zen abusuzkoa izateagatik.

Donostiako Merkataritza Arloko epaitegiak frogatutzat jo zuen Kutxabankek IRPH Cajas indizearen gainean eragina izan zezakeela, eta 2014 apirilaren 29an epaia ebatzi zuen interes tipo hau baliogabetuz eta Kutxabank gure adiskideei IRPH aplikatuaz kobraturiko guztiak itzultzera zigortuaz. Ondoren, IRPH Stop elkarteko beste 32 kidek auzibide berdina aurkeztu zuten, eta guztiak izan ziren epaitegitan berretsiak, Juanmi eta Karmenen kasuan bezalaxe.

Kutxabankek helegiteak jarri zizkien epai hauei guztiei Gipuzkoako Probintzia-Auzitegian, eta horien arteko lehenaren kasuan Merkataritza Arloko Epaitegiaren epaia atzera bota du Probintzia-Auzitegiak. Auzitegiak esan du IRPH Cajas indizea ezin dela abusuzkoa izan legezko tipo bat delako, bere manipulagarritasuna ez dela nahikoa frogatu, eta entitateak bere emaitzan «nolabaiteko eragina» (espainolez, literalki, «cierta influencia») izan dezakeela onartu arren, esan du eragina izateko aukera hau ez dela euriborra bezalako beste kasuetan egon daitekeena baino handiagoa.

IRPH Stop Gipuzkoa plataformak uste du legezko interes tipo bat izateak ez duela bermatzen manipulagarria ez izatea. Modu berean, ezin dugu onartu Kutxabankek indizearen emaitzan izan dezakeen eragina nahikoa ez frogatu izana, formula eta grafikoen bidez frogatu baitugu.

Ezin dugu ulertu Probintzia-Auzitegiak Kutxabankek IRPH Cajas indizearen gainean «nolabaiteko eragina» izan dezakeela onartu eta hala ere interes tipoa ez baliogabetzea. Izan ere, nolabaiteko eragina baldin badago arrazoia ematen digu, horixe baita gure auzibidearen muina, eta ez baitauka inolako garrantzirik eragin hori handia, txikia, nahikoa edo gehiegizkoa izateak.

Azkenik, bere manipulagarritasuna euriborrarena baino handiagoa ez balitz ere honek ez luke IRPH Cajas abusuzko izatetik salbatuko. Eta edozein kasutan euriborraren kalkulurako prozedurak ez du IRPHarenarekin inolako zerikusirik.

Horregatik Espainiako Auzitegi Gorenaren aurrean prozesuan arau-hauste bat izan delako ezohiko helegitea aurkeztu dugu, eta onartua izan bitartean, Europar Batasuneko Justizia Auzitegiari honako galdera egitea ere eskatzen da:

93/13/CEE direktibaren 3.1 artikulua gardentasunerako eta banku-zerbitzuen erabiltzaileen babeserako urriaren 28ko 2899/2011 ministerio-agindua bezalako estatu mailako arau baten aurkakoa ote den. Izan ere, arau horrek finantza-entitateei kontsumitzaileekin ezartzen dituzten etxebizitza-maileguetan IRPHa bezalako interes tipoa ezartzea ahalbidetzen die, zeina bataz besteko sinple eta ez haztatu baten bidez kalkulatzen den, entitate horiek beraiek emandako interesekin. Eta ondorioz horietako bakoitzak, guztiek pisu espezifiko berdina dutenez, zehaztasun aritmetikoz ezagutzen du bere jokabideak indize horretan izan dezaken eragin zuzena.

Helegitea jarriko dugu, Gorenera eta Europara

Gipuzkoako Probintzia-Auzitegiak atzera bota zuen IRPHa baliogabetzen zuen lehen epaia, Kutxabank abusuzko indize honekin kobraturiko guztiak itzultzera zigortu zuena.

Probintzia-Auzitegiaren epaia aztertu ondoren, gure talde juridikoak Espainiako Auzitegi Gorenera jotzea erabaki du, arrazoia baitugu: IRPHa abusuzkoa eta kriminala da. Gainera, Europar Batasuneko Justizia-Epaitegiari galdera egiteko eskatuko dugu.

Zatoz helegite honen aurkezpena babestera. IRPHaren abusua Europako epaitegietara eramango dugu, milaka kalteturen mesedetan.

Eguna: martxoaren 12an, ostegunez.
Ordua: 10:30
Lekua: Gipuzkoako Probintzia-Auzitegia (San Martin kalea, 41 – Donostia)

Bai, ahal da.

Zenbat gara? 40.000 Hego Euskal Herrian eta 1,3 milioi estatuan

Espainiako Estatistika Institutu Nazionalaren eta Erregistradoreen Kolegioaren datuak gurutzatuaz, IRPH Stop Gipuzkoa elkarteak IRPH mailegu kopuruaren gaineko lehen estatistika egin du. Emaitza, 1,3 milioi kaltetu baino gehiago. Atentzioa eman digu Catalunyak duen IRPH kopurua (442.000 kasu, estatu osoaren %34a), eta baita Hego Euskal Herrian ez gaudela IRPH kopuru handienak dituztenen artean (31.000 kasu Euskal Autonomia Erkidegoan eta 9.000 Nafarroako Foru Erkidegoan)

Kalkulua egiteko 1994 eta 2014 urteen artean etxebizitzen gaineko mailegu berrien datuak hartu ditugu Espainiako Estatistika Institu Nazionalaren estatistikatik, eta Erregistradoreen Kolegioak emandako IRPH portzentaiekin konbinatu. Emaitza azken 20 urteetan IRPHaren arabera sinaturiko kontratu kopurua da. Daturik ez zegoen tarteetan estimazio kontserbadoreak egin dira, eta IRPHaren lehenbiziko lau urteak ez ditugu kontuan hartu (1990tik 1994ra). Ondorioz, kaltetu kopurua kalkulatu dugun 1,3 milio baino handiagoa izango da ziur asko.

Villalabeitiaren soldata iraingarria da

fdez_ta_villalabeitia

KALERATZEAK STOP ETA IRPH STOP ELKARTEEN USTEZ KUTXABANKEKO PRESIDENTEAREN SOLDATA IRAINGARRIA DA

“NOR IZAN DEN” GALDETU ETA KONTROL PUBLIKO ETA SOZIALA EXIJITZEN DUTE

Euskal Herria, 2015-2-18

Gipuzkoako Kaleratzeak Stop eta IRPH Stop elkarteek Kutxabankeko presidente den Gregrio Villalabeitiak soldata %73 igo eta 800.000 euro irabaztea guztiz onartezina dela uste dute. Soldata iraingarria da fede oneko zordunekin guztiz gupidagabea den entitate batetan, etxebizitza ordainetan hartu eta alokairu soziala sistematikoki baztertu eta erakunde publiko eta epaitegietatik jasotako deiei entzungor eginda IRPH indizea aplikatzen jarraitzen duen banketxe batetan hain zuzen ere.

Kutxabankeko presidenteak egunean 2.000 euro baino gehiago irabazten ditu. Antzeko kopuru batengatik Kutxabankek Lorena eta bere alaba beraien babes ofizialeko etxebizitzatik kaleratzea eskatu zuen.

Gainera, azpimarratzekoa da Gasteizko gobernuak esateko ezer ez duela adierazi izanak, beraiek ez direla presidenteari soldata igo diotenak. Galdera honakoa da: nor izan da? Araba, Bizkaia eta Gipuzkoako herritarroi, gure aurrezki, soldata eta pentsioekin orain banku-fundazio diren Aurrezki Kutxak sortu genituenoi inork ez digu galdetu. Banketxearen administrazio kontseiluak proposatu omen du, eta hiru banku-fundazioetako kideek berretsiko dute, guztiak ere PNV, PSE, PP eta CCOO-k izendatuak, eta inolako kontrol sozialik ez dutenak.

Burtsara irteteko bidean soldata igotzeko ez da dirurik falta, baina bai gizarte ekintzarako edota familia, pyme eta autonomoei maileguak emateko orduan. Noren eskutan dago Kutxabank? Ez behintzat bere benetako jabea den herriaren eskutan.

Horregatik da beharrezkoa pribatizazioaren bidean eginiko urratsak desegitea eta bere kontrol publiko, demokratiko eta soziala bermatzea.

Bai, ahal da.