IRPHa baliogabetuz Probintzia Auzitegi batek ebatzi zuen lehen epaia Araban lortu zuten Maite Ortiz eta José María Erauskinek 2016ko martxoaren 10ean. Ondoren, 2016ko maiatzaren 31ko data duen bigarren epai bat ezagutu genuen. Eta orain beste bi epai ezagutu ditugu, 2016ko ekaineko 29 eta 30ekoak. Guztiak zintzilikatu ditugu Epaitegiak atalean. Bertan duzu estatu guztian zehar IRPHa baliogabetuz ebatzi diren epaien datu baserik onena.

Epai horien artean lehenari Espainiako Auzitegi Gorenera zuzenduriko helegitea jarri zion Kutxabankek, eta pentsatzekoa da besteak ere bide beretik joango direla. Garrantzitsua da Arabako Auzitegiak IRPHa baliogabetzen duten epaiak hobesten jarraitzea, helegiteak helegite bere jarrera irmoa dela erakusten duelako.

Gogora dezagun Gipuzkoako Probintzia Auzitegiaren jarrera guztiz aurkakoa dela, eta IRPHa baliogabetzen zuten 40 epaitik gora atzera bota dituela dagoeneko, argumentu lotsagarri hauek erabiliaz:
1, ez omen dela bere manipulazioa frogatu, ahazturik ez dela hori epaitzen, baizik eta banketxeek emaitzan eragiteko aukera ote duten ala ez.
eta 2, ez dela Euribor-a baino manipulagarriagoa. Hau, gezurra izateaz gain, lapur bat hura baino okerragoak badirelako absolbitzea adinako astakeria da.

Gipuzkoako Auzitegiak atzera bota zituenak gure elkarteak Maite Ortiz eta José María Erauskin abokatuekin Donostiako Merkataritza Arloko Epaitegiak lorturiko epai aitzindariak dira. Beranduago estatu guztian zehar IRPHa baliogabetuz ebatzi diren dozenaka epaik ez dute aintzat hartu Gipuzkoako Auzitegiaren doktrina. Asko dira beraz Gipuzkoako Auzitegiaren argudioak baztertu eta Donostiako Epaitegiaren epaiei eutsi dieten epaileak.

Horregatik baikor izan behar dugu: Espainiako Auzitegi Gorenak ere ez ditu Gipuzkoako Auzitegiaren argudio lotsagarriak onartuko, eta Araban IRPHa baliogabetzen duten epaiak babestuko ditu.

Geurea da garaipena: IRPHa erori egingo da, edo eraitsi egingo dugu.

Bartzelonako Merkataritza Arloko 7. Epaitegiak bertan behera utzi du Caixabank-en mailegu batetan kalkulaturiko azken IRPH Cajas interes tipoa betirako finko geratuko zela ezartzen zuen klausula. Epaiak dio %3.851-koa izango litzatekeen interes finko horren ordez IRPH Entidades gehi diferentzial bat aplikatuko dela, oraintxe bertan %2 inguruko balioarekin.

Epai garrantzitsua da egoera berdinean dagoen jende kopuru oso handi batentzat. Caixabank-ekin duten mailegua hasera batean IRPH Cajas indizeari lotuta zegoen, baina hau desagertzean azkena kalkulaturiko interes tipoa betirako finko geratuko dela dien klausula dute indarrean. Kasu honetan tipo finko hori IRPH Entidades indizearekin ordezkatzen da, eta momentu hauetan mesedegarri izango da familiarentzat. Hala ere, epaia ez da Tarragonako Merkataritza Arloko 1. Epaitegiak ebatzi zuena bezain interesgarria. Kasu hartan, interes finkoa baliogabetzeaz gain mailegua interesik gabe geratu baitzen.

Epaia gure datu basean dago jadanik, eta zuzenean bistaratu dezakezu hemen klik eginda.

Valentziako Llíria-ko Lehen Instantziako 1. Epaitegiak IRPHa baliogabetuz ebatzi zuen epai bat irmo bihurtu da Sabadell banketxeak helegiterik ez aurkeztean. Oso berri garrantzitsua da IRPHaren aurkako epaitegietako borrokan. Izan ere, IRPHa baliogabetzen duten epaiak dagoeneko dozenaka badira ere, banketxeek beti aurkezten dute helegitea eta epai irmoen kopurua oraindik oso txikia da.

Gaur ezagutzera eman dugun hau IRPHa abusuzkoa delako baliogabetu duen laugarren epai irmoa da, gutxienez. Lehenengoa 2016ko urtarrilean ezagutu genuen (Valentziako Merkataritza Arloko 3. Epaitegiak ebatzia). Bigarrena, maiatzean ezagutu genuen (Huelvako Lehen Instantziako 3. Epaitegiak ebatzia). Eta hirugarrena 2016ko ekainaren 17an ebatzi zen Asturiasko Pola de Siero-n.

Epai honek maileguan indarrean zegoen IRPH Entidades indizea baliogabetzen du, eta gehitzen du hasieran izan zuen IRPH Cajas indizea ere baliogabetu izango zukeela. Banketxea bidegabe kobraturiko interesak itzultzera zigortua izan da, eta maileguak aurrera jarraitzen du IRPH Entidades indizearen ordez Euribor-a aplikatuz, diferentzialik gabe.

Azpimarratzekoa da epaileak oso argi uzten duela mailegua inolako interesik gabe utzi izango zukeela. Izan ere, ulertzen du (egoki ulertu ere) abusuzko klausula bat baliogabetzean ezin duela moderatu edo erregulatu, eta kontratutik kentzera mugatu beharra duela. Eta, beste epaile batzuk bezala, mailegua berez doako kontratua dela ulertzen duelarik, esaten du interesik gabe utziko zukeela, salaketa jarri duenaren auzibideak ez balu espresuki eskatu Euribor-arekin ordezkatzea.

Oso litekeena da banketxeak helegitea ez jartzearen arrazoia horixe bera izatea. Izan ere, helegitearekin aurrera jarraitu ezkero mailegua interesik gabe geratzeko arriskua ikusiko zuten agian, kobraturiko interes guztiak itzuli beharko zituztelarik.

Edozein modutan, salaketa jarri duena gustura egoteko moduan dago, zero azpiko balioetan dagoen Euribor batekin geratu baita.

Epaia dagoeneko gure datu basean dago eskuragarri, eta zuzenean ikusteko nahikoa duzu hemen klik egitea.

Maite Ortiz eta José María Erauskin abokatuek aditzera eman dutenez, Gasteizko Merkataritza Arloko 1. Epaitegiak, bere 190/2016 epaiaren bitartez, UCIren etxebizitza mailegu bateko IRPHa baliogabetu du. Epaiak bere osotasunean onartzen du Ortiz eta Erauskinek ordezkaturiko kaltedunaren auzibidea, IRPH Cajas eta IRPH Entidades indizeak baliogabetzen ditu eta kobraturiko interes guztiak itzuliko direla ebazten du. Gainera, maileguak interesik gabe jarraituko duela ezartzen du. Berandutze interesak bezalako beste abusuzko klausula batzuk ere baliogabetzen ditu.

UCI (Unión de Créditos Inmobiliarios) entitatearen biktima guztientzat oso berri ona da. Santander taldeko entitate hau ezaguna da mailegu oso toxiko eta abusuzkoak saldu izanagatik. Eta, jakina, IRPHa da gehien erabiltzen duen erreferentzia indizea.

Azpimarratzekoa da baita ere epai honen bitartez Gasteizko Merkataritza Arloko 1. Epaitegiak IRPHaren inguruko bere jarrerari tinko eusten diola. Jarrera hori aurrez ere adierazi zuen beste epai batzuen bitartez, eta Arabako Probintzia Auzitegiak babestu egin zuen bigarren instantzian IRPHa baliogabetzen zuen lehen epaia izan zenaren bitartez. Epai harri helegitea jarri zion banketxeak (kasu hartan Kutxabankek) eta Espainiako Auzitegi Gorenean tramitera onartzeko zain dago orain kasua.

Epaia dagoeneko gure datu basean dago eskuragarri, eta zuzenean ikusteko nahikoa duzu hemen klik egitea.

Maite Ortiz eta José María Erauskinek (IRPH Stop Gipuzkoa elkartearen abokatu boluntario eta IRPHaren aurkako borroka judizialaren aitzindari) ICAMÁLAGA Abokatutzaren Kongresu Juridikoaren hamabigarren edizioan esku hartu zuten, IRPHaren inguruko hitzaldi batekin. Handik egun gutxira, abokatuek txostena bere osotasunean eskegi dute euren bulegoko webgunetik, eta guk gure webgunera ekarri dugu, hemen klik eginda eskuratu ahal dezazun.

IRPHaren aurkako borroka judizialean aitzindari izateaz gain orain arteko lorpen handienen erantzule dira Ortiz eta Erauskin, eta txostenean giltzarri guztiak aztertzen dituzte. Garrantzi handiko dokumentua da dudarik gabe, eta argitara ematean izan duten eskuzabaltasuna bihotzez eskertzen dugu kaltedunok.

PAH elkarteak “Justiziarik gabe ez dago eskubiderik” jardunaldiak antolatu ditu urriaren 6,7 eta 8rako. Espainiako Auzitegi Gorenaren aurrean ospatuko dira, etxebizitza duin baterako eskubidea aldarrikatzeko. PAH elkarteak bere webgunean azaltzen duenez, Justizia munduari herritarron aldarrikapenak helarazteko balioko dute jardunaldiok.

Aldarrikapen horien artean dago IRPH abusuzko indizea bertan behera uztea, eta IRPHaren inguruko tailer bat ere izango da, Maite Ortiz eta José María Erauskin gure abokatu boluntarioen eskutik. Urriaren 8an izango da, larunbatez. Madril inguruan bazabiltza ezin duzu galdu!

Gogora dezagun Maite Ortiz eta José María Erauskin aitzindariak direla IRPHaren aurkako borroka judizialean, eta euren lorpenen artean dagoela IRPHa baliogabetzen duen eta Probintzia Auzitegi batek berretsi duen lehen epaia. Banketxeak helegitea jarri zion epaiari, eta beraz kasua Gorenean epaitua izango da. Ondorioz, 1.3 milioi familiatik gora epaitegi honek hartuko duen jarrerari adi dago, eta horregatik da garrantzitsua mezu bat helaraztea: justizia exijitzen dugu. IRPHa iruzur bat da eta ez dugu onartuko inolako trikimailurik bere baliogabetasuna ez ebazteko.